1(Keke kinera tadi na tie pa butubutu Livae pa tutina e Kora) Nomana lavata se Zihova, meke garona tugo si pude tavahesi va ululae koasa vasileana lavata tanisa nada Tamasa, koasa Nana toqere hopena.
2Na tolavaena meke ululuna sa toqere Zaione, sa vasileana lavata tanisa Baṉara Lavata. Variva qetu si asa pa doduru kasia popoa, sa toqere Zaione te Tamasa.
3Ele vata dogoro nia Tamasa sapu Asa tu sa vinasare sapu koa pa korapana sa Nana vasileana lavata.
4Ura dotu, ele varigara sari na baṉara, pude rapatia sa toqere Zaione, gua.
5Ba sipu dogoria rini si magasa, meke tarazuzu na govete taloa si arini.
6Matagutu na neneqara si arini, gua tugo na barikaleqe pu ta sigiti koburu.
7Gua tugo na vaka si arini pu hena lamae ni na raneboṉi.
8Ele avoso nia gami gua sapu ele evaṉia e Zihova, meke kamahire si dogoro sotia gami koasa vasileana lavata tanisa nada Tamasa, sapu e Zihova Tadi na Qeto Minate, meke kaqu kopu nia na va sare ia Sa sa Nana vasileana lavata ninae rane ka rane.
9Kei Tamasa, balabala va lohi la ia gami sa Mua tataru nabuna pa korapana sa Mua Zelepade.
10Kei Tamasa, tavahesi si Goi koari na tie pa doduruna sa kasia popoa, meke avoso gilania rini sa Pozamu. Baṉara ni Goi sari na tie pa tinoṉoto;
11madi koa qetu sari na tie pa Toqere Zaione! Madi koa qetuqetu sari na tinoni pa Ziuda, sina koa gua koasa Mua vinaripitui toṉotona.
12Mi ene vari likohae nia si pa Zaione, mamu naei sari na vasina varipera ululudi koasa barana.
13Doṉo va nonogai sari na gobana, mamu viliti valeani sari na vasina ṉiṉiradi koasa sasada, pude mu boka vivinei nia koasa sinage vaqura sapu korapa ta podo mae,
14sapu e Zihova tugo sa nada Tamasa ninae rane ka rane. Asa si kaqu na nada koimata koari na rane mae hiroi.
