1(Keke kinera tadi na tie pa butubutu Livae pa tutina e Kora) Mi avoso mae ia si hie gamu doduru tinoni! Mi va taliṉa mae gamu doduru pa kasia popoa,
2gamu na tie hiteke na lavata, tagotago na habahuala!
3Kaqu zama vura nia rau sa tinumatumae pa buloqu, meke kaqu koa ia na ginilae sa qua binalabala.
4Kaqu va taliṉa la i rau sari na zinama tumatumae, kaqu va bakali rau ginuadi si arini, totoso mikemike si rau.
5Lopu kaqu matagutu si rau pa totoso tinasuna, pana vari dikue nau rina qua kana,
6sapu sari na tie kaleadi pu kalavarae puleni koari na dia tinagotago, meke va lavata puleni koari na dia likakalae sokudi.
7Lopu boka holu pule nia telena sa tie, lopu boka tabaria sa koe Tamasa sa hinoluna sa nana tinoa.
8Ura sa hinoluna sa tinoa tana tie si noma sisigiti, meke gua sapu boka tabaria sa pude boka toa hola si asa pa pepeso si lopu garogaro.
10Gilania gita sapu sari na tie tumatumaedi ba mate tu, kekeṉoṉo gua tugo mo ari na tie duviduvilidi na tie pekipekidi. Mate luara vekoi mo rini koari na turaṉadia sari na dia tinagotago.
11Be guana ari dia pepeso soti si arini pa kasia popoa hie, gua si arini, ba sari na lovudi mo si na dia vasina soti, vasina si kaqu koa rini osolae kamoa na kamoa.
12Lopu boka govete nia keke tie sa minate, ura kaqu mate gua tugo ri na kurukuru si asa.
13Ba be va lavati ri kaiqa si arini koari na dia zinama vinahesi puleni, ba sa lovu tu sa vinabetona sa tinoa tadirini pu kalavarae puleni pa dia tinagotago.
14Guana sipi tava nama pude mate sa dia tinoa, meke na minate tugo sa dia sepati kaqu gore toṉoto la pa lovu sarini, meke lopu sana kaqu muzi palae sa tinidia. Kote koa si arini pa popoa tadi na tie matedi seu koari na dia vetu, ba sari na tie toṉoto si kaqu koa mataqara hola koa rini.
15Ba kaqu harupu pule nia Tamasa sa qua tinoa koasa ṉiniraṉira tanisa minate.
16Mu lopu talotaṉa nia be ta evaṉae tagotago si keke tie, meke be noma hola lala nana sa nana tinagotago!
17Ura pana mate sa loketoṉa si kaqu paleke taloa nia sa pa lovu. Loke tinagotago si kaqu paleke la nia sa pa lovu.
18Be guana qetuqetu sa tie pa nana tinoa soti, meke tava lavata si asa sina koa valeana,
19ba kaqu luli la i tugo sa sari kasa tiatamana pukerane pa minate. Vasina lopu hite ta dogoro sa kalalasa.
20Lopu boka govete nia keke tie sa minate, ura kaqu mate gua tugo ri na kurukuru si asa!
