SALMOS 109:8-16

⁸Nimitztajtanía para inemilis nocualancaitaca ma amo huejcahua ipan ni taltipacti. Huan seyoc tacat ma quichihua nopa tequit cati yaya quichihuayaya.

⁹Iconehua ma mocahuaca icnotzitzi huan isihua ma mocahua icnotzi.

¹⁰Iconehua ma monejnencaquixtica huan ma motaejehuijtinemica. Ma quitemoca tacualisti huejca ten ininchaj cati ya tamisosolijtoc.

¹¹Ma quitamitacuijcuilica cati quitatanejtiyayaj, huan cati seyoc tali ehuani ma quiquixtilica nochi cati quitantoc ica itequi.

¹²Amo aqui ma quipalehui ica yon se tamanti huan amo aqui ma quintasojta iconehua cati icnotzitzi.

¹³Ma miquica nochi iconehua. Ma tamiixpolihuica huan ayecmo aqui ma quielnamiqui inintoca.

¹⁴TOTECO, amo xiquelcahua nochi inintajtacolhua itatahua huan inanahua. Huan amo xiquintapojpolhui.

¹⁵Ma mocahua inintajtacolhua moixpa, TOTECO, pero ayecmo aqui ma quinelnamiqui nopa masehualme ipan ni taltipacti.

¹⁶Pampa inijuanti amo quinejque quipalehuise inihuampo. Nojquiya quinquixtijque cati teicneltzitzi huan quinmictijque cati motequipachohuayayaj.