1(Keke kinera te Devita) Kei Tamasa, Mu harupau, ura ele sage kamo pa ruaqu sa kolo.
2Lodu si rau pa zemizemi, vasina loke pepeso ṉirana. Kamo la si rau pa kolo lamana, meke palekau na naqe si rau.
3Mabo qua kabo si rau, meke ele popa sisigiti sa leoqu. Podalae rida sari na mataqu pa inaqana sa qua Tamasa.
4Sarini pu kukiti hoboro nau si soku hola, hola ni sari na kalu pa batuqu. Sari na qua kana si zutu au koari na dia zinama kokoha, ṉiṉira hola sarini pu hiva va mate au. Loketoṉa si hikoa rau, ba ososo nau rini pude vala pulei sari dia tiṉitoṉa pu hikoi rau, gua si arini.
5Kei Tamasa, gilana betoi Goi sari na qua kinaleadi, meke sari na qua dinuviduvili si lopu hite paere koa Goi.
6Kei Baṉara, Zihova Tadi na Qeto Minate, madi lopu tava kurekure pa ginuaqu rau sarini pu raṉe igo. Agoi Tamasa tadi pa Izireli, maqu lopu va kurekurei sarini pu va lavatigo.
7Koa gua pa vinahesimu Goi si ta zama ṉoṉovala na tava kurekure si rau.
8Guana tie karovoqu si rau koari na turaṉaqu soti, meke guana votiki tie si rau koari na qua tatamana soti.
9Tataru sisigiti nia rau sa Mua Zelepade, ta ṉaziri nia rau gua na nika pa buloqu; meke sipu zama va kaleanigo rini si zama kaleanau tugo rini si arau.
10Sipu koa va pepekae si rau pa minadi pa ginani, si ta ṉoṉovala si rau koari na tie.
11Pana va sagei rau sari na poko tinalotaṉa sapu luluradi, si va sisire nau tu rini.
12Arau mo sa batu vivinei tadi pu habotu pa kapa siraṉa, sarini pu napo va viviri si tavete nau kera vina sisire rini.
13Ba arau si kaqu varavara atu koa Goi, kei Zihova. Kei Tamasa, pa totoso garona si mamu va tabe au koasa moatana gua sa Mua tataru nabuna, si Mu va gorevura ia sa Mua vina tatara meke harupau.
14Mu va sare au koasa pepeso kosirina, pude qu lopu mate. Mu va sare au koari na qua kana, meke koasa minate pa lamana.
15Mu lopu va malumi sari na tinasuna pude mae kuzu tamunau guana naqe; Mu lopu va malumau Goi pude lodu pa lamana, babe sa minate pude mae onolau, guana lovu.
16Kei Zihova, Mu olaṉau pa Mua tataru nabuna, pa korapa Mua tataru variva taleosae si Mamu mae toka nau.
17Mu lopu va paere pule Nigo koa sa Mua nabulu; Ura koa pa tinasuna si rau, ke Mu tuturei olaṉa mae au mo kamahire.
18Mu tuturei mae harupau, Mamu va sare au koari na qua kana.
19Gilani Goi sari na ṉinovaṉovalaqu, meke sa qua kinurekure na vina goregorequ, sari na qua kana si gilana betoi Goi.
20Sari na ṉinovaṉovala si va talotaṉia sa buloqu, ke lopu toa valeana si rau. Ronua rau sa Mua tataru, ba loketoṉa. Hataia rau sa minanoto, ba loketoṉa tugo.
21Poni nau rini na ginani variva mate pude hena ia, meke sipu memeha rau si poni nau rini sa vaeni pasana.
22Madi ṉovala pule ni teledia koari na gedi ginani, madi ta sekesekei pule ni teledia koari na dia inevaṉa vina vukivukihi.
23Madi tava behu sari na matadi, pude di lopu dodogorae. Madi tavasigiti sari na mudidi!
24Mu titisi la nia sa Mua binugoro koa rini, Mamu hadui gedi koasa Mua binugoro maṉinina osolae kamoi Goi si arini.
25Madi tava ivulu sa dia vasina pu koa ia rini; madi mate eoṉo beto sarini pu koa koari na dia ipi.
26Ṉoṉovali rini sarini pu va kilasi Goi, meke zama pesipesi rini sari na tinasigiti tadirini pu va bakorai Goi.
27Mu varitomotomoi ni Goi sari na vina kilasadi, madi lopu somana vagia rini si keke hinia koasa Mua tinaharupu.
28Madi ta huara palae pozadi si arini koasa buka tinoa; madi lopu ta kubere somana pozadi si arini koari na tie toṉoto.
29Ba arau si koa ta sigiti, meke balabala mamata, kei Tamasa, Mu toka nau, Mamu harupau.
30Kaqu kera la nia rau si keke kinera vinahesi koasa pozana sa Tamasa. Kaqu va lavatia rau si Asa pa qua zinama leana koa Sa.
31Gua asa si variva qetu koasa Tamasa, hola nia sa vina vukivukihi bulumakao babe keke bulumakao kokoreo nomana valeana.
32Sarini pu ta ṉoṉovala si kaqu dogoria sapu gua asa, meke kaqu koa qetu; gamu pu hata ia sa Tamasa si kaqu ta sovutu va ṉiṉira.
33Ura avosi e Zihova sarini pu koa pa tinasuna, meke lopu muliṉi ni Sa sari nana tie pu ta pusidi.
34Madi vahesia rina maṉauru na pepeso sa Tamasa, meke gua tugo sari na kolo lamana, meke sari doduru tiṉitoṉa toadi pu koa koarini.
35Ura kaqu harupia Tamasa se Zaione, meke kaqu kuri pulei Sa sari na vasileana nomadi pa Ziuda. Kaqu koa vasina sari na Nana tie pude tagoa sa pepeso vasina.
36Sari na tutidi ri Nana nabulu si kaqu tagoa sa vasina asa, meke sarini pu tataru nia sa Tamasa si kaqu koa vasina.
