1(Keke kinera te Devita) Qua Tamasa, qua Tamasa, na vegua ke veko pani au tu Goi? Tepa hata sisigitia rau sa tinokae, ba lopu vagia rau.
2Qua Tamasa, pana rane si varavara atu si rau, ba lopu olaṉau Goi. Tepatepa atu si rau pana boṉi, ba loke minanoto si vagia rau.
3Ba na Baṉara Hopemu si Goi, pu tavahesi koari na tinoni Izireli.
4Sari na tamamami pukerane si kalavarae koa Goi; raṉe Igo rini si Goi, ke ele harupi Goi si arini.
5Tepa atu koa Goi si arini, meke tava sare pa tinasuna, kalavarae koa Goi si arini, ke lopu tava kurekure.
6Na loke laequ hokara guana uloso mo si rau, ta ṉoṉovala meke ta hakohakoe si rau koari na qua kana.
7Sari doduru pu dogorau si va sisire nau, na pesipesi va kaleanau rini na qenoqeno batudi.
8“Dotu, kalavarae si asa koe Zihova,” gua si arini. “Ba venagua ke lopu harupia tu e Zihova si asa? Be guana qetuqetu nia e Zihova si asa si mani va sarea tu,” gua si arini!
9Ba Agoi tugo si va podo vura au pa tiana sa tinaqu, meke Agoi tugo kopu nau na va sare au totoso haha si rau.
10Podalae guatu podo rau si kalavarae atu mo koa Goi, meke Agoi mo sa qua Tamasa doduru totoso.
11Mu lopu koa va seu koa rau, ura tata mae sa tinasuna koa rau, meke loke tie si koa pude toka nau.
12Soku sari na kana pu koa varidikue nau, guana bulumakao kokoreo, kekeṉoṉo gua na bulumakao variva matedi pa popoa Basani.
13Zama ṉoṉovala au rini guana laione pu va ṉaṉari rini sari na ṉuzudi, pu kurumu aqa pude garatau.
14Malohoro sa tiniqu, ta zoropo palae sa qua ṉiniraṉira guana kolo, sari doduru vinari hodae susuriqu si zokezoke beto, lodu mate pa tinalotaṉa sa buloqu.
15Loke qua ṉiniraṉira guana keke bele raro patu popana, sa meaqu si napiti pa damaqu; veko pani au Goi pa vasina tana minate.
16Mae vari likohae nau na puku tie kaleadi; kekeṉoṉo guana rovana siki variva matedi si arini. Pokai rini sari na limaqu meke nenequ.
17Boka naei mo rau sari doduru susuriqu; doṉo toto mae au rina qua kana.
18Vari hiani meke vari mudumudukeda ni rini sari qua poko.
19Kei, Zihova, Mu lopu koa va seu koa rau; Mu tuturei mae va sareau.
20Kei, Zihova, Mu va sareau koasa magu varipera, Mu harupia sa qua tinoa koasa ṉiniraṉira tadi na tie kaleadi, pu guana siki variva matedi.
21Mu va sareau koasa ṉiniraṉira tadi na qua kana pu guana laione, meke gua ri na kikihodi rina bulumakao kokoreo.
22Kaqu tozi vura nia rau sa Pozamu koari na turaṉaqu, kaqu vahesigo rau pa vari korapana sa vinarigara tadi na tinoni.
23Mi vahesia si Asa, gamu pu pamaṉa nia se Zihova. Mi va lavatia si Asa, gamu na tutina e Zekopi. Mi va ululia sa pozana Sa, gamu na tutina Izireli!
24Lopu etuli Sa sari na habahuala, babe muliṉini sari na dia tinasigiti. Meke lopu va mudi pani Sa, ba olaṉi Sa sari na dia tinepatepa la koa Sa.
25Pa korapana sa vinarigara vinahesi tadi doduru tie te Tamasa si kaqu vahesigo rau koa gua rina Mua tinavete. Pa kenudi rina tinoni pu va tabe igo si kaqu taveti rau sari doduru pu ele va tatara nigo rau.
26Sari na habahuala si kaqu tava deṉa valeana, arini pu hata ia se Zihova si madi vahesi zoṉazoṉa ia, madi toa hola ninae rane ka rane.
27Doduru butubutu si kaqu balabala ia se Zihova, arini pa hopeke kukuruna sa kasia popoa si kaqu kekere la koa Sa, meke sari doduru votivotiki butubutu tie si kaqu vahesia si Asa.
28Sa ṉiniraṉira tana binaṉara si te Zihova tugo. Baṉara ni Sa sari doduru butubutu.
29Sari doduru tie ravutudi pa kasia popoa si kaqu todoṉo meke vahesia si Asa. Sari doduru pu gore la pa minate si kaqu hoqa todoṉo pa kenuna Sa, sari doduru pu lopu boka toa hola pa pepeso.
30Sari na sinage vugo repere si kaqu nabulu nia se Zihova. Meke kaqu totozia rina tie guguana sa Baṉara koasa sinage pu luli mae.
31Sarini pu lopu ele podo ba kaqu ta totozi nia tugo pana podo rini sapu e Zihova sina tinaharupu tadi na tie!
