1Sang kulo nu sin LEUM GOD, ac fahkak fulat lal, Fahkak orekma lal nu sin mutanfahl uh.
2On ac kaksakin LEUM GOD, Fahkak orekma wolana ma El orala.
3Kut in engan lah kut ma lal, Lela mwet nukewa su alu nu sel in arulana engan.
4Ngetak nu sin LEUM GOD tuh Elan kasrekowos, Alu nu sel pacl e nukewa.
5Esam orekma sakirik El orala; Mwenmen lal, oayapa nununku lal su El fahkla.
6Kowos fwil natul Abraham, mwet kulansap lal, Ac tulik natul Jacob, mwet sulosolla lun God.
7LEUM GOD El God lasr, Ma sap lal ma nu sin faclu nufon.
8El fah karinganang wuleang lal ma pahtpat — El oru wulela lal tuh in ma nu sin sie tausin fwil,
9Aok, wuleang su El oakiya inmasrlol ac Abraham, Ac wulela lal nu sel Isaac.
10LEUM GOD El orala sie wulela yorol Jacob, Sie wulela su fah oan ma pahtpat.
11El fahk, “Nga ac fah asot facl Canaan nu sum. Ac fah mwe usru lom sifacna.”
12Mwet lun God elos mwet na pu, Elos tuh mwetsac in facl Canaan.
13Elos forfor liki sie facl nu ke sie pac facl — Liki sie tokosrai nu ke sie pacna tokosrai.
14Tuh God El tia lela kutena mwet in akkeokyalos, El karinganulos ke El fahk nu sin tokosra saya,
15“Nik kowos aklokoalokye mwet kulansap sulosolla luk; Nik kowos kahlye mwet palu luk.”
16LEUM GOD el supwama sracl nu fin acn selos Ac eisla ma nalos nukewa.
17Tusruktu El supwala sie mukul meet lukelos; Joseph, su kukakinyukla el tuh elan sie mwet kohs.
18Nial kapiri ke sein, Ac osra raunela inkwawal
19Nwe ke kas lal akpwayeyuk. Kas lun LEUM GOD ma Joseph el fahkak akpwayeyuk.
20Na tokosra lun Egypt el tulalla, Aok, mwet kol lun mutunfacl sac el aksukosokyalla.
21Tokosra el sang tuh elan kol mwet nukewa in facl sac, Ac elan leum fin acn nukewa lal —
22El ku in sapsap nu sin mwet pwapa lun tokosra, Ac luti mwet kasru lal ke lalmwetmet.
23Tok, Jacob el som nu Egypt, Ac muta in acn we.
24LEUM GOD El sang tulik puspis nu sin mwet lal, Ac oru elos in ku liki mwet lokoalok lalos.
25God El oru mwet Egypt in srunga mwet lal Ac elos in akkolukye ac aklalfonye mwet kulansap lal inge.
26Na God El supwalla Moses, su mwet kulansap lal, Oayapa Aaron, su el sulela.
27Elos oru orekma kulana lun God Ac orala mwenmen in acn Egypt.
28God El supwala lohsr nu fin acn Egypt, Tusruktu mwet Egypt elos tiana akos sap lun God.
29El ekulla infacl lalos nu ke srah Ac onela ik nukewa.
30Facl selos sessesla ke frog; Finne inkul fulat lun tokosra, nwanala pac kac.
31God El kaskas, na kain in loang puspis ac won srisrik ngalngul rirme, Ac nwakla facl sac nufon.
32El tulokinya af uh, A El supwama af yohk kosra oayapa sarom nu fin facl selos.
33El kunausla ima grape ac sak fig Ac koteya sak nukewa yen selos.
34El sap na, ac won locust tuku, Puslana, tia ku in oaoala.
35Elos kangla kain in sak nukewa in facl sac, Ac fokinsak nukewa.
36El uniya wounse mukul In sou nukewa lun mwet Egypt.
37Na El kolla mwet Israel liki facl sac; Elos us gold ac silver, Ac elos nukewa ku na, ac wo finsroa.
38Mwet Egypt elos sangeng selos Ac engan lah elos som lukelos.
39God El asroelik sie pukunyeng in sonelosi, Ac sie e in tololos ke fong.
40Elos siyuk, ac El supwama won quail; El kitalos inkusrao me, tuh elos in kihp.
41El ikaselik sie eot, ac kof uh kahkme; Sororla pac nu yen mwesis oana soko infacl.
42El esam wulela mutal lal Nu sel Abraham, mwet kulansap lal.
43Ouinge El kolla mwet sulela lal, Ac elos on ac sasa ke engan.
44El sang nu selos acn sin mutanfahl saya Oayapa ima pac lalos,
45Tuh mwet lal in akos ma sap lal Ac karingin sap lal nukewa. Kaksakin LEUM GOD!
