1Gibit theingks langa YAWEI. Dalimbat ebribodi blanga im haibala pawa. Dalim pipul langa ebri kantri wanim imbin dum.
2Sing preis langa YAWEI. Dalim ebribodi blanga ola gudbala ting weya imbin dumbat.
3Jidan gudbinji dumaji wi blanga im. Larram ol detlot hu oldei weship im jidan gudbinji.
4Go langa YAWEI blanga album yumob, en kipgon weshipbat im.
5Ol yumob femilimob blanga Eibrahem im wekinmen, en ol yumob femilimob blanga Jeikob, hu imbin pikimat, yumob jinggabat detlot klebabalawan ting weya God bin dum, en det wei blanga im wen imbin oldei jadjimbat pipul.
7YAWEI im na wi God. Im lowa jidan blanga ebribodi langa dijan wel.
8Im garra kipum im strongwan pramis olagijawan. Im pramis blanga ola pipul hu garra kaman bambai du.
9Im garra kipum im wed weya imbin meigim garram Eibrahem, en im pramis garram Aisik.
10YAWEI bin meigim strongwan pramis langa Jeikob, en det pramis na garra jidan olagijawan blanga ola Isreil pipul.
11Imbin tok, “Ai garra gibit yu dijan kantri Keinan, en im garra jidan blanga yu en yu femili olabat weya garra kaman bambai.”
12Ola pipul blanga God bin jidan oni lilbit. Olabat bin streinja langa det kantri Keinan.
13Deibin oldei wokaranbat brom wan kantri raidap langa naja kantri.
14Bat God nomo bin larram enibodi tridim olabat nogudbalawei. Imbin lukaftum olabat en imbin gibit ola king woning.
15Imbin tok, “Nomo ardim ol main pipul weya aibin pikimat. Nomo tatjim ol main mesinjamob.”
16YAWEI bin meigim olabat kantri jidan nomo garram eni rein, en imbin deigidawei ola daga brom olabat.
17YAWEI bin jandim wan men lida langa olabat langa Ijip blanga seibum im pipul olabat. Det men bin Josef, en im braja olabat bin selim im blanga jidan wekinmen.
18Im fut bin tjeinap en aiyanwan tjein bin raidaran langa im nek,
19raidap det wed weya YAWEI bin tok bin hepin truwan. Det wed YAWEI bin dalim Josef bin hepin trubalawan.
20Brom deya, det king blanga Ijip bin larramgo im fri. Det boswan blanga ola kantri bin meigim im fri.
21Imbin meigim im jidan boswan blanga ol im gabman pipul, en imbin meigim im bos blanga ola kantri,
22en imbin gibit im pawa oba ol det king wekinmen olabat, en blanga dalimbat olabat wanim blanga dum.
23Brom deya Jeikob en im femili olabat bin go langa Ijip en bin jidan deya langa det kantri.
24YAWEI bin gibit langa im pipul olabat detmatj biginini, en imbin meigim olabat mowa strongbala langa ola Ijip pipul.
25Imbin meigim detlot pipul brom Ijip heidim im pipul olabat, en trikibalawei olabat bin meigim nogudwan plen.
26Brom deya imbin jandim im wekinmen Mosis en Eran dubala weya imbin pikimat.
27Dubala bin dumbat ola klebabalawan ting brom God langa Ijip.
28God bin meigim det kantri jidan dakbala, bat detlot pipul brom Ijip nomo bin teiknodis langa im wed.
29Imbin meigim ola riba blanga olabat jidan blad en kilim ded ola fish.
30Blanga olabat kantri bin jidan garram detmatj frog, en det king bigwan haus bin jidan garram ola frog du.
31Wen God bin tok, ola flai en ola lilwan insek bin gaburrumap ol det kantri.
32Imbin jandimdan heilston en laitining langa olabat kantri.
33Imbin binijimap olabat greiptri en figtri en imbin breigimap ola tri.
34Imbin tok, en bigismob grashopa bin kamat,
35en deibin dagat ola plent langa det kantri, en deibin dagat ola gadin.
36YAWEI bin kilim ded ola feswan san blanga ola femili langa Ijip.
37Imbin lidimat ola Isreil pipul brom Ijip, en deibin garrimap silba en gol, en olabat holot bin strongwan en nomo sikwan.
38Detlot pipul brom Ijip bin bradin langa olabat, en deibin gudbinji wen deibin gowei.
39God bin pudum klaud ontop langa im pipul olabat, en faiya naitaim blanga gibit olabat lait.
40Deibin askim im, en imbin jandimdan ola kweil. Imbin gibit olabat daga brom hebin blanga meigim olabat sedisfaid.
41Imbin opinimap bigwan ston en woda bin kamat en randan thru langa deset kantri wulijim riba.
42Imbin jinggabat im seikridwan pramis langa Eibrahem, im wekinmen.
43Imbin lidimat im pipul olabat weya imbin pikimat, en deibin sing en jingat gudbinjiwei.
44Imbin gibit olabat ol detlot kantri blanga najalot pipul, en imbin larram olabat teikoba olabat fam,
45dumaji imbin wandim im pipul olabat blanga teiknodis langa ol im lowa en dum ebrijing im dalim olabat blanga dum. Aleiluya! Preisim YAWEI det trubala God!
