1Mi vahesia se Zihova, mi tozi vura nia sa Nana vina lavata, tozi koari doduru butubutu sari Nana tinavete.
2Kera la koe Zihova, mi kera vahesia si Asa; tozi vura ni sari doduru Nana tinavete variva magasadi!
3Mada qetu nia sapu Tanisa si gita, madi koa qetu sarini pu vahesia si Asa.
4La hata ia sa tinokae koe Zihova, hata lamo ia sa minana Tanisa.
5Mi balabala i sari na tinavete marilaedi pu taveti Sa, meke sari Nana tinavete variva magasadi, na vinaripitui pu evaṉi Sa.
6Gamu na tutina e Ebarahami, sa Nana nabulu; meke gamu na tuna e Zekopi, sapu ta vizata mia,
7e Zihova sa nada Tamasa si Asa, sari na Nana tinarae si tana doduru kasia popoa.
8Kaqu kopu nia Sa sa Nana vinariva egoi nabuna ninae rane. Sari na Nana vina tatara si tadi na tina sinage.
9Kaqu kopu nia Sa sa Nana vinariva egoi koe Ebarahami, meke sa Nana vina tatara koe Aisake.
10Ele va tatara nia Zihova si keke vinariva egoi koe Zekopi, sapu kaqu koa hola ninae rane.
11Zama si Asa, “Kaqu ponigo Rau sa popoa Kenani, kaqu na mua tinago soti si asa,” gua sa Tamasa.
12Lopu soku sari na tinoni te Tamasa, meke na tie karovodi si arini pa popoa Kenani.
13Ene varikarovae popoa mo si arini, taluarae pa keke popoa, meke la pa keke popoa pule, gua mo.
14Ba lopu va malumi Tamasa sari na votiki butubutu pude ṉoṉovali si arini. Kopu ni Sa si arini, meke va balau i Sa sari na baṉara.
15“Mu lopu tiqu la i sari na Qua nabulu ta vizatadi, lopu taṉini sari na Qua poropita!” gua si Asa.
16Va mae ia e Zihova sa soṉe pa popoa, meke va papakia Sa sa ginani.
17Ba ele garunu va kenue la nia Sa si keke tie, se Zosepa, sapu ta holuholue pude na pinausu.
18Ta pusie seni sari na nenena, meke ta paku aeana sa ruana,
19osolae tava gorevura sapu gua koroto nia sa, tava sosode pa Nana zinama e Zihova sapu toṉoto se Zosepa.
20Ke va vuraia sa baṉara pa Izipi si asa pa vetu varipusi, meke vata rupahia sa.
21Vata evaṉae nia koimata sa si asa pa nana qinavuna, meke ponia sa sa ṉiniraṉira pude koa totoli nia sa doduruna sa popoa Izipi,
22meke sari nana ṉati tie tavetavete, meke pude va tumatumaei sari nana tie totoli.
23Meke rizu la pa Izipi se Zekopi, meke koa vasina.
24Meke va sokui lala nana e Zihova sari Nana tie, meke va ṉiṉirai Sa, hola ni sari na dia kana.
25Hobei e Zihova bulodi sari na tie Izipi, pude kukiti ni sari Nana tie pu nabulu nia si Asa, ke ṉoṉovali rini sari na tie Izireli.
26Beto asa si garunu la nia Sa se Mosese sa Nana nabulu, meke se Eroni sapu ele vizatia Sa.
27Tavete vura ni rini sari na vina gilagila pa varikorapadi rina tinoni, meke sari na tinavete variva magasadi pa popoa Izipi.
28Va huporo dudukukuru mia Tamasa sa popoa, ba korodia va tabea tugo rina tie Izipi sa Nana zinama.
29Iliri ni ehara Sa sari na dia ovuku, meke va mate betoi Sa sari na dia igana.
30Va siṉi nia bakarao Sa sa doduruna sa dia popoa, kamo tu pa korapana sa vetu baṉara ba koa ia tugo bakarao.
31Zama mo sa Tamasa meke omunu la mo sari doduru dodoa na nikuniku pa doduruna sa popoa Izipi.
32Va raza la i tugo Sa sari na ruku aesi, meke na kapi si malara la pa doduruna sa popoa.
33Va mate pani Sa sari na dia ṉati vaeni meke sari na vuadi, meke sari na dia huda piqi, meke va kaleana betoi Sa sari doduru dia hudahuda.
34Zamai Sa sari na kupokupo, ke omunu la si arini, soku vuro tina meke lopu boka ta nae.
35Gani rini sari doduru linetelete pa pepeso; gani rini vuadi sari doduru vuvua pa inuma.
36Va mate pani Sa sari na tudia koreo kenudi rina tatamana pa popoa Izipi, saripu podo kekenudi koarini.
37Beto asa si turaṉa vura ni Sa pa Izipi sari na tie Izireli; paleki rini sari na dia siliva na qolo, toa valeana na ṉiṉira si arini.
38Matagutu ni rina tinoni pa Izipi sari na tie Izireli, ke totoso taluarae taloa rini, si qetu sari na tie Izipi.
39Va aqori Sa si arini pa opo adumuna keke lei, meke turaṉi Sa si arini panaboṉi pa kalalasana keke nika.
40Tepa ginani si arini, ke ponini Sa sari na kurukuru tapuru, pozana kueli, meke na ginani pu hoqa gore mae pa maṉauru ke deṉa si arini.
41Va puzaka vura ia Sa pa patu sa kolo, meke totolo guana leana pa qega.
42Balabala pulea Sa sa Nana vina tatara madina koe Ebarahami, sa Nana nabulu.
43Gua asa ke turaṉa vura ni Sa pa Izipi sari Nana tie ta vizatadi, meke kera na kukili si arini pa dia qinetuqetu.
44Poni Sa koarini sari na pepeso tadi na votiki butubutu, meke vala i Sa koa rini sari na inuma na vuvua tadi na votiki tie,
45pude madi va tabei ri Nana tie sari Nana tinarae, meke sari doduru Nana ginarunu. Mi vahesia se Zihova!
