1Vegua, vilavilasa valeana tugo si gamu na tie varipitui? Varipitui va toṉoto ni tugo gamu sari na tie?
2Lokari! Tale na kinaleadi mo pu boka taveti gamu si balabala i gamu, meke variva mate si gamu pa popoa pu koa ia gamu.
3Sari na tie kaleadi si tale tavete va sea mo doduru totoso pa dia tinoa, sipu podo rini si podalae kokoha dia mo.
4Gua tugo na noki poizini si arini. Lopu va tabea rini sa Tamasa gua tugo sari na noki pu tukui sari na taliṉadia,
5pude lopu va avosia sa kinera tanisa tie pu kopu ni.
6Kei Tamasa, Mu pako pani livodi sari na tie kaleadi sara, saripu guana laione. Zihova, Mu unusu pani sari na livo nomadi pa ṉuzudi sarini pu guana laione vaqura.
7Madi totolo palae guana kolo pu murimuri palae si arini. Madi ta neti va munala umumu gedi si arini guana duduli pa siraṉa.
8Madi popa meke murimuri taloa gua tugo na suloko si arini, madi mate va kenue gua tugo na koburu haha pu podo mate sapu lopu hite dogoria sa kalalasana sa rimata.
9Totoso lopu ele hite gilania keke toṉa rini, si ta seke palae guana duduli si arini. Kaqu ivu pani Tamasa si arini pa Nana tinaṉaziri, sipu korapa toadi rini!
10Sari na tie toṉoto si kaqu qetuqetu pana dogori rini sapu tava kilasa sari na tie kaleadi. Kaqu la neti si arini koari na eharadi rina tie kaleadi.
11Kaqu zama sari na tie, “Uve, hinokara, na koa nana tugo sa pinia tadi na tie toṉoto, meke hinokara sapu koa nana tugo si keke Tamasa sapu varipitui nia sa kasia popoa,” gua.
