1KAPINA Ieowa, likwir won mar a, kapakaparoki on kainok kan duen a wiawia kan.
2Kauli on i, kauliki on i pjalm akan, kajokajoi duen a manaman akan karoj;
3Peren kida mar a jaraui; monion en me rapaki Ieowa, en popol.
4Komail inon ion Ieowa o a manaman; rapaki jilan i anjau karoj.
5Tamatamanda japwilim a dodok kapuriamui, me a kotin wiadar, o a manaman akan o majan en kadeik jan nan jilan i.
6Kadaudok en Apraam koe japwilim a ladu, o nain Ijrael komail, me a kotin piladar!
7I Ieowa atail Kot; a kotin kaunda nan jap karoj.
8A kin kotin tamanda japwilim a inau kokolata, majan o me a kotin inauki oner di kid.
9Inau me a kotin wiadan Apraam, o a kaula, me a kotin kauki on Ijaak.
10O a kotiki on Iakop kujoned eu, o on Ijrael inau joutuk,
11Ni a kotin majanier: I pan ki on uk Kanaan, iei me I kileledier, en pwaij omail jojo;
12I anjau, me irail pwin tikitik eu, o men kairu nan jap o.
13Ni ar kokola jan eu kainok lel eu, o jan eu wei lel eu.
14A jota kotin mueid on amen aramaj, en katoutou irail, o a kotin kaloke nanmarki kai pweki irail.
15Komail der jair nai me keidier akan, o der wiai on ai jaukop akan me jued kot!
16A lao kotiki on jap o anjaun lek; o kotin kawelar wajan kaporopor en mana,
17A kotin poronelar ol amen mo ’rail; Iojep, me netilar, pwen wiala ladu men.
18Nä a kan kalokolokki jal mata, o pali war a wonon nan mata,
19Lao anjau me japwilim a majan pwarado; majan en Ieowa kamakelekeleda i.
20Nanmarki ap ilakila, pwen lapwada i, iei kaun en wei kan, me kotin kamaioda i.
21A kajapwiladan i pein im a, o kaun en a dipijou karoj.
22Pwen jaliedi a jaupeidi kan duen me a mauki, o padaki on japwilim a lapalap akan lolekon.
23O Ijrael lipalan Äkipten, o Iakop wiala men kairu nan jap en Am.
24I anjau Kot kotin kapara irail ada madan, o kotin kakelail ir ada jan a imwintiti kan.
25A kotin kawukila kupur a, pwen kailonki japwilim a aramaj akan, o widiwidin on japwilim a ladu kan.
26A ap kotin poronela Mojej, japwilim a ladu, o Aron, me a kotin piladar.
27Ira wiadar manaman akai nan pun ar, o dodok kapuriamui nan jap en Am.
28A kotin kadarado rotorot, ap pon pena, o re jota injenoki a majan kan.
29A kotin kawuk on nta ar pil akan, o kamelar ar man akan.
30Jap arail me direki proj lao lel on nan pera en ar nanmarki kan.
31A kotin majanier, lon jued ap rokilar, o amuje nan jap karoj.
32A kotiki on ir akel wiliandi katau, umpul en kijiniai nan jap ar.
33A kotin kawelar ar tuka en wain akan o tuka en paiken, o kotin katip pajan tuka en jap ar akan.
34A kotin majanier, manjiok o lon ap pwarada, rap pwaradar o re jota kak wadawad.
35Rap kanala tuka kan karoj nan jap o, o kanala wantuka kan nan matuel o.
36O a kotin kamelar mejeni karoj nan jap arail, mejeni karoj en ar kelail.
37O a kotin kalua irail jan nan jap o ianaki jilper o kold, o jota me luet nan pun en ar kainok kan.
38Äkipten peren kida ar jamalar, pwe re majapwekadar.
39A kotin wiada tapok en kadupal irail edi, o kijiniai en jereda irail ni pon.
40Irail poekipoeki, i ap kotin kadarado manpir akan; o a kotin kamana kin ir prot en nanlan.
41A kotin palan pajan paip o, pil akan ap kujkuj wei jan, re pwilipwile wei nan jap tan dueta pilap pot.
42Pwe a kotin tamanda a majan jaraui, o japwilim a ladu Apraam.
43A kotin kaluaki peren japwilim a aramaj akan jan nan jap o, o nijinij japwilim a pilipildar akan!
44A ap kotiki on ir jap en men liki kan, o re aleer dipijou en kainok kan.
45Pwe ren peiki on japwilim a majan kan o kolekol a kujoned akan. Aleluia!
