1¡Le güe lá'ana Xránadxu Dios! ¡Le gucá'ana szren La Le̱'! ¡Le guzén bénneache dute̱ xe̱zr la xu ca naca da nune̱'!
2¡Le gul-la chee̱'! ¡Le gul-la da güe lá'anale Le̱'! ¡Le guchalaj chee̱ da zrente̱ ca' da nune̱'!
3¡Le be lu da naca chee̱'! Xúgute̱ benne' ca' dxelapa ba lá'ana Xránadxu dxal-la' xelebéle̱'e̱ne̱'.
4Le naba Xránadxu gácale̱ne̱' le'e. Tu zra tu zra le guxrén lazre' Xránadxu Dios.
5Le'e, zri'ine zre sua Abraham, we̱n zrin chee̱ Xránadxu. Le'e, zri'ine zre sua Jacob, bénnea' guqué̱'e̱, Le gusá lazre' xel-la' waca ca', ne da zrente̱ ca' da be̱ne̱', ne ca naca da bchi'e̱ chee̱le.
7Le̱' naque̱' Xránadxu, ne Dios chee̱dxu. Le̱' dxenná bé'ene̱' bénneache zaj zre̱'e̱ dute̱ xe̱zr la xu.
8Lácala te chee̱ chi gaxúa cuen bénneache, québequeze gal-la lazre̱' da guche̱be lazre̱' lu xel-la' wezría chee̱',
9xel-la' wezría na' bé̱nle̱ne̱' Abraham, da na' bzetaj cuine̱' guche̱be lazre̱' chee̱ Isaac,
10na' bzua chúchue̱' na ca tu da nadxixruj bea na, da gun Jacob, da gaca na tu xel-la' wezría da zeajlí canna nen benne' Israel ca',
11da be̱ne̱' gate na' gunné̱': “Chiu' lue' gunna' xe̱zr la xu chee̱ benne' Canaán ca', da gaca na tu da xudele lu na' zri'ine zre súale.”
12Gate na' bábaze zaj naque̱' gulezré̱'e̱ lu xe̱zr la xu nigá ca benne' zitu' ca',
13ne guledée̱' tu xe̱zr la xu xetú xe̱zr la xu, ne tu xe̱zre xetú xe̱zre.
14Quebe be̱' Dios lataj nu benne' bi gune̱' chee̱ bénneache chee̱', na' ne̱ chee̱ benne' ca' gudil-le̱' benne' wenná bea ca'.
15Guzre̱' le̱': “Quebe bi gunle chee̱ benne' ca' gucá'a, ne quebe gunle da cale̱la chee̱ benne' ca' dxuluchalaje̱' waláz chia'.”
16Be̱ne̱' guta' tu gubina' lu xe̱zr la xu na', na' gudúe̱' ca naca xeta xelawe̱'.
17Gusel-le̱' tu benne' cuía lawe̱' lau benne' chie̱' ca', bénnea' naque̱' José, bi na' belutie̱'-be' chee̱ gácabe' we̱n zrin chee̱ benne' zitu'.
18Buluzré̱'e̱ ní'abe' lu xe̱dxu chee̱ cuaga da be̱xru na ní'abe', gate na' gulu'e̱-be' lizre xia lu xe̱zr la xu Egipto,
19ca bzrin zra guca li ca da gunná José dxal-la' gaca. Caní guca, ble'e xrtizra' Xránadxu cúnnabe' da li.
20Nadxa benne' wenná bea chee̱ Egipto gusel-le̱' nu gusán José na'. Bénnea' dxenná bé'ene̱' zánete̱ cue' xe̱zr la xu bsane̱'-be'.
21Bzue̱'-be' gácabe' xrana benne' zaj zre̱'e̱ lizre̱', ne chee̱ nna be'ebe' ca naca da xu'u lu ne̱'e̱,
22chee̱ tíl-labe' benne' szren ca' chee̱ wenná bea cáte̱ze dxaca lázrebe', ne chee̱ guzéajni'ibe' benne' gula chee̱ xe̱zr la xu Egipto chee̱ xelaque̱' benne' sina.
23Gudé na' gulu'e̱ benne' Israel ca' lu xe̱zr la xu Egipto, na' guzúa Jacob lu xe̱zr la xu chee̱ zri'ine zre sua Cam.
24Gulánle̱'e̱ bénneache chee̱ Xránadxu lu xe̱zr la xu na', na' be̱ne̱' gulaque̱' wál-ladxa ca benne' guledábague̱' Le̱'.
25Bcha Dios lázxdau benne' Egipto ca' chee̱ xelecuídene̱' bénneache chee̱', chee̱ xelegú'u lazre̱' xelune̱' da cale̱la chee̱ we̱n zrin chee̱' ca'.
26Nadxa gusel-le̱' Moisés, we̱n zrin chee̱', lau bénneache chee̱' ca', ne Aarón, bénnea' guqué̱'e̱.
27Benne' caní be̱'e̱ Dios lataj belune̱' xel-la' waca ca' chee̱ xabáa, ne xel-la' waca zrente̱ ca' lu xe̱zr la xu chee̱ zri'ine zre sua Cam.
28Gusel-la Dios tu da chul-la da bgacu na dute̱ xe̱zr la xu na', san benne' Egipto ca' quebe buluzúe̱' dizra' da gunná be'ene̱' le̱'.
29Nadxa be̱ne̱' bexaca nisa xe̱gu chee̱ benne' ca' dxen, ne be̱tie̱' xúgute̱ bela zaj zraba' xe̱gu ca'.
30Busezrate̱' xe̱zr la xu chee̱' bluzru ca' ga bzrinte̱ gulezraba' xu'u lizre benne' wenná bea chee̱ benne' Egipto ca'.
31Gunnaze Dios, na' belelá' zánete̱ be'a chee̱ be̱zre, ne be'a lase ca' dute̱ lu xe̱zr la xu chee̱ benne' ca'.
32Waláz chee̱ nisa xiuj gusel-le̱' xiaj bezxe' lu xe̱zr la xu chee̱ benne' ca', ne xi' da bzezxe na ca naca xe̱zr la xu chee̱'.
33Bzria xi'e̱ ca zaj naca lba uva chee̱', ne ca zaj naca xaga higo chee̱', na' bzúzxuje̱' ca zaj naca xaga zaj ze̱ lu xe̱zr la xu chee̱'.
34Gunnaze̱', na' belelá' biche zu ca', da quebe nu seque' gulaba le̱ba',
35na' guláguba' dute̱ xixre' xa'a lu xe̱zr la xu chee̱', ne guláguba' dute̱ lina da dxunna xe̱zr la xu na'.
36Nadxa be̱tie̱' xúgute̱ bi biu nedxu chee̱ benne' Egipto ca', bi zaj nácabe̱' bi blau chee̱'.
37Bebéaje̱' bénneache chee̱' na' zaj nu'e̱ dumí plata, ne dumí oro, na' quebe nu chilá' benne' ládujla le̱', benne' quebe chawe' zue̱'.
38Gulebé benne' Egipto ca' gate beledxúaj benne' ca' ga na', lawe' da belezrébele̱'e̱ le̱'.
39Bzalaj Dios tu beuj da gulú'u na benne' ca' zrul-la, ne tu xi' da bsaní na chee̱' chizrela.
40Gulenabe̱' Dios, na' gusel-le̱' chee̱' btau ca', ne be̱ne̱' gulélajene̱' xeta da bdxuaj na xabáa.
41Gule̱'e̱ tu xiaj xre, na' gulaj nisa da gudé na lu xe̱zr la xu bizre na' ca tu xe̱gu nisa.
42Caní be̱n Dios lawe' da bsa lazre̱' xrtizre̱' lá'azxa da guche̱be lazre̱' gune̱' chee̱ Abraham, we̱n zrin chee̱'.
43Bebéaje̱' bénneache chee̱' lu xe̱zr la xu Egipto, dxelebene̱'. Lu da ba neza gulezrá' benne' ca' guqué̱'e̱.
44Bnézruje̱' benne' ca' xe̱zr la xu chee̱ benne' xezica ca', na' da belún benne' xe̱zr la xu ca' bexaca na chee̱ benne' chee̱' ca',
45chee̱ xulupá'ane̱' ca naca xrba chee̱' ca', ne xelune̱' ca naca da gunná bé'ene̱' ca'. ¡Gaca ba lá'azxa Xránadxu Dios!
