1Zegar haw Tawi hemiapo kwer Hepuhareko pe nehe, o Tupàn, Ta'e heàmàtyry'ym waiko a'e wà xe. Heàmàtyry'ymar herekar waiko tuweharupi wà.
2Heàmàtyry'ym waiko 'ar rehe katu wà. Heàmàtyry'ymar heta tetea'u wà.
3Hekyze mehe azeruzar nerehe ihe, O Tupàn Upuner Wera'u Ma'e.
4Azeruzar Tupàn rehe. Amume'u hemimume'u kwer ikatu haw no. Azeruzar hehe. Nakyze kwaw ma'e wi nehe. Teko nupuner kwaw ikatu 'ym ma'e ihewe iapo haw rehe wà. Na'ikàg kwaw Tupàn zàwe wà.
5Heàmàtyry'ymar umuaiw hema'ereko haw ihewe 'ar rehe katu wà. Xo ikatu 'ym ma'e ihewe wemiapo ràm rehe zo ima'enukwaw wà.
6Uzeàmim muite teko wanuwi uzemono'og pà wà. Ume'e heremiapo rehe wà. Hezuka haw 'ar wàro waiko wà.
7O Tupàn, ezepyk a'e teko wanehe wakatu 'ymaw hekuzaromo nehe. Eityk a'e teko nekwahy haw pupe ne wà nehe.
8Erekwaw hereko haw. Ma'erahy apuraraw teko. Erexak herehaykwer paw rupi ne. Aipo neremuapyk kwaw herehaykwer nepape rehe.
9Aenoz hepytywà àwàm newe. Henoz mehe heàmàtyry'ymar uzàn putar oho newi wà nehe. Pitài ma'e akwaw ihe: Tupàn wiko herehe we a'e.
10Amume'u Tupàn Tuweharupi Wiko Ma'e hemimume'u kwer ikatu haw ihe.
11Azeruzar hehe. Nakyze kwaw ma'e wi nehe. Teko nupuner kwaw ikatu 'ym ma'e iapo haw rehe ihewe a'e wà, ta'e na'ikàg kwaw Tupàn zàwe a'e wà xe.
12O Tupàn, amono putar ma'e heremimume'u kwer newe ihe nehe. Amono putar ma'e newe nekatu haw imume'u haw romo nehe.
13Ta'e hepyro pe hemàno haw wi ne xe. Hemunyryk pe hereitykaw wi ne no. Nezewe, o Tupàn, ata neruwarupi ihe. Ata tatainy purumuigo kar ma'e rehe we no.
