1O Tupàn Tuweharupi Wiko Ma'e, tuwe hepy'a umume'u nekatu haw nehe. O Tuweharupi Wiko Ma'e Hezar, nehua'u ne. Eremunehew nekàgaw kamir ài. Eremunehew nepuner haw nepuràg eteahy haw rehe we no, neremyhar ài no.
2Erezepyk tatainy pupe. Eremuapyk ywak neràpuzràn ài.
3Erezapo neràpuz 'y ywate har rehe. Ereata ywàkun rehe ywyramawa zeàmàtyry'ymawhu pe har ài. Erewewe ywytu nepepo romo iapo pà.
4Emuigo kar ywytu neze'eg purupe heraha har romo. Erezapo àmàn iweraw paw neremiruze'eg romo no.
5Eremuapyk katu ywy iwy pe har i'aromo. A'e rupi ni amo numunyryk pixik kwaw henaw wi wà nehe.
6Teko upyk ma'e zewàwànaw pupe wà. Nezewegatete erepyk ywy yryhu pupe. 'Y upyta ywytyruhu 'aromo.
7Neze'egahy henu mehe 'y uhem a'e wi. Imono kar mehe uzàn oho a'e wi.
8'Y uwyryk oho ywytyr wamyteromo. Wezyw ywyàpyznaw rupi no, Weko àwàm neremimuàgy'ygwer pe no.
9— Eixe zo pe pe nehe, ere 'y pe. Nezewe mehe nupyk wi kwaw ywy.
10Erezapo ytyzuzàmaw ywyàpyznaw wanehe wà. Eremuyryk kar yrykawhu ywytyr wamyteromo.
11Miar paw uwi'u a'e 'y pupe wà. Zumen hehaite ma'e uwi'u wà. Uhyk wanupe.
12Yrykaw iwy rehe wiràmiri uzapo waity wà. Uzegar ywyra hàkà rehe wà.
13Eremugyr kar àmàn ywak wi ywytyr rehe. Tynehem ywy neremimur kwer ikatu ma'e pupe.
14Eremuezuz ka'api'i tapi'ak wanupe. Eremuezuz arozràn purupe amo wanemi'u ràm inuinuromo. A'e rupi teko omono'og wemi'u ràm ywy wi wà.
15Eremuezuz kar ma'e ywy wi ne. Teko uzapo ma'ywa uwà her ma'e wà, win romo iapo pà wà. Hurywete i'u mehe wà. Omono'og uri kawer wà. Upurumurywete kar a'e. Uzapo arozràn wà, typy'ak romo iapo pà wà. Ikàg i'u mehe wà.
16Àmàn tetea'u ukyr ywyra Tupàn Tuweharupi Wiko Ma'e hemiapo kwer rehe. Ukyr ywyràkàxigyw Irimano ywy rehe har Tupàn hemitygwer rehe no.
17Wiràmiri uzapo waity hehe wà. Kàràw uzapo weko haw ywyra pin 'yw her ma'e rehe wà.
18Àràpuhàrànete hehaite ma'e wiko ywytyruhu apyr wà. Tapixi uzeàmim itahu kwar pupe wà.
19Erezapo zahy ne. Uhyahu u'ar katu mehe. Kwarahy ukwaw u'ar mehe wixe haw no.
20Erezapo pytun no. Miar hehaite ma'e paw uhem wà pyhaw wà.
21Zàwàruhu iriàw ipyahu ma'e okororo wemi'u ràm hekar mehe wà. Wekar wemi'u ràm Tupàn hemimur kwer oho waiko wà.
22Kwarahy ihem mehe uzewyr oho wà. U'aw oho weko haw pe wà.
23Na'e teko uma'ereko oho wà. Xo kwarahy heixe etea'i mehe upytu'u wà.
24O Tupàn Tuweharupi Wiko Ma'e, erezapo ma'e tetea'u ne wà. Nema'ekwaw katu haw rupi erezapo ne wà. Ywy tynehem neremiapo kwer wapupe a'e.
25Pe pe tuz yryhu no. Uhua'u tuwe a'e. Ma'ea'yr uhua'u ma'e wiko ipupe wà. Pixika'i ma'e wiko ipupe wà no. Teko nupuner kwaw wapapar haw rehe wà, ta'e heta tetea'u tuwe a'e wà xe.
26Kanuhu wata oho waiko yryhu rehe wà. Pirahu àzàg zàwenugar Erewiàtà her ma'e uzemaraz ipupe no. 'Y pe har uhua'u ma'e neremiapo kwer romo a'e.
27A'e ma'ea'yr paw neràro wà, Ta'e eremono wanemi'u wanupe 'ar katu mehe ne xe.
28Eremono wanemi'u ràm wanupe. U'u wà. Uhyk wanupe wà.
29Neruwa imim mehe ukyze wà. Wapytuhem ire wamupytu'u kar mehe, umàno a'e wà. Uzewyr ywyku'i romo weko haw pe wà. Kwehe mehe wiko ywyku'i romo wà. Uzewyr wi putar a'e pe wà nehe no.
30Aze eremupytuhem kar ne wà, uzexak kar wà. Nezewe mehe eremono ma'e wikuwe ma'e ipyahu ma'e ywy rehe ne wà.
31Tuwe Tupàn Tuweharupi Wiko Ma'e ikàgaw nupaw kwaw nehe. Tuwe ipuràg eteahy haw uhyape katu tuweharupi nehe. Tuwe hurywete wemiapo kwer rehe nehe.
32Tupàn Tuweharupi Wiko Ma'e ume'e ywy rehe. Ywy uryryryryz a'e. Opokok ywytyr wanehe. Uhem tàtàxiner wanuwi.
33Amuzàg putar zegar haw Tupàn Tuweharupi Wiko Ma'e ikatu haw rehe herekwe mehe we ihe nehe. Amumaw putar he'ar paw hezar pe hezegar pà nehe.
34Tuwe Tuweharupi Wiko Ma'e hurywete hezegar haw henu mehe nehe, Ta'e herurywete haw ur izuwi a'e xe.
35Tuwe teko Tupàn rehe ipurukwaw wer 'ym ma'e ukàzym ywy wi a'e wà nehe. Tuwe ikatu 'ym ma'e iapo har upytu'u weko re wà nehe. Tuwe hepy'a umume'u nekatu haw nehe, o Tupàn Tuweharupi Wiko Ma'e. Pemume'u Tupàn Tuweharupi Wiko Ma'e ikatu haw nehe. Azeharomoete.
