1Ala kava nefekeꞌmo hao ke heyo. Agaefekeꞌmo ge hiyo. Huꞌniya kavafeꞌmo ava gemo afisayafeꞌmo muki alu nofi vaya alu nofi vayaꞌaifeꞌmo aeta hakalo hutapa hapa paiyo.
2Agaefekeꞌmo yoke huge samu yokemo huge hiyo. Lapau neꞌaiya kavaꞌae kavaꞌaeꞌmo ava gemo hiyo.
3Aote agiꞌalefeꞌmo ala lapakitapimo alitetapa lapamogaga aiyo. Ala kava nefeꞌmo kahauya nehaya vayaꞌmogimo apamogaga aiyo.
4Ala kava netegamo utapa himamuꞌamo alisayafeꞌmo kahauya hutapa maiyo. Augosamo agesayafeꞌmo kahauya hiyo.
5Emalehamuꞌa Ala kava neꞌmo aliꞌyaꞌamo neꞌaliya vekaꞌamo aginago vayaꞌamogitapae, huꞌna, Yekopuꞌa lekana paino ateꞌniya vekamo aginago vayaꞌamogitapae, huꞌna, lokiya kavaꞌaꞌe aune kavaꞌaꞌefeꞌmo lapakesamo afiyo. Alino fako huno apateteno ani kavaꞌmo hiyo, huno huꞌniya geꞌaeꞌmo lapakesamo afiyo.
7Agaemo Ala kava netimo Gotitimoꞌae. Agaemo muki ma mopafi vayaꞌmo alino fako huno apateteno ani kavaꞌmo hiyo, huno nehiye.
8Agaemo muki afinaꞌmo agaiꞌa kotalake geꞌaeꞌmo agesamo afiteno oꞌataleno akame huno neꞌmaiye. Vayaꞌmo afole aite afole aite hume hume neꞌvisagenoꞌaeꞌmo afole aino, huno huꞌniya geeꞌmo age okanino agesamo afino maiꞌniye.
9Agaemo Emalehamuꞌeꞌmo kotalake gemo hu maleteno Emalehamu mafaꞌneꞌamo Aisikifeꞌmo ani kavaꞌmo huguve, huno hu maleteno Aisiki mafaꞌneꞌamo Yekopufeꞌmo hanege hanege huno hanesiya kotalake geꞌamo hu maleꞌniye.
11Kenani mopamo aliꞌna hakiꞌna lapamisugeno lapakaitapi mopatapimo hanegaiye, huno ha paiꞌniye.
12Aise vayaꞌamogi ina agufa nata vayaꞌmo maiꞌneꞌapaeꞌmo uꞌa mago nofi vayaꞌai mopaleꞌmo maigeꞌa atale uꞌa mago alu nofi vayaꞌai mopaleꞌmo maigeꞌa atale uꞌa ani kava huꞌa mago kini vekamoꞌa yagaiꞌniya mopaleꞌmo uꞌa maigeꞌa atale uꞌa mago alu kini vekamoꞌa yagaiꞌniya mopaleꞌmo maige maige huꞌa maiꞌnae.
14Ani kava huꞌa maiꞌnayaꞌmonanafa Ala kava neꞌmoꞌa agaiꞌa vayaꞌaiteꞌmo hosu kavaꞌmo huꞌa yagaiꞌa oꞌatesayafeꞌmo oꞌataleno yagaino apateꞌniye.
15Inagi yagaiꞌa neꞌapataya kini vayaꞌaifeꞌmo, uvelimo faleꞌna apateꞌnova vayaꞌmo apame oꞌaliyo. Nagaetegati gemo alini eꞌa aeꞌa hakalo huꞌa hapa nepaiya vayaꞌmo maitapa halove hutapa apatetetapa hanageke yaꞌmo alitapa oꞌapamiyo, huno ke hapauꞌniye.
16Ala kava neꞌmoꞌa, kafu hisaya kavaꞌmo aliꞌna afole aiꞌna ategauve, huno agesamo afiteno hogoteno vayaꞌamo hapa maesiya vekamo Yosefeꞌmo alino ateꞌnigeno uꞌniye. Yosefe nepuꞌamogimo avaleꞌa alu nofi vayaꞌmo apamiꞌnageꞌa kalavusi aliꞌyaꞌmo alisiya mafaꞌnemo maisiyafeꞌmo miya faiꞌa avaleliꞌa uꞌnae.
18Isipi kotegamo uno maiꞌnigeꞌa kalavusi huꞌa ateteꞌapaeꞌmo aiyalateꞌmo seli nofitetiꞌmo kiꞌa ateꞌnageno lusi kava huno kana hauꞌniye.
19Ani kava huno maiꞌnigenoꞌaeꞌmo Ala kava neꞌmoꞌa amalageka huno ateme ateme neꞌvigenoꞌaeꞌmo afole aigiye, huno huꞌniya kavaꞌmo afole aiꞌniye.
20Hogote kini vekamoꞌa aliꞌyaꞌamo neꞌaliya vekaeꞌmo, hatu maeka ato, huteno alino ateꞌnigeno uno Yosefeꞌmo hatu maeno ateꞌniye.
21Hatu maeno atetenoꞌaeꞌmo, muki Isipi mopaleꞌe vayaꞌaiteꞌeꞌmo yagaika apato, huno ha paiꞌnigeno Yosefeꞌa hogote gamani vayaꞌmo maiꞌneꞌa yagaiꞌa neꞌataya vayaꞌaiteꞌeꞌmo yagaino apateteno vayatama vayaꞌmo alino apaya maleꞌniye.
23Ani kava huno yagaino apateꞌnigeꞌapaeꞌmo Isaleli vayaꞌmo Isipi kotegamo eꞌnae. Yekopuꞌe muki afamo anaga vayaꞌaꞌeꞌmo eꞌa Hamu aginago vayaꞌai mopaleꞌmo Isipi kotegamo maiꞌnae.
24Maiꞌnagenoꞌaeꞌmo Ala kava neꞌmoꞌa vayaꞌamo hapa maeꞌnigeꞌa asole mafaꞌnemo aliꞌa apateꞌnageꞌa aiꞌa atagu faeꞌa maiteꞌa lokiya vayaꞌmo hamaleteꞌa kame vayaꞌapimo aeꞌa apakaseꞌnae.
25Agaemo Isipi vayaꞌai apaipa apakesamo alino afe leno apateꞌnigeꞌapaeꞌmo agaiꞌa vayaꞌaitegamo apaini huꞌa apateteꞌa aliꞌyaꞌamo neꞌaliya vayaꞌaifeꞌmo humi apateꞌnae.
26Agaemo aliꞌyaꞌamo neꞌaliya vekaꞌamo Moseseꞌe lekana paino ateꞌniya vekamo Eloniꞌeꞌmo alino anateꞌnigeꞌana kini vekalegamo uꞌnaꞌae.
27Anakaemo Goti lokiya kavaꞌamo noꞌagaya agufa aune kavaꞌmo Isipi kotegamo huꞌnaꞌae.
28Agaemo hani hisiya kavaꞌmo alino ateꞌnigeno emineno hani huꞌniye. Isaleli vayaꞌmogi geꞌamo oꞌataleꞌa afiꞌnae.
29Agaemo aniꞌmo kola aniꞌmo alino hamaleno ateꞌnigeꞌa noyame anagaꞌmo faliꞌa hano huꞌnae.
30Lokuloku anagaꞌmo aiꞌa atagu faeꞌa muki ani mopaleꞌmo maiꞌneꞌaeꞌmo kini vayaꞌmo nehavaya noꞌapifiꞌmo haiꞌa maiꞌnae.
31Ge huꞌnigeꞌapaeꞌmo asole kosi anaganagi apayokapi nama anaganagi huꞌa eꞌa muki ani mopaleꞌmo aiꞌa atagu faeꞌa maiꞌnae.
32Afa koꞌmo aiyo, huno osuꞌnifa ko mopa koꞌmo aiyo, huno huꞌnigeno muki ani koteꞌmo alino alave huteno lusi ko mopa koꞌmo aiteno nofiꞌe fiki yosaꞌeꞌmo amagiꞌniye. Hafosa haiꞌnigeno muki haopalegamo haneꞌniya yosamo amagino lo aeꞌniye.
34Ge huꞌnigeꞌa asole akenu anagaꞌmo neya akenuꞌage huꞌa lekana opaisuna agufa akenu anagaꞌmogimo eꞌa muki hegafatalili yaꞌe muki hoyalega haneꞌniya neꞌyaꞌapiꞌeꞌmo neꞌa hano huꞌa ataleꞌnae.
36Muki Isipi vayaꞌai yege mafaꞌneꞌapimo apamagiꞌniye.
37Apamagiteno Isaleli vayaꞌmo hatu maeno apateꞌnigeꞌa Isipi kotegamo ataleꞌa ugefeꞌmo nehuꞌapaeꞌmo Isipi vayaꞌai siluva yafaꞌapiꞌe goli yafaꞌapiꞌeꞌmo aliniꞌa uꞌnae. Muki vayaꞌamo kaita ohapauꞌnigeꞌa lokiya vaiꞌa maiꞌneꞌa uꞌnae.
38Isipi vayaꞌmogimo apakaefeꞌmo lusi kava huꞌa koli huꞌnayaꞌmofeꞌmo Isaleli vayaꞌmo apataleꞌa neꞌvageꞌapaeꞌmo apamogaga aiꞌnae.
39Gotiꞌa muki felugaꞌamo ulunapiꞌmo uge maige hisayafeꞌmo hiyatetiꞌmo aino apati kaeteno muki haniꞌilagaꞌamo aeno ha leno apatesiyafeꞌmo kokuꞌnapatiꞌmo ata leꞌnigeno aeno ha leno apateꞌniye.
40Apakaemo Gotifeꞌmo afi geꞌnagenoꞌaeꞌmo hifakana agufa nama anagaꞌmo apateꞌnigeꞌa haleli uꞌa maiꞌnageꞌa apatafauꞌa kaeꞌa neꞌnae. Agaemo lusi neꞌyaꞌmo kokuꞌnapatiꞌmo alino apamiꞌnigeꞌa aliꞌa neꞌa apamu huꞌnae.
41Agaemo aniꞌmo ohaneꞌniya kotegamo yafapiꞌmo amagino apalo atiꞌnigeno yafapatiꞌmo alopa anikefamo emineꞌnigeꞌa neꞌnae.
42Agaemo aliꞌyaꞌamo neꞌaliya vekaꞌamo Emalehamufeꞌmo ani kavaꞌmo huguve, huno hu maleꞌniya geꞌaeꞌmo agesamo afiꞌniyaꞌmofeꞌmo ani kavaꞌmo huꞌniye.
43Ani kava nehunoꞌaeꞌmo vayaꞌamo apavalelino neꞌvigeꞌapaeꞌmo lekana paino apateꞌniya vayaꞌamogimo yoke huꞌa apamogaga aiꞌnae.
44Agaemo alu nofi vaya alu nofi vayaꞌai mopamo alino apamiꞌnigeꞌa hoyaꞌapiꞌeꞌmo aliꞌnae.
45Geꞌamo afiteꞌa keꞌaepa geꞌamo akame hisayafeꞌmo ani kavaꞌmo huꞌniye. Ala kava neꞌmo agiꞌaleꞌmo alita asaga hutapa ateyo.
