1Ʒi Dawidire dâŋ tatarane: Isaire ŋokâ Dawidi e toŋko hekicne â Jakobore Anutuzi wokemaŋ ruacnewec erâ Israe guruo miti mânec hehe saric jukac e ʒiŋuc mukac:
2“Wofuŋte Mârozi norao dâŋ muwec, dâŋticnezi micnaneo fokac.
3Israere Anutuzi dâŋ muwec, Israere qânâ sanaŋzi ʒiŋuc nazawec: ‘Moc e Anutu araŋ bacnehuc hata fâretiŋko ŋic rauc‐jopaekac,
4e furic tatamac iŋucne tamae‐jareekac, furic qânikiŋ biaŋko ʒoaŋzi tamaeekac irec sâc eekac, hoe heme sopâc kecɋaŋ jaŋe âkeʒuhuc fua biaŋ eeŋgopieŋ iŋuc ejareekac.’
5Ficnane i Anutuhec ŋejâmbâŋkekac. Eki hâcne nohec ʒâʒâfic tatara tâmiric bâfuawec, e wiac sasawa bâtâcne bâtimuŋ eku basanaŋke‐fârewec. E bafic‐nane â aŋac‐nane fokac i mume fua biaŋ efâre‐jâmbâŋkeocmu hâcne.
6Ŋic miti tâmiric jaŋe qiŋambu ʒârâ behekicne iŋucne. I mezi sâcne mi rorone hâcne.
7Ŋic moc e wiac i omaeoctemurâ aeŋ me gunu wiaczi qanʒaŋneme waha ŋeha ʒoczi ʒarâ ʒâseŋke‐fâreekac.”
8Dawidire ŋicfâc tâpiri ɋicwânʒâŋ‐jeŋichec ʒiŋuczi jumbiŋ: Takemoŋ ŋic ʒâŋene Jose‐Basebe. E ŋic momori wânʒâŋ jahec â moc jumbiŋ jaŋere femicne juwec. Eki hâcne sându‐ticnezi ʒoaŋ mocjahao ŋic 800 âke hâmoc‐jopawec.
9Ehame ŋic momori wânʒâŋ jahec â moc jaŋere ŋondeŋko Jose‐Basebe erao ŋic moc ʒuhuckerâ juwec ʒâŋene Eleaʒa. E Ahohi ŋic, Dodore ŋokâ hâcne. E Dawidihec juha Filisa ŋic ʒikare tumaŋnepie Israe ŋic jaŋe dockerâ wisembiŋ.
10Wisepie Eleaʒazi faharerâ Filisa ŋic jopaku meticne hâmome ʒika‐ticne basanaŋkerâ domawec. Eme Wofuŋzi ʒoaŋ ira aŋac ʒeri sâko bâfua‐jarewec. Eme Israe ŋic jaŋe ŋic jopakicne i jaŋere ŋaqi qoruc hetaraniŋte sawa risierâ bâjâpembiŋ.
11Ehame ere râpeo ŋic moc juwec ʒâŋene Sama, e Harari ŋic Age ere ŋokâ. Eme, Filisa ŋic jaŋe Lehi haeo mâreŋ ŋondeŋ moc basac gie sâko fowec ira tumaŋnembiŋ. Tumaŋnepie Israe ŋic jaŋe wisembiŋ.
12Wisepie Sama e ijaha sanaŋkerâ domahuc Filisa ŋic jopawec. Iŋuc eme Wofuŋzi aŋac ʒeri sâko bâfua‐jarewec.
13Eme qa roro dameŋko Filisa ŋic jaŋe Refaim wâneŋ teuŋ âterâ fohapie Dawidi micnefâc‐ticne 30 jaŋeraonec jahec â moc jaŋe Adulum qânâ hawecko humbiŋ.
14Dawidi e dameŋ ira ficsanaŋko ŋehuc juwec â Filisa momori jaŋe ine Betelehem hae rorâ ira ŋembiŋ.
15Eme Dawidi e ʒoaŋ mocko opâre aŋacke sâqoreme ʒiŋuc muwec: “Mozi moc Betelehem haere motâcko opâ nombâŋ ŋekac irecnec opâ nareme nazapo!”
16Iŋuc mume manarâ ŋic tâpiri ɋicwânʒâŋ‐jeŋichec jaŋe faharerâ Filisa ŋic jaŋere teuŋmaŋko fotâcnerâ Betelehem haere motâcko opâ nombâŋ ŋewec irecnec opâ fiarâ bara Dawidi râcnembiŋ. Eme e opâ i mi nânâ Wofuŋte biŋe hoŋkehuc
17ʒiŋuc muwec: “O Wofuŋ, no wiac iŋucne moc mi epemu. No ŋic juju‐jeŋic qaisockembieŋ ʒi jaŋere soc sâcne mi nâpemu.” Iŋuc muhuc qikiŋnewec. Ŋic tâpiri ɋicwânʒâŋ‐jeŋichec jahec â moc jaŋe mâsi iŋuc hâcne ehuc jumbiŋ.
18Ehame Zeruja ŋokâ‐ticne Joabere ɋa Abisai e micne 30 jaŋere femicne juwec. E sându‐ticnezi râsi 300 âke hâmoc‐jopahuc micne jahec â moc jaŋerao ʒuhuckerâ ʒâŋe biŋe sâkohec ewec.
19E ŋic 30 jaŋe qâhuc‐jopa‐fârerâ micne‐jeŋic juwec hâcne. Erâ e sifu ŋic jahec â moc jaŋere sâc mi bâfuawec.
20Â Jojada ŋokâ‐ticne Benaja e Kabezele haeoneczi ŋic tai tâpirihec juhuc wiac gâcne bocjaha ebac ewec. E Moabi ŋic momori wânʒâŋ jajahec jofawec. Erâ sinou wahahuc fowec dameŋ ira hurâ laioŋ moc nombâŋko hurâ domaha honerâ qâhâmowec.
21Erâ Aigita ŋicsaric moc qâhâmowec wâc. Aigita ŋic e sându bajuwec â Benaja e ine tubac sawa barâ rawec. Eme ra Aigita ŋic bâfuarâ sându bajuwec i jâcc rorâ e jahacne sânduzia âke hâmowec.
22Jojada ŋokâ‐ticne Benaja e wiac iŋuc ehuc micne 30 jaŋerao ʒuhuckerâ ʒâŋe biŋe sâkohec ewec.
23Iŋuc eme Dawidizi momori fuŋfuŋfâcne jaŋere micne âkendâŋnewec. Ehame ŋic jahec â moc jaŋere sâc ine sifu mi bâfuawec.
24Erâ Joabe ɋaticne Asahele e ŋic 30 jaŋeraonec moc. Erâ gâcne jaŋere ʒâŋe ine ʒiŋuc: Betelehem haeonec Dodore ŋokâ Elihanaŋ.
25Â Haroda haeonec Sama â Haroda haeonec jaha ŋic moc ʒâŋene Elika.
26Erâ Palati ŋic moc ʒâŋene Helezi â Tekoa haeonec ŋic moc ʒâŋene Ikesi ere ŋokâ Ira.
27Erâ Anatoti haeonec Abieʒe â Husaŋic Mebunai.
28Erâ Ahohi ŋic Zalimoŋ â Netofa haeonec Maharai.
29Erâ Netofa haeonec jaha ŋic moc ʒâŋene Bana ere ŋokâ Helebe â Gibea haeonec Benjamiŋ ŋic moc ʒâŋene Ribai ere ŋokâ Itai.
30Erâ Piratoŋ haeonec Benaja â Gasi opâonec Hidai.
31Erâ Arobati ŋic Abi‐Aboŋ â Bahurim haeonec Aʒamaweta.
32Erâ Salaboŋ haeonec Eliaba, e Jaseŋ ŋokâfâc‐ticne jaŋeraonec â Jonataŋ.
33Erâ Harari ŋic Sama â Harari ŋic jaha ʒâŋene Sararire ŋokâ Ahiam.
34Erâ Maka haeonec ŋic moc ʒâŋene Ahasibai ere ŋokâ Elifele â Ahitofe ŋokâ‐ticne Giloni ŋic Eliam.
35Erâ Karamele haeonec Hezero â Aribi ŋic Parai.
36Erâ Zoba haeonec ŋic moc ʒâŋene Nataŋ ere ŋokâ Igali â Gadeŋic Bani.
37Erâ Amoŋŋic Zeleke â Beroti haeonec Naharai. E Zeruja ŋokâ‐ticne Joabere maro bapa juwec.
38Erâ Itiri ŋic Ira â Itiri ŋic jaha Garebe.
39Erâ Hitiŋic Uria. Ʒare‐jeŋic qâqâhâc 37 ewec.
