1Zegar haw Tawi hemiapo kwer Ywak umume'u Tupàn ikàgaw a'e, ipuràgaw a'e no. Umume'u hemiapo kwer no.
2Amo 'ar mehe umume'u a'e ma'e 'ar ur ma'e ràm pe no. Pyhaw ipytunaw umume'u amo ipytunaw pe no.
3Ni amo nuze'eg kwaw wà. Ni amo nuenu kwaw ma'e wà.
4Na'e ze'eg ywate har uhàuhàz ywy nànàn. Ize'eg uhem ywy nànàn. Tupàn uzapo tàpuz ywate kwarahy pe a'e.
5Kwarahy uhem wàpuz wi urywete romo hemireko ma'e ràm ài a'e. Nuzawy kwaw uzàn ma'e uzàn àwàm rehe uzypyrog ma'e.
6Kwarahy uhem ywak rehe ipehegwer rehe a'e. Oho inugwer pehegwer pe kury. Ni amo ma'e nupuner kwaw haku haw wi uzeàmimaw rehe wà.
7Tupàn Tuweharupi Wiko Ma'e ze'eg ikatuahy a'e. Umur ukàgaw ipyahu ma'e zanewe. Ikatu ipureruze'egaw rehe zanezeruzar haw. Ukwaw kar ma'e wyzài ma'e kwaw par 'ym wanupe.
8Tupàn purumu'e haw ikatuahy a'e. Umurywete kar teko wapy'a pe wà. Uzekwaw katu ipurumu'e haw. Zanewe ukwaw kar ma'e a'e.
9Ikatu Tupàn imuwete katu haw. Nupaw pixik kwaw nehe. Ipureruze'egaw ikatuahy. Ze'eg azeharomoete har rehe upureruze'eg tuweharupi.
10Ipurumu'e haw ikatu wera'u itazu or wi a'e. Aze heta or ikatuahy ma'e tetea'u newe nehe, Tupàn ipurumu'e haw ikatu wera'u putar a'e temetarer wi newe nehe. Hete katu wera'u hàir wi. Hàir ikatuahy ma'e wi hete katu wera'u a'e.
11Hezar, nepurumu'e haw umur ma'e kwaw paw ihewe. Aiko neremiruze'eg romo. Erezapo ikatu ma'e ihewe, aze aruzar neze'eg ihe.
12Mo upuner wemiawy kwer hexakaw rehe. Hemukatu pe nehe, hezar, heremiawy kwer heremixak 'ym wanuwi nehe.
13Hemunyryk kar pe ikatu 'ygwer wi nehe, Heremimutar rupi heremiapo kwer wi nehe. Emuigo kar zo hezar romo nehe. Nezewe mehe naiko kwaw nereruzar 'ymar romo ihe nehe. Naiko kwaw iaiw ma'e romo nezewe ihe nehe.
14Einu heze'eg nehe. Ekwaw hema'enukwaw paw nehe. Tuwe eremuawyze heze'eg nehe, hema'enukwaw paw nehe no, o Tupàn Tuweharupi Wiko Ma'e, hemimar hepyro har.
