San Lucas 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹AYO nae estaba jijijot y jaanin y guipot y pan ni taelibadura, ni mafanaan pascua.

²Ya y magas mamale yan y escriba sija maaliligao jaftaemano para umapuno güe; lao manmaañao ni y taotaosija.

³Ya jumalom si Satanas gui as Judas y apeyiduña Iscariote, uno gui numerou y dose.

⁴Ya maposgüe, ya manguentos yan y magas mamale, yan y manmagas, jafataemano para uinentrega guiya sija.

⁵Ya ninafanmagof, ya matratos na umanae salape.

⁶Ya manpromete ya jaaliligao lugat para uqueentrega guiya sija, yanguin manaegüe y linajyan taotao.

⁷Ya mato y jaanin y taelibadura na pan, anae nesesita umaofrese y pascua.

⁸Ya jatago si Pedro yan Juan, ilegña: Janao ya innalisto y pascua para jita, para utafañocho.

⁹Ya sija ilegñija nu güiya: Mano malagomo nae innalisto?

¹⁰Ya ilegña nu sija: Estagüe, anae manjalom jamyo gui siuda, infanasoda güije yan un taotao, na mañuñule un jarran janom; dalalaque güe jalom mano na guma nae jumalom.

¹¹Ya inalog ni y gaéguima: Y Maestro ilegña nu jago: Manggue y aposento anae para juchocho gui pascua yan y disipulujo sija?

¹²Ya infanfinanue ni y dangculo na aposento gui sanjilo todo cabales: ayonae innalisto.

¹³Ya manjanao ya masoda jaftaemano y mansinangane sija; ya manalisto para y pascua.

¹⁴Ya anae mato y ora, matachong papa mañija yan y dose na apostoles.

¹⁵Ya ilegña nu sija: Jagasja juguefdesea na utafañocho guine na pascua antes di jufamadese:

¹⁶Sa jusangane jamyo: Ti juchocho mas, asta qui macumple gui raenon Yuus.

¹⁷Ya juresibe y copa ya janae grasia, ya ilegña: Chule este, ya infanafacae entre jamyo:

¹⁸Sa jusangane jamyo na ti juguimen otro biaje ni y tinegcha ubas, asta qui ufato y raenon Yuus.

¹⁹Ya jachule y pan, ya anae janae grasia, jaipe, ya janae sija, ilegña: Este y tataotaojo, ni y manmanae jamyo: fatitinas este para injajasoyo.

²⁰Taegüijeja locue y copa, anae munjayan mañena ilegña: Este na copa y nuebo na trato gui jâgâjo, ni y machuda pot jamyo.

²¹Lao estagüeja y canae y umentregayo na jumajame gui lamasa.

²²Ya magajet na y Lajin taotao ujanao, ni y esta manfagpo, lao ay ay ayo na taotao uinentrega!

²³Ya jatutujon manafaesen entre sija, jae guiya sija ufinatinas este.

²⁴Ya guaja locue inaguaguat guiya sija, jaye umasdangculo.

²⁵Ya ilegña nu sija: Y ray y Gentiles, jafatitinas minagas gui jiloñija; ya ayo y fumatitinas ninasiña gui jiloñija, manmafanaan manmauleg na taotao.

²⁶Lao ti infanaegüenao: sa jaye y mas dangculo guiya jamyo, ufamataegüije y mas diquique; ya y magas, ufamataegüije y mañeñetbe.

²⁷Sa cao dangculoña, ayo y matatachong chumocho, pat ayo y mañeñetbe? ti ayo y matachong chumocho; lao guajo gaegue gui entalonmiyo taegüije ayo y mañeñetbe.

²⁸Jamyo ayo sija y sumisigueja mangachongjo gui tentasionjo.

²⁹Ya juaregla un raeno para jamyo, taegüije y as Tata ni y jaaregla y raeno para guajo.

³⁰Para infañocho yan infanguimen, gui lamasajo gui raenoco; ya infanmatachong gui trono sija ya injisga y dose na tribo guiya Israel.

³¹Simon, Simon, estagüe, si Satanas, na malago nu jago para unquinila gui coladot taegüije y trigo;

³²Lao guajo tayuyute jao, para chaña fafatta y jinengguemo: ya yanguin umabira jao, nafanfitme y mañelumo.

³³Ya ilegña nu güiya: Señot, estayo listo para judalalag jao para y catset yan para y finatae.

³⁴Ya ilegña: Jusangane jao Pedro, na ti uoo y gayo pago na jaane, antes di undagueyo tres biaje na guinin untungoyo.

³⁵Ya ilegña nu sija: Anae jutago jamyo sin botsa, yan sin maleta, yan sin sapatos, guaja fattanmiyo? Ya ilegñija: Taya.

³⁶Ayonae ilegña nu sija: Lao pago, y gaebotsa, uchuleja, yan taegüenaoja locue y maleta: ya jaye y taya espadaña, ubende y magaguña ya ufamajan uno.

³⁷Sa jusangane jamyo, na este y esta matugue, nesesita na umacumple guiya guajo: Ya matufong gui entalo y manaelaye sija: sa y güinaja sija pot guajo, umanafanfagpo.

³⁸Ya ilegñija: Señot, estagüeja dos na espada. Ya ilegña nu sija: Esta najong.

³⁹Ya jumuyong, ya mapos, taegüijeja y costumbreña, para y egso Olibo; ya matatiye locue ni y disipuluña.

⁴⁰Ya anae mato gui lugat, ilegña nu sija: Fanmanaetae, ya chamiyo fanjajalom gui tentasion.

⁴¹Ya sumuja guiya sija, gui un inagüit acho; ya dumimo, ya manaetae,

⁴²Ylegña: Tata, yanguin malago jao, nasuja guiya guajo este y copa: lao munga mafatinas y malagojo, lao y malagomo.

⁴³Ya finatoigüe güije un angjet guinin y langet, ya ninametgot.

⁴⁴Ya anae estaba umagoninias, mas fejman manaetae: ya y masajalomña taegüije y mandangculo na gotan jâgâ, mamopodong papa gui eda.

⁴⁵Ya anae cajulo guinin manaetae, ya mato gui disipuluña, jasoda na manmamaego sa mantriste,

⁴⁶Ya ilegña nu sija: Jafa na manmamaego jamyo? fangajulo ya infanmanaetae, sa noseaja infanjalom gui tentasion.

⁴⁷Ya mientras cumuecuentos, estagüe un manadan taotao, yan ayo y mafanaan si Judas, uno gui dose, na mafona gui menanñija, ya jumijijot gui as Jesus para uchico.

⁴⁸Lao si Jesus ilegña nu güiya: Judas, pot un chicoja na unentrega y Lajin taotao?

⁴⁹Ya anae malie, ni ayo sija y mangaegue gui oriyaña, jafa ujuyong, ilegñija: Señot, intaga ni y espada?

⁵⁰Ya uno guiya sija jataga y tentago y magas mamale, ya jautut y agapa na talangaña.

⁵¹Ya manope si Jesus ilegña: Polo este esta. Ya japacha y talangaña, ya janamagong.

⁵²Ayonae ilegña si Jesus ni y magas mamale, yan y capitan sija gui templo, yan y manamco sija ni y manmato guiya güiya: Manmato jamyo yan espada yan galute, taegüije y contra y saque?

⁵³Anae estaba manjijitaja cada jaane gui templo, taya nae inestira y canaenmiyo contra guajo: lao este oranmiyo, yan y ninasiñan jinemjom.

⁵⁴Ya maguot güe ya macone guato gui guima y magas mamale. Ya tinatitiyeja as Pedro lachago.

⁵⁵Ya anae munjayan matotne y guafe gui talo gui patio, ya mandaña manmatachong, matachong si Pedro gui entaloñija.

⁵⁶Ya linie ni un criada anae matachong gui ininan guafe, ya guinesatangüe, ya ilegña: Este locue na taotao manisija.

⁵⁷Ya jadague, ilegña: Palaoan, ti jutungo güe.

⁵⁸Ya anae na apmam linie ni otro ya ilegña: Mangachochongmo yuje sija? ya ilegña si Pedro: Taotao, ti guajo.

⁵⁹Ya anae malofan una ora, otro jagosasegura ilegña: Magajet na sumisija este yan ayo, sa taotao Galilea locue este.

⁶⁰Ya si Pedro ilegña: Taotao, ti jutungo jafa ilelegmo. Ya mientras cumecuentos, enseguidas umoo y gayo.

⁶¹Ya jabira güe y Señot ya jaaatan si Pedro. Ayonae jajaso si Pedro y sinangan y Señot, ni y ilegña nu güiya: Antes que uoo y gayo pago na jaane, undagueyo tres biaje.

⁶²Ya jumuyong si Pedro ya guefcumasao.

⁶³Ya y taotao sija ni gumuguot si Jesus, mabotlelea ya manalalamen.

⁶⁴Ya anae mabendas y atadogña, mafaesen ilelegñija: Sangan; jaye jao munalamen?

⁶⁵Ya megae sija na chinatfino masasangan contra guiya, manamamajlao güe.

⁶⁶Ya anae manana mandaña sija y inetnon manamco na taotao sija y magas y mamale yan y escribas: ya macone guato gui tribunatñija, ilegñija:

⁶⁷Yaguin jago si Jesucristo, sangane jam. Lao ilegña nu sija: Yaguin jusangane jamyo, ti injenggue yo;

⁶⁸Ya yaguin guajo jamyo fumaesen, ti inepeyo.

⁶⁹Lao desde pago para mona y Lajin taotao gaegue na matatachong gui agapa gui ninasiñan Yuus.

⁷⁰Ya ilegña todos: Ayonae Lajin Yuus jao? Ya ilegña nu sija: Jamyo umalog na guajo yo.

⁷¹Ayonae ilegñija: Jafa mas na testimonio tanesesita? sa tajungogja esta gui pachotña.