1Aria mada zama leana la koe Zihova, ura na leana si Asa; meke sa Nana tataru nabuna si koa hola ninae rane!
2Madi zama guahe sari na tie Izireli, “Sa Nana tataru nabuna si koa hola ninae rane.”
3Madi zama guahe sa butubutu te Eroni, “Sa Nana tataru si koa hola ninae rane.”
4Sarini pu pamaṉa nia se Zihova si madi zama guahe, “Sa Nana tataru nabuna si koa hola ninae rane.”
5Pa korapa qua tinasuna si tepa la si rau koe Zihova; olaṉia Sa sa qua tinepatepa meke vata rupahau Sa.
6Koa somana koa rau se Zihova, ke lopu matagutu si rau, gua asa, ke loke tie si boka va tasuna au.
7Koa tata koa rau se Zihova pude toka nau, ke kaqu koa mataqara si rau koa rini pu kukiti nau.
8Leana hola si pude koa aqorae koe Zihova, ba lopu pude raṉeraṉe la pa tie mo.
9Leana hola si pude koa aqorae koe Zihova, ba lopu pude raṉeraṉe la koari na koimata mo pa pepeso.
10Soku koari na qua kana pa votiki butubutu si mae varidikue nau, ba pa korapa ṉiniraṉira te Zihova si ele va mate betoi rau si arini.
11Koa pa vari likohaequ rau si arini, ba pa korapa ṉiniraṉira te Zihova si ele va mate betoi rau si arini!
12Rovana mae au rini si rau, guana zipale, guana nika huruṉuna sapu sulu pani sari na duduli popadi, ba pa korapa ṉiniraṉira te Zihova si ele va mate betoi rau si arini!
13Ele ta zukuru va kaleana si rau meke tata tava kilasa, ba toka nau e Zihova.
14E Zihova si poni nau sa ṉiniraṉira, ke kerakera si rau, ele harupau Sa si rau.
15Avoso la tu pa ipi tadi na tie te Tamasa, korapa iraṉa qetuqetu guahe: “Sa lima heheda te Zihova si va mataqara gita.
16Tava ovulu sage sa lima mataona e Zihova, sa Nana ṉiniraṉira lavata pa vinaripera!”
17Lopu kaqu mate si rau, ba kaqu toa meke tozi vura nia gua sapu evaṉia e Zihova.
18Ele va kilasau e Zihova si rau, ba lopu va mate au Sa.
19Tukele poni nau sari na sasadana sa Zelepade, pude qu nuquru la, maqu zama leana koe Zihova.
20Hiera tugo sa sasada te Zihova; ari na tie toṉoto mo si boka nuquria si asa.
21Zama leana si rau koa Goi Zihova, sina ele avosau Goi, sina ele harupau Goi.
22Sa patu sapu kilua rina tie kuri vetu, si asa tugo si arileana hola koari doduru patu.
23Sa tinavete te Zihova hie si variva magasa hola tugo koa gita!
24Hie tugo sa rane mataqara te Zihova, aria mada varigara qetuqetu nia.
25Mu harupu gami Zihova, Mu harupu gami! Kei Zihova, Mu va boka gami pa mami tinavete!
26Mani mana nia Tamasa si asa pu nuquru mae pa korapa pozana e Zihova! Gami pu koa pa Zelepade te Zihova si manani gamu si gamu.
27E Zihova sa Tamasa, ele tavete valeana mae koa gita si Asa. Taṉini pa limamia sari na lelaṉa huda, mamu ene va tokele sage la koasa hope pa Zelepade.
28Agoi sa qua Tamasa, ke maqu zama leana atu koa Goi. Agoi sa qua Tamasa, ke maqu va lavatigo.
29Aria mada zama leana la koe Zihova, ura na leana si Asa, meke sa Nana tataru nabuna si koa hola ninae rane ka rane!
