Sameela Maxaafaa Naa77anttuwaa 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Hageeti Daawiti wurssettan haasayido qaalata. Isseya na7ai Daawiti haasayees; Xoossai xoqqu xoqqu oottidoogee, Yaaqooba Xoossai tiyidi kawoyidoogee, Israa7eelan lo77o mazamuriyaa kessidaagee hagaadan yaagees;

²“GODAA Ayyaanai ta baggaara haasayees; a qaalai ta inxxarssan de7ees.

³Israa7eela Xoossai haasayiis; Israa7eela Zaallai tana hagaadan yaagiis; ‘Xillotettan deriyaa haariya kawoi, Xoossaassi yayyiiddi kawotiya kawoi

⁴shaari bainna guuran doliya xalqqiyaa poo7uwaa mala. He urai irai bukki simmin, biittaappe maataa mokissiya booqalssaa mala’ yaagiis.

⁵“Tumu ta keettaa asai Xoossaa sinttan suure. I tanaara merinaa maachchaa maacettiis; ubbabaikka ha maachchaa giddon giigidinne minnidi uttiis. Xoossai taayyo xoonuwaa immana; qassi taani amottidobaa ubbaa i tumuppe polana.

⁶SHin iita asati ubbai kushen shiishshanau hanenna agunttatudan wora olettana.

⁷Agunttata bochchiya ooninne birataa woikko toora toomaa ba kushiyan oiqqanau koshshees. He agunttati bantta de7iyo sohuwan eexxana” yaagiis.

⁸Daawita asatu minotu sunttai hagaappe kaallidi xaafettiis. Etappe heezzati keehippe erettidaageeta. Heezzatuppe koiroi Taahikimoonappe yiida Yooshebi-Baashebeeta geetettees; i issitoo olan ba tooran hosppun xeetu asaa woriis.

⁹Heezzu mino asatu giddon a kaallidi de7iyaagee Ahoohiyaa Doodo na7aa El77aazara. Issi gallassi inne Daawiti olau shiiqida Pilisxxeemata naassidosona; hegaappe guyyiyan, Israa7eela asai guyye simmiis.

¹⁰SHin i ba sohuwan minni eqqidi, a kushee xalalidi, bisuwaara oiqettana gakkanaashin, Pilisxxeema asata shociis. He gallassi GODAI gita xoonuwaa immiis. Olai eqqin, olanchchati El77aazarakko simmidi yiidosona; shin eti haiqqida Pilisxxeematuppe olaa maayuwaa qaaridosonappe attin, harabaa oottibookkona.

¹¹Appe kaalliyaagee qassi Haaraarappe yiida Age na7aa SHamma. Issi gallassi Pilisxxeema asati misirai kumi uttido shooqan shiiqidosona; shiiqin Israa7eela asati eta sinttaappe baqatidosona.

¹²SHin SHammi shooqau giddo baazzan murttidi eqqidi olettiis. Pilisxxeema asata shocidi dippiyiis. Hegan GODAI wolqqaama xoonuwaa immiis.

¹³Katta cahan hasttamu mino asatuppe heezzati Daawitakko Adulaama katamaa matan de7iya gonggoluwaa biidosona. He wode Pilisxxeema olanchchati Rafaima Wombban shiiqi uttidosona.

¹⁴He wode Daawiti qatuwaa giddon de7ees; Pilisxxeema olanchchatu citai qassi Beetaliheemen de7ees.

¹⁵Daawiti haattaa uyanau amottidi, “Beetaliheeme katamaa penggiyaa lanqqen de7iya pultto haattaappe tana ooni ushshanddeeshsha!” yaagiis.

¹⁶Yaagin heezzu mino asati Pilisxxeema olanchchatu moottaa kanttidi, Beetaliheeme katamaa penggen de7iya pulttuwaappe haattaa duuqqidi Daawitayyo ehiidosona. SHin i uyennan ixxiis; ixxidi, GODAA sinttan tigidi,

¹⁷“Abeet GODAU, hagaa uyanaagee taappe haakko! Ha haattai bantta shemppuwaa shenehoo giidi xalidi biida asatu suuttaa gidennee?” yaagidi uyennan ixxiis. Ha heezzu mino asati hagaa oottidosona.

¹⁸Xaruuyi na7aa Yoo7aaba ishai Abishaayi hasttamatuyyo halaqa; i heezzu xeetu asata ba tooran olidi woriis; yaatidi ikka hara heezzatudan erettiis.

¹⁹I hasttamatuppe aadhdhidi bonchchettida asa; i etayyo halaqa gidiis. Gidikkonne, i he heezzatu qoodan de7enna.

²⁰Qassi Qabxxi7eelappe yiida Yoodaahe na7ai Banaayikka mino asa. I mino oosota oottiis. I naa77u erettida Moo7aaba asata woriis. Qassi shachchai dariyo issi gallassi ollaa duge gelidi, gaammuwaa woriis.

²¹Qassi Gibxxe bitaniyaa issi pomppollaa woriis; Gibxxe bitanee tooraa oiqqiis; shin i dullaa oiqqidi a bolli biis; biidi a kushiyaappe tooraa dafi ekkidi, a tooran a woriis.

²²Yoodaahe na7ai Banaayi hageeta oottiis. A sunttaikka he heezzatuugaadan erettiis.

²³I hasttamatu giddon daro bonchchettis; shin i heezzatu qoodan de7enna. Daawiti a bana naagiya olanchchatussi halaqa kessiis.

²⁴He hasttamatu giddon de7iyaageeti: Yoo7aaba ishaa Asaaheela, Beetaliheemeppe yiida Doodo na7aa Elihanaana,

²⁵Haroodappe yiida SHammanne Eliiqa,

²⁶Palxxa yara gidiya Heleexa, Taqo7appe yiida Iqqeesha na7aa Ira,

²⁷Anatootappe yiida Abi7eezera, Huushappe yiida Mabunaaya,

²⁸Ahooha yara gidiya Xalmmoona,

²⁹Naxoofappe yiida Maahiraayanne Ba7aana na7aa Heleeba, Biniyaama biittaappe, Gib77appe yiida Ribaaya na7aa Ittaaya,

³⁰Pir77aatoonappe yiida Banaaya, Ga7aasha Zanggaaraa matappe yiida Hiddaaya,

³¹Aarabappe yiida Abi7albboona, Baahiruumappe yiida Azimaaweeta,

³²SHa7albboonappe yiida Eliyaahiba, Yaasheena naata, Yonaataana,

³³Haaraarappe yiida SHamma, Haaraarappe yiida SHaraara na7aa Ahi7aama,

³⁴Maa7ikappe yiida Ahasabaaya na7aa Elifeleexa, Giiloppe yiida Akixoofeela na7aa Elii7aama,

³⁵Qarmmeloosappe yiida Hexira, Araba katamaappe yiida Pa7araaya,

³⁶Xooba katamaappe yiida Naataana na7aa Yigi7aala, Gaadappe yiida Baana,

³⁷Amoonappe yiida Xeleqa, Xaruuyi na7aa Yoo7aaba ola miishshaa tookkiya Ba7erootappe yiida Naahiraaya,

³⁸Yatira yara gidiya Ira, Yatira yara gidiya Gaareebanne

³⁹Hiitiyaa Ooriyoona. Eti muleera hasttamanne laappuna.