1(Sari na Sam 120-134 si hoke kerani rini totoso sage la pa Zerusalema si arini pude somana pa vinahesi.) Pa qua tinasuna si tepa la tinokae si rau koe Zihova, ke toka nau Sa.
2Mu harupau Zihova, koari na tie marikokohadi, na sekesekeidi.
3Gamu kasa na tie marikokoha mia, na sa si kaqu taveteni gamu Sa si gamu?
4Kaqu ta gonae tupi ṉarudi tadi na tie varipera, meke ta kina motete leradi si gamu!
5Pude koa somanae koa gami, si kaleana hola nia pude koa turaṉae koari na tie pa Meseki, babe koari na tie pa Kedara.
6Ele seunae hola koa somanae si rau koari na tie pu kukiti nia sa binule.
7Sipu tozi ni rau sari na tie pude koa bule, sa vinaripera tu si hiva nia rini.
