1Pemume'u Tupàn Tuweharupi Wiko Ma'e hemimur kwer ikatu haw izupe nehe. Uhua'u haw pemume'u nehe. Pemume'u hemiapo kwer teko ywy nànànar wanupe nehe.
2Pezegar Tupàn pe nehe. Pemuzàg zegar haw izupe ikatu haw rehe nehe. Peze'eg hemiapo kwer ikatuahy ma'e rehe nehe.
3Penurywete her ikatu ma'e rehe nehe. Tuwe Tupàn Tuweharupi Wiko Ma'e imuwete katu har paw hurywete wà nehe.
4Pekar pepytywà àwàm Tupàn inuromo nehe. Peiko inuromo tuweharupi nehe.
5Pe Àmàrààw Tupàn hemiruze'eg izuapyapyr pe, Pe Zako Tupàn hemixak kwer izuapyapyr paw pe, Pema'enukwaw Tupàn hemiapo kwer wanehe upaw rupi nehe. Uzapo purumupytuhegatu kar awer uhua'u ma'e. Uzapo purumupytuhegatu kar awer ikatuahy ma'e. Umume'u zaneàmàtyry'ymar wanehe zepyk àwàm no.
7Wiko Tuweharupi Wiko Ma'e romo Tupàn Zanezar romo a'e. Teko ywy nànànar ukwaw hemiapo putar haw wà.
8Tuweharupi ima'enukwaw putar uze'eg awer iapo katu pyrer rehe nehe. Uzapo putar wemimume'u kwer teko wanupe a'e nehe, wana'yr wanupe a'e nehe no, wana'yr wazuapyapyr wanupe a'e nehe no.
9Uzapo putar ma'e uze'egaw Àmàrààw rehe we iapo katu pyrer rupi katete nehe. Umume'uahy wemiapo ràm Izak pe. Uzapo putar a'e ma'e nehe no.
10Uzapokatu uze'egaw Zako rehe we Tuweharupi àràm a'e no.
11A'e 'ar mehe uze'eg Tupàn nezewe a'e. — Amono putar Kànàà ywy newe nehe. Tuweharupi ereiko putar izar romo nehe, i'i izupe.
12Tupàn hemiaihu naheta tete kwaw a'e 'ar mehe wà. Wiko amo ae ywy rehe arer romo ywy imume'u pyrer rehe wixe mehe wà.
13Wata oho waiko màràmàràn ywy rehe wà. Ukwaw oho waiko màràmàràn tuwihawete wapureruze'egaw wanupi wà.
14— Pezapo zo ikatu 'ym ma'e heremiaihu wanupe nehe, i'i a'e tuwihawete wanupe. Uzepyk amo tuwihawete wanehe, ta'e upuraraw kar ma'erahy hemiaihu wanupe wà xe.
15Uze'eg nezewe wanupe. — Pepokok zo heremiruze'eg heremixamixak kwer wanehe nehe. Pepuraraw kar zo ma'erahy heze'eg imume'u har wanupe nehe, i'i wanupe.
16Umur kar ma'uhez haw uhua'u ma'e ywy imume'u pyrer rehe har wanupe. Wezar wemiaihu temi'u 'ym wà.
17Na'e omono kar amo awa Zuze her ma'e a'e teko wanenataromo a'e. A'e 'ym mehe tyky'yr ume'eg Zuze uma'ereko e ma'e romo amo awa amo ae ywy rehe har wanupe wà.
18Uzàpixipixi ipy kyhàhàmtàtà pupe zemunehew paw pe imono mehe wà. Omono tàtà ma'e ita per iapo pyrer iazu'yw rehe wà.
19Umume'u Zuze uzeapo ma'e ràm a'e. Xo a'e ma'e izeapo re zo uhem zemunehew paw wi. Tupàn Tuweharupi Wiko Ma'e ze'eg wexak kar Zuze ikatu haw.
20A'e rupi Ezit ywy rehe har wanuwihawete umuhem kar Zuze zemunehew paw wi zauxiapekwer wanupe. Ywy tetea'u rehe har wanuwihawete umuigo kar imunehew pyr 'ym romo wà kury.
21Umuigo kar a'e ywy rehe har paw waneruze'egar romo. Wiko Ezit ywy rehe har paw wanuwihaw romo.
22Tuwihawete umur upuner haw Zuze pe. — Erepuner amogwer tuwihaw wanupe ma'e iapo kar haw rehe nehe, i'i izupe. — Erepuner amogwer pureruze'eg ma'e waneruze'egaw rehe nehe no, i'i izupe.
23A'e re Zako Zuze tu oho Ezit pe. Upyta a'e ywy rehe wiko pà.
24Tupàn Tuweharupi Wiko Ma'e umuzàg kar ta'yr tetea'u wemiaihu wanupe wà. A'e rupi ikàg wera'u wàmàtyry'ymar wanuwi wà.
25Uma'ereko Ezit ywy rehe har wapy'a pe. A'e rupi na'iakatuwawahy kwaw Tupàn hemiaihu wanehe wà. Umuemu'em kar Ezit ywy rehe har Izaew Tupàn hemiruze'eg wanupe wà no.
26Na'e omono kar Tupàn wemiruze'eg Moizez Ezit ywy rehe har wanuwihawete pe kury. Omono kar tyky'yr wemixak kwer Àràw hupi no.
27Uzapo purumupytuhegatu kar haw Ezit ywy rehe wà. Uzapo ikatuahy ma'e a'e pe wà.
28Na'e umupytunahy kar Tupàn ywy. Nezewe rehe we Ezit ywy rehe har nuweruzar kwaw ize'eg wà.
29Yrykawhu uzapo ma'eruwy kwer romo. Uzuka pira paw wà.
30Tynehem Ezit ywy zu'i pupe. Te tuwihawete hàpuzuhu pupe wixe wà.
31Uze'eg Tupàn wanupe. Na'e meru tetea'u a'e wà, kyw tetea'u a'e wà no, umynehem a'e ywy paw uzepupe a'e wà kury.
32Numugyr kar kwaw àmàn. Umugyr kar àmàn ita romo iapo pyrer. Uweraweraw a'e ywy rehe.
33Umumaw Tupàn uwà tyw. Ma'ywa pi her ma'e tyw umumaw no. Weityk ywyra paw wà.
34Uze'eg wi Tupàn. A'e rupi ur tukur tetea'u wà kury. Teko nupuner kwaw wapapar haw rehe wà, ta'e heta tetea'u wà xe.
35Tukur u'u ma'e itym pyrer Ezit ywy rehe har paw rupi wà. U'u temi'u ipo'o pyrer imono'og pyrer paw wà.
36— Ikatuahy zanera'yr ipy wà, i'i Ezit ywy rehe har wa'yr ipy wanehe wà. Uzuka Tupàn wana'yr ipy upaw rupi a'e wà.
37Na'e wenuhem Tupàn Izaew izuapyapyr Ezit ywy wi wà kury. Weraha Izaew parat wà. Or weraha wà no. Ikàg paw rupi wà. Na'ima'eahy kwaw wà.
38Hurywete Ezit ywy rehe har Izaew a'e wi wahem mehe wà Ta'e ukyze wanuwi wà xe.
39Tupàn umupu'àm amo ywàkun wemiaihu wa'aromo. Pyhaw tata upu'àm ma'e wexak kar waho àwàm wanupe no.
40Wenoz ma'ero'o kwer Tupàn pe wà. Umur kar pykahu zàwenugar wanupe wà. Umu'ar kar typy'ak ywak wi no. Uhyk wanupe.
41Upei'àg amo itahu. Uhem 'y itahu wi. Uwyryk ywyxiguhu rehe yrykawhu ài.
42Uzapo agwer ma'e ta'e ima'enukwaw uze'eg awer ikatuahy ma'e rehe xe. Kwehe mehe uzapokatu a'e uze'egaw wemiruze'eg Àmàrààw rehe we.
43Nezewe Tupàn wenuhem wemiaihu wemixamixak kwer Ezit ywy wi a'e wà. Uzegar a'e wi uhem mehe urywete haw rehe uhapukaz pà wà.
44Tupàn omono amo ae teko waywy Izaew wanupe. — Pepyhyk wako nehe, i'i wanupe.
45— Nezewe mehe peruzar putar heze'eg nehe, i'i wanupe. — Nezewe mehe pezapo putar heremiapo putar haw nehe, i'i wanupe. Pemume'u Tupàn Tuweharupi Wiko Ma'e ikatu haw nehe. Azeharomoete.
