1O Tupàn Tuweharupi Wiko Ma'e, einu newe heze'egaw nehe. Herenu pe newe herehapukaz mehe nehe, hepytywà àwàm henoz mehe nehe.
2Ezeàmim zo ihewi Ma'erahy ipuraraw mehe nehe. Herenu pe newe heze'eg mehe nehe. Na'arewahy ewazar heze'eg ihewe nehe.
3Hereko haw ukàzym iko tàtàxiner ài. Heretekwer ukaz iko tata pupe har ài.
4Aiko ka'api'i imonohok pyrer imuku'iku'i pyrer ài. Uhem hekàgaw ihewi paw rupi. Nahemai'u wer kwaw.
5Hekuhemahy iteko. Xo hepir zo, xo hekàgwer zo heta ihewe. Hero'o kwer upaw.
6Aiko wiràmiri hehaite ma'e ywyxiguhu rehe har ài. Aiko pypy tàpuz teko heta 'ymaw pe har ài.
7Napuner kwaw heker haw rehe. Aiko wiràmiri tàpuz 'aromo har imyrypar 'ym ma'e ài.
8Heàmàtyry'ymar umumaw 'ar katu herehe uze'eg zemueteahy pà wà. Herehe uze'eg urywahyahy ma'e a'e wà, umume'u herer a'e wà, iaiw paw purehe imono mehe a'e wà.
9Erekwahy ihewe ne. Herehe wikwahy ma'e romo ereiko ne. A'e rupi tàtàpyzgwer uzeapo heremi'u ràm romo. Herehaykwer wixe heremi'u ràm inuinuromo, ta'e hepyhyk pe muite hereityk pà ne xe.
11Hereko haw nuzawy kwaw ma'e 'àg kwarahy heixe mehe har. Aiko ka'api'i uxinixinig ma'e ài.
12Ne Tupàn Tuweharupi Wiko Ma'e ereiko putar tuwihawete romo tuweharupi nehe. Teko wiko ma'e ràm wà, ima'enukwaw putar nerehe wà nehe.
13Erepu'àm putar Zeruzarez ipuhareko pà nehe. Ipuhareko haw 'ar uhem kwez kury. 'Ar ikatu ma'e uhem tuwe kwez kury.
14Amo weityk tawhu imumaw pà wà. Nezewe rehe we neremiruze'eg uzamutar Zeruzarez wà. Amo uzukazuka wà, Nezewe rehe we upuhareko wà.
15Teko ywy nànànar ukyze putar Tupàn Tuweharupi Wiko Ma'e wi wà nehe. Tuwihawete ywy nànànar ukyze putar ikàgaw wi wà nehe.
16Tupàn Tuweharupi Wiko Ma'e uzapo wi putar Zeruzarez a'e nehe. A'e 'ar mehe wexak kar putar ukàgaw upuràg eteahy haw paw nehe.
17Wenu putar wemiaihu heityk pyrer wà nehe. Uzeapyaka putar izupe waze'eg mehe wà no.
18Tuwe ko ze'eg uzemuapyk pape rehe nehe. Nezewe mehe zanezuapyapyr ukwaw putar Tupàn Tuweharupi Wiko Ma'e hemiapo kwer wà nehe. Nezewe mehe uzexak kar ma'e ràm umume'u putar ikatu haw a'e wà nehe no.
19Tupàn Tuweharupi Wiko Ma'e ume'e ywy rehe wenaw ywate har imonokatu pyrer rehe wapyk mehe. Ywak rehe wiko mehe ume'e ywy rehe.
20Wenu imunehew pyrer wakuhem mehe wà. Zaneàmàtyry'ymar umume'u amo zaneànàm wamàno àwàm wà. Tupàn upyro a'e izuka pyràm wà.
21A'e rupi teko Zeruzarez pe har umume'u putar Tupàn ikatu haw wà nehe. Umume'u putar her a'e pe wà nehe.
22Teko ywy nànànar a'e wà nehe, wanuwihaw a'e wà nehe no, uzemono'og putar a'e pe imuwete katu pà a'e wà nehe.
23Kwàkwàmo romo aikuwe ihe rihi. Nezewe rehe we Tupàn o'ok hekàgaw ihewi. Umuaikwera'i kar hereko haw ihewi.
24O hezar, hereraha zo pe kury. Xo hereko haw iku'aw har zo amumaw. Hezar, ereikuwe putar tuweharupi nehe.
25Izypy mehe erezapo ywy. Nepo pupe erezapo ywak.
26Ywy a'e nehe, ywak a'e nehe no, upaw putar a'e wà nehe. Ne nerepaw pixik kwaw nehe. Ywy ywak izemàner putar kamir ài wà nehe. Aze kamir owok, xityk. Nezewegatete ereityk putar ywy ywak ne wà nehe no.
27Nerezeapo pixik kwaw amo ae ma'e romo. Tuweharupi ereiko nezàwegatete. Nereko haw nupaw pixik kwaw nehe.
28Zanera'yr wiko putar ikatu 'ym ma'e wi ukyze 'ym pà wà nehe. Erezekaiw putar wazuapyapyr wanehe tuweharupi ne wà nehe.
