2 Samuel 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹He tah David kah olka, Jesse capa David kah hmailong olphong, Jakob Pathen loh a koelh tih sang la thoh hlang kah olphong, Israel kah laa ding ni.

²BOEIPA kah Mueihla he kai dongah cal tih, a ol te ka lai dongah om.

³Israel Pathen loh kai taengah a thui tih, “Israel lungpang tah hlang soah a dueng la aka taemrhai tih Pathen hinyahnah neh aka taem aka rhai la om.

⁴Mincang khosae khomik aka thoeng bangla, mincang khomai a om pawt dongah a aa bangla, khotlan hnukah diklai lamkah baelhing banghui ni.

⁵Ka imkhui he Pathen neh doda uh ngawn pawt cakhaw kumhal paipi tah kamah taengah ni a khueh. A cungkuem dongah rhong a tael tih ka daemnah cungkuem te a ngaithuen. Te dongah ka hue ngaih boeih te khaw cuen voel pawh.

⁶Tedae aka muen tah hling bangla a thaek banlak tih kut nen khaw lo voel pawh.

⁷Amih aka ben hlang long tah thi neh caai tueng khaw cung tih amah hmuen ah hmai neh a hoeh la a hoeh uh,” a ti.

⁸He rhoek he tah David kah hlangrhalh rhoek kah a ming ni. Takhemoni Joshebbashebeth tah boeilu la om tih anih tah amah kah caai neh yahuem sut. Caai nen te hlang ya rhet mai voei khat la a rhokpam sak.

⁹Anih hnuk, anih hnukah tah Akhohi capa Dodo, Dodo capa Eleazar khaw David taengkah hlangrhalh pathum khuiah thum. Amih te a veet tih caemtloek ham Philisti rhoek a tingtun uh vaengah Israel hlang khaw a khuen uh.

¹⁰Te dongah anih te thoo tih a kut a kohnue neh cunghang dongah a kut rhap a khoom duela Philisti te a tloek. Te dongah BOEIPA loh amah khohnin ah loeihnah tanglue a saii pah tih pilnam khaw anih hnukah hnopai pit ham dawk la ha pawk uh.

¹¹Anih phoeiah Harari Agee capa Shammah a om vaengah Philisti tah mulhing bangla tingtun uh. Te vaengah lohma kah khamyai ah rhacik khawk om tapkhoeh. Pilnam tah Philisti mikhmuh lamloh rhaelrham coeng.

¹²Te vaengah khamyai bangli ah pai tih pilnam te a huul. Philisti te a ngawn vaengah BOEIPA loh loeihnah tanglue a saii pah.

¹³A lu sawmthum pathum khuikah sawmthum te suntla uh tih cangah vaengah Adullam lungko kah David taengla pawk uh. Te vaengah Philisti mulhing tah Rephaim kol ah rhaeh pueng.

¹⁴Te vaengah David te rhalvong khuiah om tih Philisti rhaltawt hmuen tah Bethlehem ah om van.

¹⁵David loh vongka kah Bethlehem tuito tui ke a ngaidam tih, “U long nim kai n'tul lah ve,” a ti.

¹⁶Te dongah hlangrhalh pathum loh Philisti kah rhaehhmuen te a va uh tih vongka kah Bethlehem tuito tui a than uh. Te phoeiah a khuen uh tih David taengla a pawk puei uh. Tedae a ok ham huem pawt tih BOEIPA hmaiah a hawk.

¹⁷Te vaengah, “He ka saii ham kai lamkah tah savisava BOEIPA, a hinglu aka caeh puei hlang rhoek kah a thii a? a ti tih ok ham huem pawh. Hlangrhalh pathum long khaw te tlam te ni a saii uh.

¹⁸Zeruiah capa Joab mana Abishai tah pathum kah a lu la om. Anih loh a caai te a haeng tih ya thum rhokpam sak. Te dongah anih tah pathum lakah a ming om.

¹⁹Pathum lakah a thangpom het a? Te dongah amih taengah mangpa la om cakhaw pathum te a pha moenih.

²⁰Kabzeel lamkah Jehoiada capa Benaiah tah hlangtang capa, tatthai neh a bisai khaw khuet. Anih loh Moab kah sathueng hlang panit te a ngawn. Te phoeiah anih te suntla tih vuel hla dongah vaam kah sathueng khui ah aka om sathueng te a ngawn.

²¹Anih loh Egypt hlang tah a mueimae hlang aka then khaw ngawn bal. Egypt kut dongah caai om dae a conghol neh suntlak thil. Te phoeiah Egypt kut lamkah caai te a rhawth pah tih amah caai neh amah te a ngawn.

²²Te te a saii dongah Jehoiada capa Benaiah tah hlangrhalh pathum dongah a ming thum.

²³Sawmthum lakah a thangpom dongah pathum taengah thum sak voel pawt tih anih te David amah kah a taengom la a khueh.

²⁴Sawmthum khuiah Joab mana Asahel neh Bethlehem kah Dodo capa Elhanan,

²⁵Kharodi Shamah neh Kharodi Elika,

²⁶Palti Helez neh Tekoa Ikkesh capa Ira,

²⁷Anatoth kah Abiezer neh Khushathi Mebunnai,

²⁸Akhohi Zalmon neh Netophah Maharai,

²⁹Netophah Baanah capa Heled, Benjamin koca rhoek kah khohmuen Gibeah kah Ribai capa Ithai,

³⁰Pirathon capa Benaiah, Gaash soklong lamkah Hiddai,

³¹Arbahi Abialbon neh Barhum Azmaveth,

³²Shaalbin Eliaba neh Jashen koca rhoek lamkah Jonathan,

³³Harari Shammah, Harari Sharar capa Ahiam,

³⁴Maakathi koca kah Ahasbai capa Eliphelet, Giloh Ahithophel capa Eliam,

³⁵Karmel Hezro neh Arab Paarai,

³⁶Zobah lamkah Nathan capa Igal, Gad Bani,

³⁷Ammoni Zelek, Zeruiah capa Joab kah hno phuei Beeroth Naharai,

³⁸Yitha Ira neh Yitha Gareb,

³⁹Khitti Uriah neh tun ah sawmthum parhih lo uh.