1Zegar haw Tawi hemiapo kwer Amume'u nekatu haw, o Tupàn. Epyta zo neze'eg 'ym pà nehe.
2Ikatu 'ym ma'e a'e wà, hemu'em ma'e a'e wà no. Uze'eg hekutyr a'e wà. Umume'u temu'emaw herehe wà.
3Umume'u mua'u iaiw ma'e heremiapo kwer wà. Heàmàtyry'ym e wà.
4Aiko wamyrypar romo ihe. Umekuzar hekatu haw ikatu 'ym ma'e pupe wà. Nezewe rehe we aze'eg newe ikatu ma'e wanupe neremiapo ràm henoz tà ihe.
5Omono ikatu 'ym ma'e ikatu ma'e hekuzaromo wà. Omono purehe iakatuwawahy 'ymaw puruamutar haw hekuzaromo wà.
6O Tupàn, exaexak amo awa imunar ma'e hemu'em ma'e nehe. Emuigo kar a'e awa tàmuz romo heàmàtyry'ymar wanehe zepykaw imume'u mehe nehe. Tuwe heàmàtyry'ymar iàmàtyry'ymar wiko hemiapo kwer ikatu 'ym ma'e imume'u har romo nehe.
7Hemiapo kwer imume'u mehe, tuwe tàmuz uzepyk hehe wà nehe. — Te Tupàn pe neze'egaw iaiw a'e no, tuwe i'i tàmuz izupe wà nehe.
8Tuwe heàmàtyry'ymar umàno na'arewahy nehe. Tuwe amo teko wiko hekuzaromo nehe.
9Tuwe ta'yr wiko tu 'ym ma'e romo wà nehe. Tuwe hemireko wiko imen 'ym ma'e romo nehe no.
10Tuwe ta'yr wiko hàpuz 'ym ma'e romo wà nehe. Tuwe wiko temetarer nahu rupi henoz tar romo wà nehe. Tuwe amo umuhem kar ta'yr wanàpuz heityk pyrer wi wà nehe, waneko haw wi wà nehe.
11Tuwe tuwihaw o'ok heàmàtyry'ymar ima'e paw izuwi wà nehe, inewer haw imekuzar pà wà nehe. Umumaw kwarahy tetea'u uma'ereko katu pà uma'e imono'og pà. Tuwe amo ae ywy rehe har upyro ima'e izuwi a'e wà nehe.
12Tuwe ni amo teko na'ikatu kwaw izupe wà nehe. Tuwe ni amo nuzekaiw kwaw ta'yr wanehe tazyr wanehe imàno re wà nehe.
13Tuwe izuapyapyr paw umàno na'arewahy wà nehe. Tuwe teko paw heharaz her wi tàrityka'i wà nehe no.
14Tuwe Tupàn Tuweharupi Wiko Ma'e naheharaz pixik kwaw ihy hemiapo kwer ikatu 'ym ma'e wi nehe. Tuwe ima'enukwaw izypy wanemiapo kwer ikatu 'ym ma'e rehe upytu'u 'ym pà tuweharupi nehe.
15Tuwe Tupàn Tuweharupi Wiko Ma'e ima'enukwaw wanemiapo kwer ikatu 'ym ma'e rehe nehe. Tuwe teko heharaz iapo arer wanuwi wà nehe.
16A'e awa na'ipurapo wer pixik kwaw ikatu ma'e rehe a'e. Upuraraw kar ma'erahy ma'e hereko 'ymar wanupe, hemetarer 'ym ma'e wanupe no, hemi'u 'ym ma'e wanupe no. Uzuka wà no.
17Teko wanehe ze'egaiw imono haw ikatu izupe. Tuwe a'e ze'egaiw u'ar a'e awa rehe nehe. Teko wanehe ze'egatu imume'u haw na'ikatu kwaw izupe. Tuwe ni amo nomono kwaw ze'egatu hehe wà nehe.
18Ze'egaiw imono haw nazawaiw kwaw izupe. Nuzawy kwaw ukamir imunehew paw izupe. Tuwe uze'egaiw uzewyr hehe u'ar pà 'y ài nehe. Tuwe umuàkym ikàg wer uri kawer ài nehe.
19Tuwe ze'egaiw nuhem pixik kwaw izuwi nehe. Tuwe ze'egaiw upyk a'e awa ikamir ài nehe. Tuwe uzàpixipixi uzar iku'aw har ài nehe.
20O Tupàn Tuweharupi Wiko Ma'e, emekuzar heàmàtyry'ymar wanemiapo kwer nezewe nehe. Ezepyk herehe uze'eg zemueteahy ma'e wanehe nehe.
21O hezar Tupàn Tuweharupi Wiko Ma'e, Hepytywà pe neze'eg awer rupi katete nehe, hepyro pà nehe, Ta'e nekatuahy ne xe, ta'e erepuruamutar katu ne xe.
22Hemetarer 'ym ma'e romo aiko. Naheta kwaw ma'e ihewe. Ikutuk pyrer ài aiko hepy'a pe.
23Kwarahy heixe etea'i mehe ukàzym ma'e'àg oho. Nezewegatete akàzym teko ihe. Ywytu hereraha herereko tukur ài.
24Hepenàràg uryryryryz iko ta'e azekwaku tetea'u hemai'u 'ym pà ihe xe. Heretekwer ukàzym oho iko ta'e heagaiwahy ihe xe.
25Amogwer uze'eg urywahyahy herehe herexak mehe wà. Weruwaruwak uwàkàg herehe upukapuka mehe wà.
26Hepytywà pe nehe, o Tupàn Tuweharupi Wiko Ma'e hezar. Hepyro pe nehe, ta'e heamutar katu pe ne xe.
27Tuwe heàmàtyry'ymar Ukwaw hepyro har romo nereko haw a'e wà nehe.
28Upuner ze'egaiw herehe imur haw rehe wà. Ne eremur neze'egatu herehe nehe. Tuwe heàmàtyry'ymar uzeityk kar oho amo wanupe wà nehe. Ihe neremiruze'eg ihe, tuwe herurywete ihe nehe.
29Tuwe iaiw haw tetea'u u'ar heàmàtyry'ymar wanehe nehe. Tuwe maranugar haw upyk kamir ài wà nehe no.
30Amume'u Tupàn Tuweharupi Wiko Ma'e ikatu haw izupe wahy haw rupi nehe. Amume'u putar ikatu haw teko wazemono'og mehe nehe,
31ta'e weityk hemetarer 'ym ma'e waàmàtyry'ymar a'e wà xe, A'e hemetarer 'ym ma'e wapyro pà wamàno haw pe wamono kar har wanuwi a'e xe.
