Sam 109:8-16

⁸Mani papaka gana sa nana tinoa, meke mani vagi hobea gana keke votiki tie sa nana tinavete!

⁹Madi eapa gedi sari nana koburu, mani naboko gana sa nana barikaleqe!

¹⁰Madi loke dia vasina, meke madi koa malaṉa gedi sari na tuna. Madi ta hadu taloa gedi koari na vetu huhuaradi pu koai rini!

¹¹Koarini pu vagi paki sa sa dia poata meke lopu boka hobe pulei sa, si madi la vagi beto pani sari doduru nana likakalae. Madi la vagi beto pani rina tie karovodi sari doduru nana vinagi koari nana tinavete!

¹²Mani loke tie va tukania si asa, meke mani loke tie tataru ni na kopuni sari na tuna pu eapadi!

¹³Madi puzulu sari doduru tutina, mani ta muliṉae palae sa pozana koasa sinage pu luli mae koa sa.

¹⁴Mani balabala vekoi e Zihova sari na kinaleadi tadi na tiatamana pukerane, meke mani lopu taleosae ni Tamasa sari na sinea tanisa tinana.

¹⁵Mani lopu muliṉi ni e Zihova sari na dia sinea, ba sari na tiedi si madi ta muliṉi palae hokara.

¹⁶Ura lopu hite koa pa nana binalabala sa tinavete tataru na vinatukana, ba ṉoṉovali sa sari na habahuala, na malaṉa, meke saripu lopu ta galagalaedi.