1Zegar haw Tawi hemiapo kwer O Tupàn Tuweharupi Wiko Ma'e. Tuwihawete hurywete a'e, ta'e eremur nekàgaw izupe ne xe. Hurywete a'e, ta'e ereityk kar iàmàtyry'ymar izupe ne wà xe.
2Erezapo hemimutar izupe ne. Hemimutar eremono izupe no.
3Eremuhem kar nezeake ne, ikatuahy ma'e imono pà izupe ne. Eremono àkàg rehe har or iapo pyrer iàkàg rehe no.
4— Hemuigo kar pe ne, i'i newe. Eremono hekuwe àwàm tuweharupi àràm izupe ne.
5Tuwihawete ikàg a'e, ipuràg eteahy a'e, ta'e erepytywà ne xe. Eremur ikàgaw izupe. Erekwaw kar her teko tetea'u wanupe no.
6Neze'egatu hehe tuz putar tuweharupi nehe. Hehe we nereko haw umurywete kar tuwe a'e.
7Tuwihawete uzeruzar Tupàn Tuweharupi Wiko Ma'e rehe a'e. Tupàn Ywate Wera'u Har uzamutar katu tuwihawete a'e. A'e rupi wiko putar tuwihawete romo tuweharupi nehe.
8Tuwihawete upyhyk putar wàmàtyry'ymar a'e wà nehe. Upyhyk putar tuwihawete rehe iakatuwawahy 'ym ma'e wà nehe, upuner haw pupe wà nehe.
9Uzexak kar putar wàmàtyry'ymar wamumaw pà tata ài nehe, wanemiapo kwer rehe uzepyk mehe nehe. Ukwahy haw rupi umumaw putar wà nehe. Tata pupe wapy putar wà nehe.
10Ni pitài uhem putar umàno haw wi wà nehe. Tuwihawete uzuka putar wazuapyapyr paw rupi a'e wà nehe.
11Iàmàtyry'ymar umume'u ikatu 'ym ma'e izupe wemiapo ràm wà, izuka àwàm imume'u pà wà. Nupuner kwaw ikatu 'ym ma'e iapo haw rehe izupe wà nehe.
12Omomor putar u'yw wakutyr nehe, Wamuzàn kar pà nehe.
13O Tupàn Tuweharupi Wiko Ma'e, urumume'u putar nekatu haw newe ta'e nekàg tuwe ne. Urumume'u putar nekatu haw newe ta'e nepuner haw uhua'u a'e.
