1Zegar haw Azaw hemiapo kwer Azeharomoete Tupàn ikatu teko Izaew izuapyapyr wanupe a'e. Ikatu teko ipy'a ikatuahy ma'e Tupàn heruzar katu ma'e wanupe.
2Herewyrowyroahy ihe, amo wanuwi wiko wera'u ma'e wanehe. Herewyrowyroahy ikatu 'ym ma'e wanehe ihe no, ta'e aexak waneko haw ikatu ma'e ihe xe. A'e rupi apytu'u tària'i Tupàn rehe hezeruzar ire ihe, Ta'e hewyrowyroahy wanehe ihe xe.
4Ikatu 'ym ma'e nupuraraw kwaw ma'erahy wà. Ikàg a'e wà. Huhàgatu a'e wà no.
5Nupuraraw kwaw ma'erahy amogwer wazàwe wà. Nuzemumikahy kwaw amogwer wazàwe wà.
6A'e rupi umunehew amo wanuwi wiko wera'u haw mu'yr ài wà. Umunehew puruzuka haw kamirànàm ài wà no.
7Wapy'a tynehem ikatu 'ymaw pupe wà. Xo ikatu 'ym ma'e iapo àwàm rehe zo ima'enukwaw wà.
8Ze'eg urywahyahy haw ikatu wanupe. Xo ikatu 'ym ma'e zo umume'u wà. Wiko wera'u amo wanuwi wà. Umume'u amo wanehe umunar àwàm uzeupe wà.
9Uze'eg zemueteahy Tupàn ywak rehe har rehe wà. Uzapo kar ma'e ywy rehe har wanupe wiko wera'u haw rupi wà.
10Nezewe Tupàn hemiaihu mua'u oho a'e teko wanekar pà wà. Uzeruzar waze'eg rehe wà no.
11— Tupàn nukwaw kwaw ko ma'e a'e nehe. Ywate Wera'u Har nuexak pixik kwaw ko zaneremiapo kwer a'e nehe, i'i uzeupe wà.
12Nezewe wanekon ikatu 'ym ma'e wà. Heta tetea'u ma'e wanupe. Tuweharupi hemetarer katu wera'u oho waiko wà.
13Na'ikatu kwaw katu 'ygwer wi hetyrykaw ihe. Màràzàwe tuwe amonokatu hepo iaiw paw wi.
14O Tupàn, erepuraraw kar ma'erahy ihewe 'ar katu rehe. Tuweharupi ku'em mehe erezepyk herehe.
15Aze mo aze'eg ikatu 'ym ma'e wazàwe, Iaiw ma'e azapo mo neremiaihu wanupe.
16A'e rupi azeagaw ko ma'e ikwaw pà ihe. Zawaiw katu wera'u ikwaw paw ihewe.
17Na'e amo 'ar mehe neràpuzuhu pupe heixe mehe Akwaw ikatu 'ym ma'e wanupe uzeapo ma'e ràm iahykaw rehe har ihe.
18Eremupu'àm ywy ihym ma'e rehe ne wà. Eremu'ar kar umumaw pàwàm me ne wà.
19Na'arewahy eremumaw ikatu 'ym ma'e ne wà. Iaiw wamumaw paw.
20Teko heharaz upuahu awer wi ku'em mehe ume'e mehe wà. Nezewegatete, o hezar, nanema'enukwaw kwaw a'e teko wanehe ne.
21Hepy'a tynehem iro haw pupe a'e mehe. Aikwahy ihe.
22Napuner kwaw neremiapo kwer ikatu haw ikwaw paw rehe. Aiko miar ài ma'e kwaw 'ymar romo ihe.
23Nezewe rehe we aiko nerehe we tuweharupi. Hepyhyk pe hepo rehe ne.
24Hereruze'eg pe herape ràm ikwaw kar pà ihewe. Iahykaw rehe hemur kar putar pe nepyr tuwihaw ài herereko pà nehe.
25Ne ywak rehe har ne, xo ne urereko ihe. A'e rupi naputar kwaw amo ma'e ywy rehe har ihe.
26Apuner ma'e kwaw par 'ym romo hereko haw rehe nehe. Apuner hetekwer ikàg 'ym ma'e romo hereko haw rehe nehe no. Nezewe rehe we Tupàn wiko putar hekàgaw romo nehe. Naputar kwaw amo ma'e ihe nehe.
27Newi utyryk ma'e ràm umàno putar azeharomoete a'e wà nehe. Eremumaw putar nerehe uzeruzar ire upytu'u ma'e ràm ne wà nehe no.
28Ihe naiko kwaw wazàwe ihe. Tupàn huwake hereko haw ikatuahy ihewe. Tupàn Tuweharupi Wiko Ma'e azapo hemimaw romo ihe. Amume'u hemiapo kwer paw rupi no.
