1Zegar haw Azaw hemiapo kwer O Tupàn, epyta zo urewe neze'eg 'ym pà nehe. Epytu'u zo neze'eg ire nehe. Epytu'u zo ikatu ma'e urewe iapo re nehe, o Tupàn.
2Eme'egatu kury. Neàmàtyry'ymar uzemumymumyz waiko wà kury. Nerehe iakatuwawahy 'ym ma'e uwak putar nekutyr wà nehe kury.
3Umume'u neremiaihu wanupe wemiapo ràm ikatu 'ym ma'e waiko wà. Ipurapo wer ikatu 'ym ma'e rehe neremipyro kwer wanupe wà.
4Nezewe uze'eg wà. — Pezur nehe. Ximumaw teko Izaew izuapyapyr zane wà nehe. Nezewe amogwer teko heharaz putar waner wi wà nehe. Na'ima'enukwaw pixik kwaw wanehe wà nehe, i'i wà.
5Waàmàtyry'ymar uzemono'og wemiapo ràm ikatu 'ym ma'e imume'u pà uzeupeupe wà. Neàmàtyry'ymar paw umume'u neàmàtyry'ym àwàm uzeupeupe wà. Na'aw neàmàtyry'ymar waner xe wà:
6Teko Enom izuapyapyr wà. Teko Izimaew izuapyapyr wà. Teko Moaw izuapyapyr wà. Teko Agar izuapyapyr wà.
7Teko Zemaw izuapyapyr wà. Teko Amon izuapyapyr wà. Teko Amarek izuapyapyr wà. Teko Piri ywy rehe har wà. Teko Xir tawhu pe har wà.
8Teko Axir her ma'e uzemono'og Iro izuapyapyr wapyr wà. Ikàg uzeinuiromo Amon izuapyapyr wanehe we wà, Moaw wanehe we wà no.
9O Tupàn, kwehe mehe eremumaw Minià izuapyapyr ne wà. Ezapo nezewe haw a'e teko wanupe nehe no. Kwehe mehe erezuka kar Xi ne. Erezuka kar Zamim yrykawhu Kizom her ma'e huwake no. Ezapo nezewe haw a'e teko wanupe nehe no.
10Eremumaw a'e zauxiapekwer Enor ywy rehe ne wà. Wanetekwer inem ywy rehe wà.
11Kwehe mehe erezuka kar Orew Zeew rehe we ne. Ezapo nezewe haw zauxiapekwer wanuwihaw wanupe nehe no. Eityk wanuwihaw paw rupi ne wà nehe, Zema heityk awer zàwe nehe, Xaramun heityk awer zàwe nehe no.
12A'e tuwihaw uze'eg nezewe uzeupeupe wà. — Xipyhyk Izaew waywy nehe, Tupàn ima'e ipyhyk pà nehe, i'i uzeupeupe wà.
13O Hezar, emuhàmuhàz a'e teko ywyku'i ài nehe. Ywytu weraha ka'akyr uxinig ma'e muite a'e. Eraha a'e teko nezewe ne wà nehe no.
14Tata wapy ka'a a'e. Tatareny uhua'u ma'e ukaz ywytyr rehe no.
15Nezewe eho wanaikweromo ywytuaiw ài nehe. Emukyze kar nekwahy haw ywytuaiw zàwenugar wi ne wà nehe.
16O Tupàn Tuweharupi Wiko Ma'e, emumaranugar ne wà nehe. Nezewe mehe, — Ereiko ikàg wera'u ma'e romo ne, i'i putar newe wà nehe.
17Tuwe ereityk wamumaranugar kar pà ne wà nehe. Tuwe na'ikàg pixik kwaw wà nehe. Tuwe umàno maranugar haw uhua'u ma'e wy pe wà nehe.
18Tuwe ukwaw Tupàn Tuweharupi Wiko Ma'e romo nereko haw wà nehe. Xo ne zo ereiko Tupàn Tuweharupi Wiko Ma'e romo ne. Ereiko Ywate Wera'u Har ywy nànànar waneruze'egar romo ne. Tuwe ukwaw nereko haw wà nehe.
