2 SAMUEL 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹David ena hereva dokodia bini: David Iese ena hereva, Dirava ena amo; atai ai e abia dae tauna, Iakob ena Dirava ese e horoa tauna, Israel edia ane gaihodia isisibadia tauna, ena hereva.

²Iehova ena Lauma na udugu amo e herevamu, iena hereva na malagu ai.

³Israel ena Dirava vada e hereva, Israel ena Nadi-gini vada e hereva henigu, eto: Taunimanima e biagudia maoromaoromu, Dirava igari-henina ai e biagudiamu, tauna,

⁴ia na idia latadiai e diarimu, daba e reremu na heto, eiava daba asi oriorina ai dina e taramu na heto; ia na idia latadiai e dihomu, medu na heto, medu ese rei tano ai e hatubuamu na heto.

⁵Momokani, Dirava ese egu iduhu na unu vada e tomaia ani? Badina be mia-hanaihanai taravatuna vada e henigu, ḡau iboudiai ilailaidia; vada e hamomokania danu. Ikahagu bona egu ura idavarina na ia ese baine havara henigu ani?

⁶A Dirava asie matauraiamu taudia na ginigini, e negediamu ḡaudia, na heheto; imada amo basita abidia diba.

⁷A baine daudia toho tauna na auri bona io auna imana ai e abimu; bona lahi ese e aradia oremu.

⁸David ena goada-herea taudia ladadia bini: loseb-basebete, Takemono tauna; tuari lohiadia tatoiosi bogaragidiai gini gunana be ia. Ia ese tatau sinahu-taurahani na nega tamona ai ena io amo e aladia mase.

⁹Hari goada taudia tatoiosi bogaragidiai, ihararuana be Eleasara; ia na Dodo Ahohi natuna. Filistia taudia na tuari totona e hebouva bena Israel taudia na e lou negana ai, una tau na David ida.

¹⁰Bena ia na e tore isi, Filistia taudia e aladia ela bona imana e hisihisi bona dare idogo-taona ai imana e hekamo dae. Una dina ai Iehova ese kwalimu badana e karaia; bona orea taudia na ia murinai ela, hari mase taudia edia ḡau iboudiai bae hagogo mo totona.

¹¹Ihatatoina be Sama Age, Harara tauna. Filistia taudia na Lehi ai e hebouva; lentil umana ta be unuseni ai. Israel taudia na Filistia taudia vairadia amo e heau;

¹²bena hari Sama na uma bogaraginai e gini ahu, Filistia taudia e aladia mase. Unu amo Iehova ese kwalimu badana e karaia.

¹³Lohia toiahuiosi bogaragidia amo hari tatoiosi ela, taboro negana ai David enai e kau, Adulama kohuana ai. Filistia taudia edia orea ta na Refairn kourana ai e taruha.

¹⁴Una negana ai David na ena kohua ai e nohova, a Filistia taudia edia tuari oreana na Betelehem ai.

¹⁵Bena David na mai lalo-hekisehekisena ida e hereva, eto, Ta ese Betelehem ikoukouna badibadinai e miamu gurina amo ranu kuri ta bema henigu, bama inua.

¹⁶Bena hari goada-herea taudia tatoiosi na Filistia taudia edia taruha amo e raka uru, Betelehem ikoukouna badibadinai e miamu gurina amo ranu e utua, bena e abia, David dekena e laohaia. A David na lalona se hegereḡere baine inua; ia na e bubua dobi, Iehova ena;

¹⁷eto, Iehova e, egu ai unu basine heto, lasi ona lasi vaitani; edia mauri inegedia asie laloa taudia raradia baina inu a? Taunabunai, ia na inuna se ura. Ini kara be hari goada-herea taudia tatoiosi ese e kara.

¹⁸Abisai Seruia, Ioab tadina, ese hari lohia toiahuiosi na e biagudiava. Ia ese tatau sinahu-toi na ena io amo e aladia mase; bena ia harina na hari tatoiosi haridia ida e haheḡereḡeredia.

¹⁹Hari toiahuiosi bogaragidiai, ia mo sibona harina vada e bada, bena biagudia ai ela. A ia na unu tatoiosi ida se heḡereḡere.

²⁰Benaia lehoiada na boga-auka tauna ta, Kabsele amo; ia na kara badadia e karava. Ia ese Ariele natuna raruosi Moab amo na e aladia mase; bona leona ta guri lalonai e alaia mase, snow e dihova dinana ai.

²¹Aigupto tauna ta danu, raho-namo tauna, na ia ese e alaia mase. Una Aigupto tauna na imana mai iona; a Benaia na au ta e abia, e lao henia, io na Aigupto tauna imana amo e dadia, bena sibona ena io amo e gwadaia mase.

²²Ini kara na Benaia lehoiada ese e karava, bena ia harina na unu tatoiosi haridia ida e gwauraidia hebou.

²³Ia na mai harina unu toiahuiosi bogaragidiai; ḡau tamona hari tatoiosi ida se heḡereḡere. Bena David ese ia igimana oreana biaguna ai e halaoa.

²⁴Ioab tadina Asahele na toiahuiosi taudia ta. Oredia bini: Elhanan Dodo, tau Betelehem;

²⁵Sama, tau Harod; Elika, tau Harod;

²⁶Helese, tau Palti; Ira Ikese, Tekoa tauna;

²⁷Abiesere, Anatoto tauna; Mebunai, tau Husata;

²⁸Salmon, tau Ahohi; Maharai, tau Netofa;

²⁹Helebe Baanaha, tau Netofa; Itai Ribai, tau Gibea, Beniamina iduhuna tauna;

³⁰Benaia, tau Piratono; Hidai, Gaasa sinavaidia amo;

³¹Abialabono, Araba tauna; Asamavete, Bahurimi tauna;

³²Eliaba, tau Saalbon; lasene natuna; Ionatan;

³³Sama, tau Harara; Ahiama Sarara, tau Harara;

³⁴Elifelete Ahasabai, tau Maaka; Eliama Ahitofel, tau Gilo;

³⁵Hesero, Karamele tauna; Paarai, Arab tauna;

³⁶Igala Natan, tau Soba; Bani, tau Gad;

³⁷Seleke, Amono tauna; Naharai, tau Beroto, Ioab Seruia ena kesi ihuana tauna;

³⁸Ira, tau Itiri; Gareb, tau Itiri;

³⁹bona Uria, Hiti tauna. Iboudiai na toi-ahui hitu.