Zəbur 49:1-7

¹Musiqi rəhbəri üçün. Qorah övladlarının məzmuru. Siz, ey bütün xalqlar, Bunu dinləyin! Ey dünya sakinləri,

²Ey sadə insanlar, əsilzadələr, Ey zənginlər, fəqirlər, Hamınız qulaq asın!

³Dilimdən hikmətli sözlər çıxacaq, Bu müdrik fikirlər qəlbimdən gəlir.

⁴Bu məsəllərə qulaq asacağam, Bu müəmmamı mən lira ilə açacağam:

⁵Niyə yaman günlərdən, Ətrafımda məni təqib edənlərin pis niyyətindən qorxum?

⁶Onlar var-dövlətlərinə güvənirlər, Bol sərvətləri ilə öyünürlər.

⁷Amma kimsə öz ömrünü satın ala bilməz, Həyatının haqqını Allaha ödəyə bilməz.