1Zegar haw Tawi hemiapo kwer Hezar heruwihawete, amume'u putar nehua'u haw nehe. Tuweharupi amume'u putar nekatu haw newe nehe.
2Tuweharupi amume'u putar nekatu haw newe nehe. Amume'u putar nekatu haw purupe tuweharupi nehe no.
3Tupàn Tuweharupi Wiko Ma'e uhua'u a'e. Tuwe teko umume'u ikatu haw wà nehe. Teko nupuner kwaw uhua'u haw ikwaw paw rehe wà.
4O Tupàn, awakwer umume'u putar neremiapo kwer wa'yr wanenataromo wà nehe. Teko paw umume'u putar neremiapo kwer ikàg ma'e wà nehe.
5Uze'eg putar nekàgaw rehe nepuràg eteahy haw rehe wà nehe. Uze'eg putar tuwihawete upuner ma'e romo nereko haw rehe wà nehe no. Hema'enukwaw putar neremiapo kwer ikatuahy ma'e wanehe nehe.
6Uze'eg putar neremiapo kwer ikàg ma'e wanehe wà nehe. Amume'u putar nehua'u haw nehe.
7Uze'eg putar nekatu haw uhua'u ma'e rehe wà nehe. Uzegar putar urywete haw rupi puruwi nepuir pixik 'ymaw rehe nehe.
8Tupàn Tuweharupi Wiko Ma'e ikatu a'e. Upurupuhareko katu tuwe no. Iàrew wikwahy pà. Upuruamutar katu tuweharupi.
9Tupàn Tuweharupi Wiko Ma'e ikatu teko paw wanupe. Uzekaiw katu wemiapo kwer paw wanehe no.
10O Tupàn Tuweharupi Wiko Ma'e, ma'e wikuwe ma'e paw umume'u putar nekatu haw wà nehe. Neremiaihu nerehe uzeruzar ire upytu'u 'ym ma'e wà nehe no, umume'u putar nekatu haw newe wà nehe no.
11Teko paw uze'eg putar nepureruze'egaw ikàgaw rehe wà nehe, ipuràg eteahy haw rehe wà nehe no. Umume'u putar nepuner haw purupe wà nehe.
12Nezewe mehe ywy nànànar ukwaw putar neremiapo kwer ikàg ma'e wà nehe. Ukwaw putar nepureruze'egaw uhua'u haw wà nehe, ipuràg eteahy haw wà nehe no, ikàgaw wà nehe no.
13Nepureruze'egaw nupaw pixik kwaw nehe. Ereiko putar tuwihawete romo tuweharupi nehe. Tupàn Tuweharupi Wiko Ma'e uzapo ma'e uze'eg rupi katete tuweharupi a'e. Wyzài ma'e iapo mehe nupuir kwaw wemiaihu wanuwi a'e.
14Upytywà teko a'e wà, aze waneko haw zawaiw katu wanupe. Umupu'àm u'ar ma'e kwer wà.
15Ma'e wikuwe ma'e paw ume'e hehe hemiapo ràm ikatu ma'e hàro pà wà. Omono temi'u a'e ma'e wanànàn, aze ima'uhez wà no.
16Wamumai'u mehe, Ukatu haw rupi umuhyk kar wama'e wanemi'u rehe we a'e, wikuwe ma'e nànàn a'e.
17Tupàn Tuweharupi Wiko Ma'e ikatuahy wyzài ma'e iapo mehe. Wyzài ma'e iapo mehe nupuir kwaw wemiaihu wanuwi a'e.
18Upyta wemiaihu paw wanuwake a'e, Aze wenoz tuwe upytywà àwàm izupe wemu'em 'ym pà wà nehe.
19Tupàn omono wanemimutar wanupe upaw rupi a'e, aze ukyze izuwi a'e wà. Wenu wanehapukaz mehe màno haw wi wapyro pà wà.
20Aze amo uzamutar katu Tuweharupi Wiko Ma'e wà, uzekaiw wanehe a'e wà. Umumaw putar ikatu 'ym ma'e wà.
21Amume'u putar Tupàn Tuweharupi Wiko Ma'e ikatu haw tuweharupi nehe. Tuwe wikuwe ma'e paw umume'u her ikatu ma'e ikatu haw tuweharupi wà nehe no.
