1Zegar haw Tawi hemiapo kwer Hepy'a ikàg, o Tupàn, ikàg tuwe a'e. Amuzàg putar zegar haw nekatu haw imume'u pà nehe. Eme'e kury, hepy'a.
2Hewioràwiràn, eme'egatu nehe. Eme'egatu nehe no, hewioràwiràn irir her ma'e. Amume'egatu kar putar kwarahy ihe nehe.
3O Tupàn Tuweharupi Wiko Ma'e, amume'u putar neremimur kwer ikatu haw teko ywy nànànar wainuromo nehe. Amume'u putar nekatu haw amogwer teko wainuinuromo nehe no.
4Nepuruamutar katu haw ywak 'aromo hin a'e. Puruwi netyryk pixik 'ymaw uhem ywàkun pe.
5O Tupàn, exak kar nehua'u haw ywate har nehe. Tuwe nekàgaw uhyape katu ywy nànàn nepuràg eteahy haw rehe we nehe.
6Urepyro pe nekàgaw rupi nehe. Ewazar ureze'egaw newe ureremimume'u kwer urewe nehe. Nezewe mehe erepyro putar teko neremiamutar katu ne wà nehe.
7Tupàn uze'eg nezewe wàpuzuhu pe a'e. — Heàmàtyry'ymar waneityk mehe nehe, azaikaikaw putar Xikez tawhu ihe nehe. Apei'ài'àg putar ywyàpyznaw Xukot her ma'e nehe no. Amono putar ipegegwer heremiaihu wanupe nehe.
8Aiko Zireaz izar romo ihe. Aiko Manaxe izar romo ihe no. Eparai nuzawy kwaw heàkàg imimawtàtà a'e. Zuta nuzawy kwaw ywyraihàg tuwihawete romo hereko haw hexak kar haw hepo pe har.
9Moaw nuzawy kwaw kawaw hezepuez haw. Aityk putar hexapat Enom rehe nehe. Nezewe aexak kar putar a'e ywy izar romo hereko haw ihe nehe, purupe ihe nehe. Azegar putar Piri ywy rehe har waneityk awer rehe nehe, i'i Tupàn.
10O Tupàn, mo hereraha putar tawhu pàrirogaw aiha ma'e hereko har pupe nehe. Mo hereraha putar Enom pe nehe.
11Aipo urereityk pe azeharomoete ne. Aipo nereata kwaw zauxiapekwer uremyrypar wanehe we.
12Urepytywà pe ureàmàtyry'ymar waàmàtyry'ym mehe nehe. Aze xo awa zo urepytywà nehe, nurupuner kwaw waneitykaw rehe nehe.
13Aze Tupàn wiko zaneinuinuromo nehe, xityk putar zaneàmàtyry'ymar zane wà nehe. Weityk putar zaneàmàtyry'ymar a'e wà nehe.
