1O Tupàn Tuweharupi Wiko Ma'e, ereiko Tupàn purehe uzepyk ma'e romo ne. Exak kar nekwahy haw purupe nehe.
2Ereiko teko paw wanemiapo kwer imume'u har romo. Epu'àm kury. Ezepyk amo wanuwi wiko wera'u ma'e wanehe nehe, ta'e na'ikatu kwaw a'e wà xe.
3Ikatu 'ym ma'e umumaw kwarahy tetea'u urywete romo wà. Màràzàwe tuwe neremupytu'u kar kwaw ne wà, o Tupàn Tuweharupi Wiko Ma'e.
4Màràn mehe upytu'u putar wiko wera'u re wà nehe. Màràn mehe upytu'u putar wemiapo kwer ikatu 'ym ma'e imume'u re wà nehe.
5O Tupàn Tuweharupi Wiko Ma'e. A'e teko uzuhazuhaw neremiaihu a'e wà. Imunar neremiruze'eg wama'e wanehe wà.
6Uzuka kuzà imen umàno ma'e kwer wà. Uzuka kwarer tu 'ym ma'e wà, ihy 'ym ma'e wà. Uzuka kuzàtài tu 'ym ma'e wà, ihy 'ym ma'e wà no. Uzuka amo ae ywy rehe arer ureywy rehe wiko ma'e wà no.
7Uze'eg nezewe uzeupe wà. — Tuweharupi Wiko Ma'e nume'e kwaw zanerehe a'e. Tupàn Izaew wazar nukwaw kwaw zaneremiapo kwer a'e, i'i wà.
8Pezeagaw ko ma'e ikwaw pà nehe, iranaiw ma'e wà. Màràn mehe peiko putar ma'e kwaw par romo nehe.
9Tupàn Tuweharupi Wiko Ma'e wiko zaneapyakwar iapo arer romo a'e. Aipo nupuner kwaw ma'e henu haw rehe a'e. A'e wiko zanereha iapo arer romo. Aipo nupuner kwaw ma'e hexakaw rehe.
10Tupàn Tuweharupi Wiko Ma'e umume'u ywy nànànar wanemiapo kwer ikatu 'ym ma'e a'e, iapo har wanupe a'e. Uzepyk putar wanehe nehe no. Tupàn Tuweharupi Wiko Ma'e umu'e teko paw wà, Ta'e ukwaw katu ma'e paw rupi a'e xe.
11Tupàn Tuweharupi Wiko Ma'e ukwaw teko wama'enukwaw paw upaw rupi a'e. Nuzawy kwaw ma'e heityk pyrer izupe.
12O Tupàn Tuweharupi Wiko Ma'e, hurywete neremimu'e wà. Neze'eg rehe neremimu'e hurywete wà.
13Upuraraw ma'erahy amo 'ar mehe wà. Eremupytu'u kar putar a'e 'ar mehe wà nehe. Ikatu 'ym ma'e wanupe erewàpytymawok putar tywypaw nehe.
14Tupàn Tuweharupi Wiko Ma'e nupuir kwaw wemiaihu wanuwi nehe. Nuezar kwaw ipytywà pyr 'ym romo wà nehe.
15Tuwihaw weruze'egatu putar teko a'e wà nehe. Teko ikatu ma'e paw uzeruze'eg kar putar wanupe wà nehe.
16Mo upu'àm heruwake wà, ikatu 'ym ma'e wakutyr wà. Mo upyta heruwake ikatu 'ym ma'e iapo har wakutyr wà.
17Aze mo Tupàn Tuweharupi Wiko Ma'e nahepytywà iwer mo, Aha mo hemàno haw pe.
18O Tupàn Tuweharupi Wiko Ma'e, hemàno haw 'ar uhem etea'i mehe, Nepuruamutar katu haw hemupu'àm kar he'ar 'ym mehe we.
19Hezemumikahy mehe, ma'erahy ipuraraw mehe, hemurywete kar pe ne. Hemupytu'u kar pe hezai'o re ne.
20Nereputar kwaw tuwihaw ikatu 'ym ma'e neruwake ne wà, Ta'e — Ikatu haw, i'i mua'u teko wanupe wà xe, ikatu 'ymaw rehe uze'eg pà wà.
21Uzemono'ono'og teko ikatu ma'e wama'e rehe umunar pà wà. Umume'u teko ikatu 'ym ma'e iapo 'ymar wazuka àwàm wà no.
22Tupàn Tuweharupi Wiko Ma'e hemunyryk kar heàmàtyry'ymar wanuwi. Nuzawy kwaw itahu ihewe. Hemim ikatu 'ymaw wi.
23Uzepyk putar tuwihaw ikatu 'ym ma'e wanehe nehe, Ta'e uzapo ikatu 'ym ma'e teko wanupe wà xe. Tupàn Tuweharupi Wiko Ma'e Zanezar umumaw putar a'e tuwihaw a'e wà nehe, Wanemiapo kwer iaiw ma'e hekuzaromo a'e wà nehe.
