1Kei Zihova, Mu avosia sa qua vinaravara, Mu avoso mae ia sa qua kinabo na tinepa atu koa Goi.
2Mu lopu koa va seu koa rau pana tasuna rau! Mu va taliṉa mae au, Mamu tuturei olaṉau pana tepa atu si rau.
3Ura korapa hola taloa guana tuṉaha sari na qua rane, meke sari na susuriqu si guana ta sulu palae pa nika.
4Ta seke va gore palae si rau, meke guana duduli sapu harahara, na hinenahena ba muliṉi nia tu rau.
5Silava sisigiti si rau, goregore hikare sa tiniqu.
6Gua tugo na kurukuru tapuru pinomodi pa qega si rau, gua tugo na duduru pa vasileana ta huarana.
7Peqa si rau, guana kurukuru pu koa eke pa batu vetu.
8Doduru totoso si ta zama ṉoṉovala si rau koari na qua kana, sarini pu va sisire nau si leve nau rini pana poza ia rini sa pozaqu.
9Pa Mua binugoro na tinaṉaziri si gania rau sa eba, napo heni nia kolomataqu mo rau sa gequ kolo napo. Ta kilu palae koa Goi si rau, meke ta veko palae hokara.
11Sa qua tinoa si guana veluvelu huporo, meke harahara guana duduli si rau.
12Ba Agoi Zihova si koa Baṉara ninae rane, meke sari doduru sinage si kaqu balabala Igo.
13Kaqu mae si Goi pude qetu nia na talotaṉa nia sa popoa Zaione, ele kamoa sa totoso pude taleoso nia si asa, hie tugo sa totoso garona.
14Ta huara si asa, ba tataru nia rina Mua nabulu sa popoa Zaione. Ta huara va inete si asa, ba talotaṉa nia rini si asa.
15Kaqu pamaṉa nia rina butubutu se Zihova, meke sari doduru baṉara pa pepeso si kaqu matagutu nia sa Mua ṉiniraṉira.
16Ura kaqu kuria e Zihova sa popoa Zaione, meke kaqu vata dogoro si Asa pa Nana ṉinedalana.
17Kaqu avosi Sa sari na Nana tie malaṉadi, meke kaqu va avosi Sa sari na dia vinaravara.
18Mamu kubere gore ni gua sapu evaṉi e Zihova pude tadi na sinage mae hire, pude saripu lopu ele podo ba kaqu vahesia se Zihova pana podo si arini meke tiroi.
19Doṉo gore mae se Zihova pa Nana vasina hopena panaulu; koa pa Maṉauru si Asa meke doṉo gore mae pa pepeso,
20pude avosia sa sinilava tadi na tie ta pusidi, pude vata rupahi saripu ta pitu pude mate.
21Meke sa Pozana e Zihova si kaqu ta tozi vura pa Zaione; meke kaqu tavahesi si Asa pa Zerusalema,
22pana varigara sari na binaṉara na butubutu meke vahesia se Zihova.
23Tava malohoro si rau koe Zihova totosona korapa na tie vaqura si rau; va papakia Sa sa qua tinoa.
24Gua asa ke zama si rau, “Kei Zihova, Mu lopu vagi pania sa qua tinoa sipu korapa ṉiṉira si rau. Kei Zihova, Agoi si toa hola ninae rane.
25Pukerane hola tu ele kuria Goi sa kasia popoa, meke pa Limamu soti si ele kuria Goi sa maṉauru.
26Kote murimuri palae si arini, ba Agoi si koa hola ninae rane; kaqu ṉoreṉore guana poko si arini. Kaqu hobei Goi guana hobe poko, meke kaqu murimuri palae si arini.
27Ba Agoi si koa kekeṉoṉo mo ninae rane, meke loke kokoina sa Mua tinoa.
28Sari na tumami si kaqu koa tava sare, meke sari na tudia si kaqu koa tava sare pa kauruna sa Mua kinopu pa kenumu Goi.”
