2 Samuɛli 23 - Bibeli Luayãtaalá

2 Samuɛli 23

Click on verse(s) to share them!

¹Yã́ gbɛzã pↄ́ Davidi òn kɛ: Yɛse nɛ́ Davidi yã́n kɛ, gbɛ̃́ pↄ́ Lua aà gbà gbãa yã'oaɛ. Yakↄbu Lua aà kpà kía ũ, ↄ̃mɛ Isailiↄ lɛ̀dan maa ũ.

²Dii Nisĩna yãdàmɛɛ, aà yã́ dↄ ma lɛ́u.

³Isailiↄ Lua yã'ò, Isailiↄ gbɛsi òmɛɛ: Tó kí yãgↄ̃̀gↄ̃ gbɛ̃́ↄnɛ a zɛ́wa, mɛ́ à kía blè vĩakɛa Luaɛ guu,

⁴ìↄ dɛ lán ĩatɛ̃ bilɛa gupuawaɛ, lán gudↄa guduuduusaiwa, lán lou pↄ́ ì to sɛ̃ bↄlɛwa.

⁵Ma bɛdeↄ na ń Luaoo lé? Aà bàa aↄ kumanↄ e gↄↄpiiɛ. À a yã́ dↄ̀dↄ píi, a sea vĩo. A bↄ ń ma suabaaoo lé? A pↄ́ pↄ́ má a ni vĩ kpaa píio lé?

⁶Gbɛ̃pãↄ dɛ lán lɛwaɛ, wì ń vũaaɛ, wìli kṹ kyàuo.

⁷Gbɛ̃́ pↄ́ ye kã́má, sema aàↄ gↄ̃kɛbↄ ge go kũa, i tɛsↄ̃má ń kúkĩi.

⁸Davidi nɛgↄ̃naↄ tↄ́n kɛ: Akemↄ gbɛ̃́ Yasↄbaũá nɛgↄ̃n tↄde gbɛ̃ↄn àaↄ̃ↄ dↄaanaɛ. Ɔ̃mɛ sↄ̃na sɛ̀ gbɛ̃ↄn ↄ̀aa síiↄ̃ↄzi, à ń zↄ̃zↄ̃ò píi gↄↄdoũzĩ.

⁹Gbɛ̃́ bee gbɛa Dodai nɛ́ Ɛleazaa, Ahoa gbɛ̃́ kú nɛgↄ̃n gbɛ̃ↄn àaↄ̃piↄ guu lↄ. A kú ń Davidio gↄↄ pↄ́ Isailiↄ kã̀aa aa zĩkà ń Filitɛ̃ↄ Pasadamiũ. Isailiↄ pↄ̀ↄbↄzãkɛ̀,

¹⁰ↄ̃ aàpi fɛ̀lɛ à Filitɛ̃ↄ dɛ̀dɛ e aà ↄ wã̀, à gↄ̃̀ fɛ̃nda pá kũa. Dii tò à zĩblè maamaa gↄↄ bee. Zĩgↄ̃ kĩniↄ ɛ̀a sù aa aà lè, ãma pↄ́ↄ woloa gɛↄwa yã́iɛ.

¹¹Gbɛ̃́ bee gbɛa Age nɛ́ Sãma gusĩsĩde gbɛ̃́ kú. Kɛ́ Filitɛ̃ↄ gãli kã̀aa gu pↄ́ bláa bú kúu, Isailiↄ bàalɛ̀nɛ́,

¹²aàpi mɛ́ zɛ̀ gì búpi guoguo. À búpi sìmá, à Filitɛ̃ↄ dɛ̀dɛ. Dii tò à zĩblè maamaa.

¹³Pↄkɛkɛgↄↄ nɛgↄ̃n gbɛ̃ↄn baakwiↄ guu, gbɛ̃ↄn àaↄ̃ↄ bↄ̀ gɛ̀ Davidi kĩ́i Adulaũ gbɛ̀'ɛu. Filitɛ̃ↄ gãli bòo kálɛ Lefai guzulɛu.

¹⁴Gↄↄ bee Davidi ku sɛ̃gbãu, Filitɛ̃ gudↄ̃anaↄ ku Bɛtɛlɛũ.

¹⁵Davidi lɛ́ a bɛ í nidɛ à mɛ̀: Démɛ a gɛ́ Bɛtɛlɛũ bↄlɛ lↄ̀ↄ'i tↄ́imɛɛi?

¹⁶Nɛgↄ̃n gbɛ̃ↄn àaↄ̃piↄ mɛ́ gɛ̀ gɛ̃̀ Filitɛ̃ↄ bòou, aa Bɛtɛlɛũ bↄlɛ lↄ̀ↄ'i tↄ̀ aa sùò Davidiɛ. Ɔ̃ i we mìo, a tↄ̃̀lɛ Diiɛ sa'o'i ũɛ.

¹⁷À mɛ̀: Kai Dii, má fↄ̃ íɛ bee mio. Gbɛ̃́ pↄ́ aa gì ń wɛ̃niiↄ auɛ. I we mìo. Nɛgↄ̃n gbɛ̃ↄn àaↄ̃piↄ yãkɛan we.

¹⁸Zeluia nɛ́ Abisai, Yoabu dãuna mɛ́ nɛgↄ̃n gbɛ̃ↄn baakwiↄ dↄaana ũ. Ɔ̃mɛ sↄ̃na sɛ̀ gbɛ̃ↄn ↄ̀aa do ń basↄooↄzi à ń dɛdɛ, ↄ̃ à tↄbↄ̀ gbɛ̃ↄn baakwipiↄ guu.

¹⁹À tↄbↄ̀ dɛ nɛgↄ̃n gbɛ̃ↄn àaↄ̃piↄla, ↄ̃ à gↄ̃̀ ń dↄaana ũ, kási a ku nɛgↄ̃n tↄde gbɛ̃ↄn àaↄ̃piↄ guuo.

²⁰Yoiada nɛ́ Benaia, Kabazee gbɛ̃́á zĩ̀kan wↄ́ↄdeɛ. Aà yãkɛaↄ dasi. À Mↄabu nɛgↄ̃n tↄdeↄ dɛ̀ gbɛ̃ↄn pla. À gɛ̃̀ ɛ guu gↄↄ pↄ́ lougbɛ kwɛ̀, à nↄ̀ↄmusu dɛ̀u.

²¹À Egipi gↄ̃sa tìisi pↄ́ sↄ̃na kũa dɛ̀. À sↄ̃̀aàzi ń goo, à aà sↄ̃na sìwà à aà dɛ̀ò.

²²Yoiada nɛ́ Benaia mɛ́ yã́piↄ kɛ̀, ↄ̃ à tↄbↄ̀ nɛgↄ̃n gbɛ̃ↄn baakwipiↄ guu.

²³À tↄbↄ̀ dɛ nɛgↄ̃n gbɛ̃ↄn baakwipiↄla, kási a ku nɛgↄ̃n tↄde gbɛ̃ↄn àaↄ̃piↄ guuo. Ɔ̃ Davidi aà dìlɛ a dↄaiↄ gbɛ̃zↄ̃ↄ ũ.

²⁴Gbɛ̃́ↄ baakwipiↄ tↄ́n kɛ: Yoabu dãuna Asaɛli, Dodo nɛ́ Ɛlana Bɛtɛlɛũ gbɛ̃́,

²⁵Alodi gbɛ̃́ↄ Sãma ń Ɛlikao,

²⁶Paleti gbɛ̃́ Ɛlɛzi, Tekoa gbɛ̃́ Ikesi nɛ́ Ila,

²⁷Anato gbɛ̃́ Abiɛzɛɛ, Usa gbɛ̃́ Mɛbuni,

²⁸Ahoa gbɛ̃́ Salamↄ, Nɛtofa gbɛ̃́ Malai,

²⁹Nɛtofa gbɛ̃́ Baana nɛ́ Ɛlɛbu, Gibɛa pↄ́ kú Bɛ̃yãmɛɛ bùsuu gbɛ̃́ Libai nɛ́ Itai,

³⁰Pilatↄ̃ gbɛ̃́ Benaia, Gaasi guzulɛ gbɛ̃́ Idai,

³¹Alaba gbɛ̃́ Abialebↄ̃, Bauliũ gbɛ̃́ Azemavɛ,

³²Saaleboni gbɛ̃́ Ɛliaba, Yasɛ̃ nɛ́ↄ,

³³gusĩsĩde gbɛ̃́ Sãma nɛ́ Yonatãa, gusĩsĩde gbɛ̃́ Salaa nɛ́ Ahiaũ,

³⁴Maaka gbɛ̃́ Aasebai nɛ́ Ɛlifele, Gilo gbɛ̃́ Aitofɛli nɛ́ Ɛliaũ,

³⁵Kaamɛli gbɛ̃́ Ɛzɛlo, Laalubu bui Paalai,

³⁶Zoba gbɛ̃́ Natã nɛ́ Igali, Gada bui Bani,

³⁷Amↄni bui Zɛlɛki, Beelo gbɛ̃́ Naalai, Zeluia nɛ́ Yoabu zĩkabↄkũna,

³⁸Yɛtɛɛ buiↄ Ila ń Galebuo

³⁹ń Iti bui Ulio. Ampii aa gbɛ̃ↄn bla àaↄ̃saiɛ.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

2 Samuɛli 23123456789101112131415161718192021222324

2 Samuɛli 23
1
2
3
4
5
6
7
8
9
10
11
12
13
14
15
16
17
18
19
20
21
22
23
24