1Zegar haw Tawi hemiapo kwer O Tupàn, herenu pe newe heze'eg mehe nehe. Ezapo tuwe ma'e hereminoz nehe.
2Ezeapyaka katu herehe nehe. Ewazar heze'eg nehe. Ma'erahy heremipuraraw nahemupytu'u kar kwaw a'e.
3Aryryryryz ihe, heàmàtyry'ymar hezuka àwàm imume'u haw henu mehe ihe. Ihewe heàmàtyry'ymar wanemiapo ikatu 'ym ma'e a'e, hezuhaw a'e. Umu'ar kar iaiw haw herehe wà. Wikwahy ihewe wà. Na'iakatuwawahy kwaw herehe wà no.
4Hepy'a tynehem hekyze haw pupe. Hemàno haw wi hekyze haw u'ar herehe a'e.
5Akyze tuwe ihe. Aryryryryz teko. Hekyze haw uzeapo hezar romo.
6Na'e aze'eg ihe. — Aze mo apuner hewewe haw rehe pykahu ài, awewe mo hepytu'u àwàm me.
7Àzàn mo muite xe wi. Ywyxiguhu rehe aikuwe mo.
8Na'arewahy aikar mo hemimaw ywytu wi ihe, Ywytuaiw wi ihe, a'e hezeupe ihe.
9Hezar, emumaw a'e teko wanemiapo putar haw nehe. Emuaiw uzeupeupe waze'egaw nehe no, Ta'e aexak puruzuka haw tawhu pe ihe xe. Aexak zeàmàtyry'ymaw a'e pe ihe no.
10'Aromo, pyhaw no, a'e teko wata oho waiko pàrirogaw iapyr wà, pàrirogaw tawhu izywyr har rehe wà. Tawhu tynehem iaiw paw pupe. Tynehem ma'erahy pupe no.
11Heta tetea'u ma'emumaw paw tawhu pe. Ma'eme'egaw tynehem purehe imunar ma'e pupe. Tynehem purupe hemu'em ma'e pupe no.
12Herehe uze'eg urywahyahy ma'e a'e, nuiko kwaw heàmàtyry'ymar romo a'e. Aze mo wiko, apuner mo henu haw rehe hezàn 'ym pà ihe. Herehe uze'eg zemueteahy ma'e nuiko kwaw hekutyr har romo a'e. Aze mo wiko, azeàmim mo izuwi ihe.
13Ne hemyrypar ne, ereiko herehe uze'eg urywahyahy ma'e romo ne. Ne herehe we har ne, herupi wata ma'e ne, ereiko herehe uze'eg zemueteahy ma'e romo ne.
14Izypy mehe zaha teko wanupi Tupàn imuwete katu pà hàpuzuhu pupe. Zaze'eg zanezeupeupe ikatu haw rupi zane no.
15Tuwe màno haw ur na'arewahy heàmàtyry'ymar wanehe nehe. Tuwe wikuwe putar umàno ma'e kwer wapyta haw pe oho mehe wà nehe, ta'e ikatu 'ymaw upyta wanàpuz me xe. Upyta wapy'a pupe no.
16Aze'eg Tupàn Tuweharupi Wiko Ma'e pe hepytywà àwàm henoz pà izupe. Hepyro a'e.
17Ku'em mehe ihe, kwarahy wapyter pe hin mehe ihe no, pyhaw ihe no, Azai'o heremipuraraw rehe heze'eg pà ihe. Herenu a'e.
18Hererur hekutuk kar 'ym pà zeàmàtyry'ymawhu wi a'e. Heàmàtyry'ymar heta tetea'u wà. Nezewe rehe we hepyro wanuwi a'e.
19Tupàn, 'Ar ipy henataromo har, pureruze'eg ma'e a'e, herenu a'e. Weityk heàmàtyry'ymar a'e wà. Ta'e na'ipurumukatu wer kwaw weko haw rehe a'e wà xe. Nukyze kwaw Tupàn wi wà.
20Herehe we arer kwehe arer uzàmàtyry'ym umyrypar wà. Nuzapo kwaw ma'e uze'eg umyrypar wanupe wemimume'u kwer rupi a'e.
21Ize'eg ikatu wera'u tapi'ak kamykwer ikawer wi a'e. Nezewe rehe we ipy'a pe heta purehe iakatuwawahy 'ymaw. Ize'eg ihym wera'u ma'e kawer wi a'e. Nezewe rehe we omonohok ma'e takihe haime katu ma'e ài.
22Aze zawaiw katu nereko haw nehe, emume'u Tupàn Tuweharupi Wiko Ma'e pe nehe. Nepytywà putar nehe. Numu'ar kar pixik kwaw weruzar har wà.
23Ne, o Tupàn, ereityk putar Puruzuka ma'e umàno ma'e kwer wapyta haw iwy pe nehe. Numumaw kwaw ukwarahy iku'aw har wiko pà wà nehe. Ihe zote azeruzar putar nerehe nehe.
