1Mi zama leana la koe Zihova, ura leana si Asa, na koa hola ninae rane sa Nana tataru nabuna.
2Madi zama leana pule la koe Tamasa sarini pu vata rupahi Sa pa tinasuna, gamu doduru pu ele harupu gamu Sa. Ele harupu gamu Sa si gamu koari na mia kana,
3meke turaṉa puleni gamu Sa koari popoa huporodi pa kali gasa rimata, lodu rimata, pa kali gede meke kali matao.
4Kaiqa si muliuṉu koari na vasidi kalekaleadi pa qega, meke lopu boka dogoria rini sa siraṉa la pa popoa pude la koa.
5Ovia na memeha, ke malohoro sari na dia binalabala pude koa valeana pule si arini.
6Ke tepa la koe Zihova si arini, meke va sarei Sa si arini pa dia tinasuna.
7Turaṉi Sa si arini pa keke siraṉa toṉoto, osolae kamoa rini si keke vasileana nomana pude la koa vasina.
8Madi zama leana koe Tamasa sarini, koasa Nana tataru nabuna koa rini, meke koari na tiṉitoṉa arileadi pu tavete poni ni Sa koa rini.
9Ura va napoi Sa saripu memeha, meke va deṉa ni ginani leadi Sa saripu ovia.
10Kaiqa arini si koa pa hinuporo sapu dudukurumu, ta pusi meke koa ta sigiti ni rini sari na seni.
11Koa gugua asa sina va kari rini sari na tinarae tanisa Tamasa pu Ululuna Hola, meke kilui rini sari Nana vina tumatumae.
12Ele va maboi Sa sarini koari na tinavete ṉiṉiradi; hoqa si arini meke loke tie toka ni.
13Ke tiqe tepa la si arini koe Zihova koari na dia tinasuna, meke va sarei Sa si arini.
14Turaṉa vura pule ni Sa si arini pa hinuporo sapu dudukurumuna, meke vata rupahi Sa pa dia tinapusi.
15Madi zama leana koe Zihova koasa Nana tataru nabuna, meke koari na tiṉitoṉa marilaedi pu tavete poni ni Sa koa rini.
16Ura ele huari Sa sari na sasada boronizi, meke ele mokui Sa sari na roza aeana.
17Kaiqa rini si duvili, sina koa gua koari na dia sinea na tinavete kaleadi.
18Lopu boka henai rini sari na ginani, meke tata mo pa minate si arini.
19Ke pa korapa dia tinasuna si tepa la koe Zihova si arini, meke harupi Sa pa dia tinasigiti.
20Salaṉi Sa si arini koari Nana zinama, meke va sare i Sa pa minate.
21Madi zama leana koe Tamasa si arini koasa Nana tataru nabuna koa rini, meke koari na tiṉitoṉa marilaedi pu tavete poni ni Sa koa rini.
22Madi zama leana la koa Sa koari na dia vina vukivukihi; madi tozi vura ni sari Nana tinavete pa kinera qetuqetu.
23Kaiqa arini pu tavetavete koari na vaka pa kolo, pa tinavete holuholu pa seu,
24si dogori rini sari na tinavete te Zihova, sari Nana tinavete variva magasadi koari na lamana peava.
25Ura zama mo si Asa meke ta evaṉa sa raneboṉi, sapu va puzaki sari na ololobagea pa lamana.
26Sage na gore sari na vaka koari na bogusu, gua asa ke hoke malohoro sari na dia binalabala.
27Duta ni lamae, guana tie naponapodi si arini, meke lopu hite gilania rini sa si boka tavetia rini.
28Ke tepa la koe Zihova si arini pa dia tinasuna, meke harupi Sa si arini.
29Va bulea Sa sa raneboṉi, meke va memehia sa sa kolo nakili.
30Qetu si arini, sina bule sa popoa, meke turaṉa va kamo ni Sa si arini pa hogotoana pu hiva nia rini.
31Madi zama leana koe Tamasa sarini, koasa Nana tataru nabuna koa rini, meke koari na tiṉitoṉa marilaedi pu tavete poni ni Sa koa rini.
32Madi tozi vura nia koari na kobi tinoni Sa Nana vina lavata, meke madi vahesia si Asa pa vinarigara tadi na koimata.
33Va popai Sa sari na ovuku, meke va matei Sa sari na bukaha.
34Sa popoa masuruna si iliri nia pepeso matena Sa, sina koa gua koari na kinaleadi tadi na tie pu koa vasina.
35Sa pepeso qegana si iliri nia kopi kolo Sa, meke sa pepeso popana si va vura ni bukaha.
36Vasina si veko ni Sa sari na tie oviadi, meke kuria rini sa dia vasileana.
37Lelete sarini koari na pepeso na huda vaeni, meke vua katakata si arini.
38Mana ni Sa sari Nana tie, ke podopodo va soku si arini, meke lopu hite va goregore hikare i Sa sari na dia bulumakao.
39Totoso tava kilasa, na tava kurekure sari na tie te Tamasa koarini pu ṉoṉovali, na va tasuna i, na va talotaṉi,
40si vata dogoro nia sa Tamasa sapu lopu qetu ni Sa sarini pu ṉoṉovaladi si arini, ke va muliuṉu pani Sa si arini pa qega loke siraṉana,
41ba ovulu sage ni Sa sarini pu ta ṉoṉovala, meke va toqolo va sokui Sa sari na dia tatamana guana rovana sipi.
42Dogoria rina tie toṉoto sapu gua asa meke qetu nia rini, ba sari doduru tie kaleadi si lopu hite boka zama.
43Sarini pu tumatumae si madi balabala i sari na ginugua arini, meke sa tataru nabuna te Zihova.
