1Zegar haw Kora wanemiapo kwer O Tupàn, uruenu Ureipy wanemimume'u kwer ure. Uruenu neremiapo kwer uhua'u ma'e Ureipy waneko mehe arer ure, kwehe arer ure.
2Eremuhem kar teko nemuwete 'ymar ne wà. Eremupyta kar neremiaihu waiwy rehe ne wà, wanekuzaromo ne wà. Umume'u a'e ma'e urewe wà. Erezepyk teko amo ae ywy rehe har wanehe. Eremukàg kar neremiaihu ne wà. Umume'u a'e ma'e urewe wà.
3Nupyhyk kwaw a'e ywy utakihe pupe wà. Nuweityk kwaw a'e ywy rehe har ukàgaw rupi wà. Weityk nepuner haw rupi wà, nekàgaw rupi wà. Nereko haw ihyape katu haw rupi weityk wà. Nezewe erexak kar neremiaihu wamutar katu haw ne, neremiaihu wanupe ne.
4Ereiko heruwihawete romo. Hezar romo ereiko. Eremur wàmàtyry'ymar waneitykaw neremiaihu wanupe ne.
5Uruityk ureàmàtyry'ymar nepuner haw pupe ure wà. Urumumaw urekutyr ur ma'e ure wà, ta'e ereiko urerehe we ne xe.
6Nazeruzar kwaw heywyrapar rehe. Hetakihepuku numur kwaw heàmàtyry'ymar waneitykaw ihewe.
7Xo ne zo urepyro ureàmàtyry'ymar wanuwi. Xo ne zo ereityk urerehe iakatuwawahy 'ym ma'e wà.
8Urumume'u putar nekatu haw izi'itahy te kwarahy heixe mehe nehe. Urumume'u putar neremiapo kwer ikatu haw tuweharupi nehe no.
9Ko 'ar rehe, o Tupàn, eretyryk urewi kury. Urereityk kar pe ureàmàtyry'ymar wanupe. Nereho kwaw zauxiapekwer wanupi zeàmàtyry'ymawhu pe ne.
10Uremuzàn kar pe ureàmàtyry'ymar wanuwi. Weraha urema'e paw urewi wà.
11Urereko pe àràpuhàràn ài ne, uzuka àwàm me oho ma'e ài ne. Uremuhàmuhàz kar pe amo ywy wanehe.
12Ereme'eg neremiaihu temetarer pixika'i ma'e pupe ne wà. Nuzawy kwaw ma'e hekuzar katu 'ym ma'e newe a'e wà.
13Teko ureywy huwake har wexak neremiaihu pe neremiapo kwer wà. A'e rupi uze'eg zemueteahy urerehe wà. Uze'eg urywahyahy urerehe wà no.
14Erezapo ikatu 'ym ma'e urewe no. A'e rupi amogwer ywy rehe har uze'eg urywahyahy urerehe wà. Amogwer teko upuka urerehe wà.
15Awa ikàg 'ym ma'e zàwe aiko tuweharupi ihe. Hemaranugar haw hepyk.
16Heàmàtyry'ymar uze'eg urywahyahy herehe wà no. Aenu herehe waze'eg urywahyahy mehe ihe wà. Amo teko ima'enukwaw herehe uzepyk àwàm rehe wà. Aenu herehe waze'eg zemueteahy mehe ihe wà no.
17Na'urereharaz kwaw newi ure. Nuruzuhaw kwaw neze'eg neremiaihu wanupe neremimume'u kwer ure. Nezewe rehe we a'e ma'e paw uzeapo urewe a'e.
18Nurutyryk kwaw newi ure. Nurupytu'u kwaw neze'eg heruzar ire ure.
19Ne urezuhaw pe urerezar pà àzàg yryhu pe har wainuromo ne. Urerezar pe pytunahy haw inuromo no.
20Aze mo urupytu'u urezar imuwete re, Aze mo uruze'eg amo tupàn a'ua'u wanupe,
21erekwaw mo ureremiapo kwer, Ta'e erekwaw teko wama'enukwaw paw wapy'a pe har ne wà xe.
22Tuweharupi amo ipuruzuka wer urerehe a'e wà, ta'e urumuwete katu ure xe. Urereko àràpuhàràn wazuka àwàm mehe oho ma'e ài wà.
23Eme'e nehe, hezar. Màràzàwe tuwe ereker iko ne. Epu'àm nehe. Urewi netyryk ire epytu'u nehe.
24Màràzàwe tuwe erezeàmim urewi. Màràzàwe tuwe nereharaz ma'erahy ureremipuraraw wi. Màràzàwe tuwe nerexak kwaw ma'erahy ureremipuraraw.
25Uruiko heityk pyrer romo. Uru'ar ywy rehe. Urereityk a'e wà, ywyku'i pupe uremomor pà wà.
26Epu'àm urepytywà pà nehe. Urepyro pe nehe, ta'e ureamutar katu pe ne xe.
