1Zegar haw Kora wanemiapo kwer O Tupàn Tuweharupi Wiko Ma'e, nekatuahy neywy pe ne. Eremuigo kar wi Izaew izuapyapyr temi'u hereko har romo ma'e hereko har romo ne wà.
2Eremunàn neremiaihu wanemiapo kwer ikatu 'ym ma'e paw ne. Nereme'e kwaw wakatu 'ymaw rehe.
3Erepytu'u wanupe nekwahy re. Ereityk nekwahy haw tata zàwenugar.
4Uremuigo kar wi pe temi'u hereko har romo ma'e hereko har romo nehe, o Tupàn urepyro har. Epytu'u neremiaihu wanehe nekwahy re nehe.
5Aipo nerepytu'u pixik kwaw urerehe nekwahy re nehe. Aipo nekwahy haw nupaw pixik kwaw nehe.
6Emur wi nekàgaw urewe nehe. Nezewe mehe eremurywete kar wi putar neremiaihu ne wà nehe.
7O Tupàn Tuweharupi Wiko Ma'e exak kar nepuruamutar katu haw urewe nehe. Emur urepyro àwàm urewe nehe no.
8Ihe ainu putar Tupàn Tuweharupi Wiko Ma'e ize'eg mehe ihe nehe. — Peneko haw ikatuahy putar nehe, Aze napezewyr kwaw pene'o haw pe nehe, I'i zanewe hemiaihu wanupe a'e, zanewe hehe uzeruzar ire upytu'u 'ym ma'e wanupe a'e.
9Azeharomoete aze teko ukyze izuwi wà, aze umuwete katu wà, Tupàn ipurupyro wer a'e teko wanehe a'e. Nezewe mehe heko haw purupyro ma'e upyta putar zaneywy rehe nehe.
10Mokoz teko uzeàwàxi wà. Nezewegatete Tupàn ipuruamutar haw uwàxi putar puruwi ityryk 'ymaw a'e nehe. Nezewegatete ikatu haw uzemono'og putar wamuigo katu kar haw inuromo nehe no.
11Teko Tupàn wi utyryk 'ym ma'e hezuz putar ywy wi ywyra ài wà nehe. Tupàn ikatuahy haw ume'e putar ywak wi ywy rehe nehe no.
12Tupàn umur putar ikatuahy ma'e zanewe nehe. Zaneywy umuezuz kar putar temi'u tetea'u nehe.
13Tupàn ikatu haw oho putar henataromo nehe. Umukatu putar hape ràm izupe nehe.
