1Pemume'u Tupàn Tuweharupi Wiko Ma'e ikatu haw nehe. Ikatu zanezar pe ikatu haw rehe zanezegar haw. Imume'u haw zanemurywete a'e, ikatu a'e no.
2Tupàn Tuweharupi Wiko Ma'e uzapo wi Zeruzarez tawhu hereko a'e. Werur wi wemiaihu waneruwà wanereko a'e pe wà. Uhàuhàz hemiaihu amo ae ywy nàn ipyhyk pyrer romo wà.
3Umukatu uzemumikahy tuwe ma'e wà. Omono muhàg wakutuk awer rehe a'e, wakixi awer rehe a'e.
4A'e ae umume'u zahytata waneta àwàm kwehe mehe a'e. Omono waner wanupe pitàitàigatu wà no.
5Tupàn Zanezar a'e, uhua'u a'e. Upuner a'e no. Ni amo nupuner kwaw ima'ekwaw paw ikwaw paw rehe wà.
6Tupàn Tuweharupi Wiko Ma'e umukàg ikàg 'ym ma'e wà. Ukamik ikatu 'ym ma'e ywy rehe wà.
7Pemuzàg zegar haw Tupàn Tuweharupi Wiko Ma'e pe ikatu haw imume'u pà nehe. Pemupu pewioràwiràn zanezar pe ikatu haw rehe zegar haw imuzàg pà nehe.
8Upyk ywak ywàkun pupe a'e. Umugyr kar àmàn ywy rehe. Umuezuz kar ka'api'i ywytyruhu rehe.
9Omono temi'u ma'ea'yr wanupe. Opoz zàpuuna'ya'yr wemi'u henoz mehe wà.
10Kawaru ikàg ma'e nuiko kwaw Tupàn imurywete kar har romo wà. Zauxiapekwer ukyze 'ym ma'e numurywete kar kwaw Tupàn wà.
11Izuwi ukyze ma'e a'e wà, a'e ae umurywete kar a'e wà. Ipuruamutar katu haw rehe uzeruzar ma'e a'e wà, a'e ae umurywete kar a'e wà.
12Emume'u Tupàn Tuweharupi Wiko Ma'e ikatu haw nehe, o Zeruzarez tawhu. Emume'u nezar ikatu haw nehe, o Xiàw ywytyr,
13Ta'e umukàg tawhu hukenaw a'e xe. Omono uze'egatu teko a'e pe har wanehe no.
14Numuixe kar kwaw waàmàtyry'ymar waywyzaw rupi wà. Omono arozràn ikatu wera'u ma'e wemiaihu wanupe wanemi'u ràm romo.
15Tupàn Tuweharupi Wiko Ma'e umume'u wemiapo putar haw purupe a'e. Aze iho wer amo me, uhem na'arewahy a'e pe.
16Umugyr kar àmànxig àràpuhàràn hawitu zàwenugar. Umuhàmuhàz zuwiri huwixàg ma'e ywyku'i ài.
17Umur kar àmànita a'e, 'y tàtà huwixàg ma'e ikaika pyrer a'e. Tuwixàgaw imur mehe ni amo teko nupuner kwaw izupe wà.
18Umume'u wemimutar. Na'e 'y tàtà huwixàgahy ma'e typyràn na'arewahy. Umur kar ywytu. Umuyryk kar 'y.
19Tuweharupi Wiko Ma'e umume'u uze'eg Zako izuapyapyr wanupe. Omono wemiapo putar haw Izaew wanupe. Omono uze'eg wanupe no.
20Nuzapo pixik kwaw agwer ma'e amo ae ywy rehe har wanupe. Amogwer ywy rehe har nukwaw kwaw ize'eg wà. Pemume'u Tupàn Tuweharupi Wiko Ma'e ikatu haw nehe.
