1Kei Zihova, koa Goi mo si kaqu ta vatu sa vina lavata na vinahesi; koa Goi mo, ba lopu koa gami, sina koa gua koasa Mua tataru meke kopu ni Goi sari na Mua zinama.
2Na vegua ke zama sari na butubutu huporo, “Avei sa mia Tamasa?” gua.
3Sa nada Tamasa si koa pa maṉauru, meke taveti Sa gua saripu hiva ni Sa.
4Sari na tamasa tadi na butubutu huporo si ta tavetae siliva na qolo, sapu ta tavete pa limadi rina tie mo.
5Ari ṉuzudi si arini, ba lopu boka zama, ari matadi, ba lopu dodogorae.
6Koa dia taliṉadi, ba lopu boka avavosae, koa dia isudi, ba lopu boka va humaṉa.
7Ari limadi, ba lopu boka taṉitaṉini, koadia nenedi, ba lopu boka ene, meke lopu boka va vura mamalaiṉi si arini.
8Madi koa gua tugo asa sarini pu tavetedi sarini, meke sari doduru pu kalavarae koa rini.
9Kei, gamu na tie Izireli, mi kalavarae koe Zihova! Asa sa mia lave meke na mia tinokae.
10Gamu na hiama na butubutu te Eroni, mi kalavarae koe Zihova! Asa sa mia lave meke na mia tinokae.
11Gamu pu pamaṉa nia se Zihova, mi kalavarae koa Sa! Asa sa mia lave meke na mia tinokae.
12Lopu kaqu hite muliṉi ni gita e Zihova si gita na tie Izireli, meke kaqu manani gita Sa, meke sari doduru hiama te Tamasa.
13Kaqu mana ni Sa sari doduru pu pamaṉa nia si Asa, hiteke na lavata.
14Kaqu va soku lala i Nana E Zihova sari na tumia, gamu meke sari na tutimia.
15Mani manani gamu e Zihova, Asa sapu tavetena sa Maṉauru meke sa pepeso.
16Sa Maṉauru si te Zihova, ba sa kasia popoa si ele vala nia Sa pa tie.
17Sari na tie matedi si lopu boka vahesia se Zihova, meke sarini pu ta pomunae.
18Ba gita na tie toada si mada vahesia se Zihova, podalae kamahire meke lopu makudo ninae rane ka rane! Vahesia se Zihova!
