1Zegar haw Tawi hemiapo kwer O Tupàn, ereiko hezar romo ne. Hereko wer tuwe nerenataromo ihe. Azeharomoete hereko wer nerehe we. Herekwe neputar a'e. Neputar haw nuzawy kwaw heiwez haw. Nazawy kwaw ywy uxinig ma'e kwer 'y hereko 'ymar. Uruputar 'y ài ihe.
2Hepuruexak wer nerehe neràpuzuhu pupe. Hepuruexak wer nekàgaw rehe. Nepuràg eteahy haw rehe hepuruexak wer.
3Heamutar katu pe ne. Heamutar katu haw ikatu wera'u ihewi a'e, herekuwe haw wi a'e. A'e rupi amume'u putar nekatu haw nehe.
4Herekuwe mehe we aze'eg putar nekatu haw rehe ihe nehe. Aupir putar hepo newe heze'eg pà nehe.
5Ikatu ma'e ihewe neremimur nuzawy kwaw temi'u hete katu ma'e. Uhyk ihewe. A'e rupi amuzàg nekatu haw rehe zegar haw herurywete haw rupi newe ihe.
6He'aw mehe, hema'enukwaw nerehe ihe. Amumaw pytun gatu nerehe hema'enukwaw pà.
7Ta'e hepytywà pe tuweharupi ne xe. Azegar herurywete haw rupi nepepo wy pe ihe.
8Nepo awyze har hepyhyk katu a'e. Urupyhyk katu ihe no.
9Herehe ipuruzuka wer ma'e a'e wà nehe, Wezyw putar umàno ma'e kwer wapyta haw pe a'e wà nehe.
10Zauxiapekwer uzuka putar a'e teko zeàmàtyry'ymawhu pe a'e wà nehe. Zawar zàwenugar hehaite ma'e u'u putar wanetekwer wà nehe.
11Tuwihawete hurywete putar a'e nehe, ta'e Tupàn umur iàmàtyry'ymar waneitykaw izupe a'e xe. Teko Tupàn her rehe wemiapo ràm imume'u har hurywete putar a'e wà nehe. Tupàn uwàpytym putar hemu'em ma'e wazuru a'e wà nehe.
