1À Dikiri sáabu kɛ à a tↄ́ kpá, à tó burinↄ a yãkɛnanↄ dↄ̃.
2À lɛ̀ sí à a táaki lɛ́, à a yãbonsarɛkɛnanↄ baba pínki.
3À ĩa dã kũ Dikiri tↄ́ kũ à kú adonaao, ákↄ̃nↄ Dikiri kiwɛtɛrinↄ à pↄnna kɛ.
4À Dikiri ki wɛtɛ à gbãna wɛ́ kɛa, àgↄ̃ a arɛ wɛtɛ lakanaa sari.
5À tó yãbonsarɛ kũ à kɛ̀nↄ dↄágu, a daboyãkɛnanↄ kũ a yãkpatɛkɛnanↄo,
6ákↄ̃nↄ Dikiri zↄ̀bleri Ibrahĩ burinↄ, ákↄ̃nↄ Yakubu buri kũ à á sɛ́nↄ.
7Àkũmɛ Dikiri ó Luda ũ, a yãkpatɛkɛna kú andunia gũn pínki.
8A bàka kunna kũoo yã dì sãagu zikiro, yã kũ à dìtɛ nigↄ̃ kun ari ó buria.
9A bàka kú kũ Ibrahĩo, à ɛ̀ra à sì kũ a kunnaao Isaakunɛ dↄ.
10A yã pìi pàpa Yakubunɛ dokayã ũ, akũ à kú kũ Isarailanↄo ari gↄrↄ sĩnda pínki.
11À pì áni Kanaanↄ bùsu kpáḿma, anigↄ̃ de ń baka ũ kũ ògↄ̃ vĩ.
12Gↄrↄ birea ò dasiro, òdi ń yã daro, ò kú Kanaanↄ bùsun bòasunↄ ũmɛ.
13Òdigↄ̃ likara zↄ̃ buri kũ burionↄ tɛ́, òdigↄ̃ kure bùsu kũ bùsuuo.
14Adi we ò gbãna mↄ̀ńnɛro, à kpã̀kɛ̃ kínanↄi ń yã musu à pì,
15òsun ↄ na gbɛ̃ kũ a ń sɛ́nↄaro, òsun wɛ́ tã a annabinↄaro.
16Akũ à tò nàa gɛ̃̀ bùsuu pìn, à tò ń zànaa làka pínki.
17Akũ à Yusufu gbàrɛ à dòńnɛ ń arɛ, ò a yìa zↄ̀ ũ.
18Ò mↄ̀kpatii kpà a gbáa, ò mↄ̀kakↄ̃anaa kà a wakalɛ
19ari yã kũ à gĩnakɛ à òo gɛ̀ɛ à pàpao, akũ yã kũ Dikiri dànɛɛ tò yã bò kãao nna.
20Kũ kína gbɛ̃ zĩ̀, akũ ò a gbàrɛ, bùsu gbɛ̃ zↄ̃kↄ̃ↄ pì a kɛ̃̀.
21À a dìtɛ a bùsu don'arɛde ũ, à tò à iko vĩ a aruzɛkɛnↄa pínki.
22Yusufu a kínanɛnↄ tòto a pↄyeinaaa, à ↄ̃ndↄ̃ dàda a ìbanↄnɛ.
23Akũ Yakubu sù Misila, Isarailanↄn kun nibↄnↄ ũ Hamu burinↄ bùsun.
24Dikiri tò a gbɛ̃nↄ kↄ̃̀ gwe manamana, à tò ò dasi kũ̀ de ń ibɛrɛnↄla.
25À ń ibɛrɛɛ pìnↄ sã vùńnɛ, akũ ò zã̀ a gbɛ̃nↄgu, de ò ↄ̃ndↄ̃ kɛ a zↄ̀blerinↄnɛ.
26À a zↄ̀bleri Musa zĩ̀ḿma kũ Haruna kũ à a sɛ̀ɛo.
27Ò dabodabonↄ kɛ̀ Misilanↄnɛ, ò yãbonsarɛnↄ kɛ̀ Hamu burinↄ bùsun.
28À gusira gbàrɛḿma, gu sì ń bùsun, kũ ò gì a yã mai yãi.
29À ń ínↄ lì aru ũ, akũ ń kpↄ̀nↄ gàga.
30Kasonↄ dà ń bùsula kũ ń gbãnadenↄ wutɛkinↄ pínki.
31À yã ò, akũ ífĩninↄ dàńla, sàanↄ sì ń tɛ́ ari ń bùsu lɛ́n pínki.
32À legũgbɛɛ kↄ̀tɛńnɛ legũ gɛ̃nɛ ũ, surapatanaa dà ń bùsula pínki.
33À ń geepi línↄ ɛ̀'ɛ kũ ń kakapura línↄ, à ń bùsu línↄ kɛ̀ búgubugu.
34À yã ò, akũ kwanↄ dàńla, kwa zɛ̃kↄ̃nↄ kà ò lɛ́ vĩro.
35Ò ń bùsu sɛ̃̀ kũ láo blè ò nɛ̀, ò ń burapↄnↄ blè pínki.
36À ń bùsu daudunↄ dɛ̀dɛ ń pínki, ń nɛ́ daudu kũ ò ì ń kɛfɛnnakɛgↄrↄanↄ.
37À bò kũ Isarailanↄ, ò andurufu kũ wuraao sɛna, ń buri gbɛ̃ke dí gɛ̃̀ sí zɛ́nlo.
38Kũ ò bↄ̀tɛ, Misilanↄ pↄ kɛ̀ nna, kũ vĩna ń kũ Isarailanↄ yã musu.
39À tɛ́luku dà a gbɛ̃nↄla, à kɛ̀ tɛ́ ũ gwãani à gu pùńnɛ.
40Ò wɛ́ kɛ̀a, akũ à sùńnɛ kũ kpɛkpɛrɛwinↄ, à musu pↄ́ble kpàḿma, ò mↄ̀ḿma.
41À gbɛ̀si pàra, akũ í bòn, í bàa lɛ̀ gbárannan gwe lán swa'i bà.
42Zaakũ à dↄ̀ lɛ́ kũ à sɛ̀ a zↄ̀bleri Ibrahĩnɛ yãn.
43À bò kũ a gbɛ̃nↄ, òtɛn pↄnna kɛ, gbɛ̃ kũ à ń sɛ́nↄ tɛn ayuwii dↄ.
44À burinↄ bùsuu kpàḿma, ò zĩ kũ dakenↄ kɛ̀ɛ àree blè,
45de ò le ògↄ̃ a yãditɛnanↄ kũna, ò a dokayãnↄ da. Aleluya!
