Soũↄ 105 - Bibeli Luayãtaalá

Soũↄ 105

Click on verse(s) to share them!

¹À Dii sáaukpa, í lɛ́mawà, à to bui píi aà yãkɛaↄ dↄ̃.

²À lɛsi, í aà táasilɛ, à aà yãbↄnsaɛkɛaↄ galikɛ píi.

³À ĩ́anadã ń Dii tↄ́ pↄ́ kú adoao. Á Dii kĩ́i wɛ̀ɛlɛnaↄ à pↄnakɛ,

⁴à gɛ Dii le à gbãa gbɛawà, íↄ aà aɛya gↄↄpii.

⁵À to yãbↄnsaɛ pↄ́ a kɛ̀ↄ dↄágu, aà dabudabukɛaↄ ń ikoyã pↄ́ a òↄ,

⁶á Dii zↄ̀blena Ablahaũ buiↄ, á Yakↄbu bui pↄ́ à á sɛ́ↄ.

⁷Dii mɛ́ wá Lua ũ, ↄ̃mɛ ì yãdilɛ gbɛ̃́piiɛ.

⁸Aà bàakuawanↄ yã́ lí sãaaguo, yã́ pↄ́ a òpi aↄ kuɛ e wá buiwa.

⁹Aà bàa kú ń Ablahaũo, à ɛ̀a à a lɛgbɛ̃̀ Izaakiɛ lↄ.

¹⁰Aà bàa ɛ̀a kú ń Yakↄbuo iko ũ, ↄ̃ a kú ń Isailiↄ e gↄↄpii.

¹¹À mɛ̀ á Kanaa bùsu kpámá, aↄ dɛ pↄ́ pↄ́ aa sɛ kpaalɛ guu ũ.

¹²Gↄↄ bee aa dasio, wìli ń yãdao, aa ku Kanaa bùsuu bↄ̀mↄↄ ũɛ.

¹³Aaìↄ liaaliaa bui ń buioↄ guu, aaìↄ bɛbɛ bùsu ń bùsuo.

¹⁴I we wà ń wɛtã̀o, à kíaↄ lèle an yã́ musu à mɛ̀

¹⁵aasu ↄkã gbɛ̃́ pↄ́ a ń sɛ́piↄwao, aasu ĩada a ãnabipiↄwao.

¹⁶Ɔ̃ a tò nↄana kà bùsupiu, a tò an kũ̀sũa làa píi.

¹⁷Ɔ̃ à Yosɛfu gbàɛ à dↄ̀aanɛ́, wà aà yìa zↄ ũ.

¹⁸Wà mↄkà aà gbáwa, wà mↄ dↄ̀ aà nↄɛ

¹⁹e yã́ pↄ́ à dↄ̀aa ò gɛ̀ kɛ̀ò, ↄ̃ yã́ pↄ́ Dii dàɛ̀ tò yã́ bↄ̀aànↄ na.

²⁰Kɛ́ kía gbɛ̃́ zĩ̀, ↄ̃ wà aà gbàɛ, bùsu gbɛ̃zↄ̃ↄpi aà kɛ̃̀.

²¹À aà dìlɛ a bùsu dↄaana ũ, a tò aàↄ iko vĩ a àizɛɛↄwa píi.

²²Yosɛfu aà kíaↄ tòto a pↄeãwa, à ↄ̃nↄ dà aà ìwaↄnɛ.

²³Ɔ̃ Yakↄbu buiↄ mↄ̀ Egipi, Isailiↄ ku nibↄↄ ũ Haũ buiↄ bùsuu.

²⁴Dii tò a gbɛ̃́ↄ kↄ̃̀ we maamaa, a tò aa dasikũ̀ dɛ ń ibɛɛↄla.

²⁵Ɔ̃ à ń ibɛɛpiↄ swãfɛ̃̀, ↄ̃ aa zà aà gbɛ̃́piↄu, aa ↄ̃nↄsↄpɛ̀lɛ aà zↄ̀blenapiↄnɛ.

²⁶À a zↄ̀blena Mↄizi zĩ̀má ń Aalona pↄ́ a sɛ̀o.

²⁷Aa yãkɛ̀ Egipiↄnɛ seela ũ, aa dabudabukɛ̀ Haũ buipiↄ bùsuu.

²⁸À gusia gbàɛmá, gu sì ń bùsuu, kɛ́ aa gì aà yãmai yã́i.

²⁹À ń swa'i lìlɛ à gↄ̃̀ au ũ, ↄ̃ a kpↄↄ gàga.

³⁰Blↄↄ lì ń bùsua ń ń gbãadeↄ wúlɛkĩiↄ píi.

³¹À yã'ò ↄ̃ ũsĩnaↄ kàńgu, gã́i kàńgu e an bùsu lɛ́ lɛ́u píi.

³²À lougbɛ kàńgu lou ũ, loupilɛa lì ń bùsua gupiiu.

³³À ń vɛ̃ɛliↄ ɛ̀'ɛ ń ń kaadↄɛnliↄ, à ń bùsu líↄ kɛ̀ kɛ́lɛkɛlɛ píi.

³⁴À yã'ò ↄ̃ kwaↄ kàńgu, kwasutɛ̃ↄ kà, aa lɛ́ vĩo.

³⁵Aa ń bùsu sɛ̃ ń láo nɛ̀, aa ń buapↄ́ↄ blè píi.

³⁶À ń bùsu nɛgↄ̃ɛ sɛ̃́iaↄ dɛ̀dɛ píi, nɛ́ woode pↄ́ aa ń í ń ɛ̀waasogↄↄpiↄ.

³⁷À bↄ̀lɛ ń a gbɛ̃́ↄ, aa ã́nusu ń vuao kũa, an bui gbɛ̃e i gɛ̃nalɛ zɛ́uo.

³⁸Kɛ́ aa bↄ̀lɛ, Egipiↄ pↄ kɛ̀na, kɛ́ vĩa ń kṹ Isailiↄ yã́ musu yã́i.

³⁹À tɛlu pɛ̀lɛ kpà a gbɛ̃́ↄzi, à kɛ̀ tɛ́ ũ gwã́, à gupùnɛ́.

⁴⁰Aa wabikɛ̀wà, ↄ̃ à mↄ̀nɛ́ ń bùuↄ, à musu blɛ kpàmá aa kã̀.

⁴¹À gbɛsi pàa, ↄ̃ í bↄ̀u, ípi bàalɛ̀ guwaiwaiu we lán swawa.

⁴²Asa lɛ́ pↄ́ a gbɛ̃̀ yã́ dↄaàguɛ, yã́ pↄ́ a ò a zↄ̀blena Ablahaũɛpi.

⁴³À bↄ̀ ń a gbɛ̃́ↄ, aalɛ pↄnakɛ, gbɛ̃́ pↄ́ a sɛ̀piↄ guladↄ.

⁴⁴À buipãleↄ bùsu kpàmá, zĩ pↄ́ gbɛ̃́piↄ kɛ̀ↄ ài gↄ̃̀nɛ́.

⁴⁵Bee kɛ̀ píi kɛ́ aa e wàↄ a yãdilɛaↄ kũa, aai a ikoyãↄ da. Àleluya!

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!