1(Keke kinera te Devita) Maqu vahesia se Zihova! Pa doduruna sa qua tinoa si maqu vahesia sa Pozana hopena!
2Maqu vahesia se Zihova pa doduruna sa buloqu! Meke maqu lopu muliṉi nia sa ninomana sa Nana tataru vatukana.
3Asa taleosoni sari doduru mia tinavete kaleadi, meke salaṉi Sa sari doduru mia minoho.
4Harupau Sa si rau pa minate, meke mana nau Sa pa Nana tataru, na tataru variva taleosae.
5Poni va soku nau Sa sari na tiṉitoṉa leadi totoso toaqu si rau, pude qu koa vaqura na ṉiṉira guana atata si rau.
6E Zihova si vilavilasa va toṉoto poni saripu ta ṉoṉovala, meke poni Sa gua sapu goto koa rini.
7Vata dogoro ni Sa koe Mosese sari Nana hiniva, meke vata dogoro ni Sa koari na tie Izireli sari Nana tinavete.
8E Zihova, si ta siṉie na tataru meke tokani na taleoso ni Sa sari na tie, meke lopu hoke tuturei bugoro si Asa, meke sa tataru lavata tanisa si koa hola doduru totoso.
9Lopu hoke zuzutu sisigiti si Asa, meke lopu kopu nia Sa sa Nana binugoro ninae rane ka rane.
10Lopu poni gita Sa sa vina kilasa sapu gua garodi ri nada sinea, babe hobe ni sari na tinavete kaleadi pu taveti gita.
11Gua sapu ululu hola nia sa Maṉauru sa kasia popoa, si gua tugo asa nomana gua sa Nana tataru koa rini pu pamaṉa nia si Asa.
12Nomana gua sa vinari seuna sa kali gasa rimata pa kali lodu rimata, si seu gua tugo asa nomana gua vasina vekoni Sa sari na nada sinea.
13Gua sapu tataru ni na va tuka ni sa tamana sari nana koburu, si gua tugo tataru guni na va tukana guni e Zihova sarini pu pamaṉia si Asa.
14Ura gilania Sa sa kinurida gita, lopu muliṉi nia Sa sapu ta tavetae pa pepeso mo si gita.
15Ura sa tinoa tadi na tie si guana duduli mo; toa meke pelara valeana guana havoro,
16ba sipu givusia si nolo taloa si asa, meke lopu ta dogoro pule vasina sotona.
17Ba sarini pu pamaṉa nia se Zihova, si tataru ni Sa ninae rane, meke sa Nana tinoṉoto si koa koari na sinage na sage,
18koa rini pu kopu nia sa Nana vinariva egoi nabuna, meke lopu muliṉi ni na va tabei sari Nana tinarae.
19E Zihova si va turua sa Nana habohabotuana Baṉara pa Maṉauru, meke Baṉara ni Sa sari doduru Nana vina podaka.
20Mi vahesia se Zihova, gamu doduru mateana ṉiṉiramia, pu va tabei sari Nana tinarae, meke va avosi sari Nana zinama.
21Mi vahesia se Zihova, gamu doduru pu tago ṉiniraṉira pa Maṉauru; gamu na Nana nabulu pu evaṉi sari Nana hiniva!
22Mi vahesia se Zihova, gamu doduru Nana tiṉitoṉa toadi pa doduru vasina pu baṉara ni Sa. Maqu vahesia rau se Zihova pa doduruna sa buloqu.
