1Wofuŋ daŋge âzâcneniŋ, erâ ʒâŋe‐ticne wâsickeniŋ; wiac bapa‐ticne ŋicne ŋicne mufua‐jareniŋ.
2Gae hecneniŋ, mumumbiaŋ gae hecneniŋ, mâsi sâko‐ticne mutaniŋke‐fâreniŋ.
3Tiri ʒâŋe‐ticne mu ʒeri ecneniŋ, Wofuŋ wira basac ecneeŋgopieŋzi bubiaŋ mananʒepieŋ.
4Wofuŋte â tâpiri‐ticnere fifisacne finʒepieŋ, ʒâŋe maine honeniŋte ʒuʒuhuc jaha henʒiriŋnenʒepieŋ.
5E wiac bipinehec ewec irec manasuniŋ, mâsi bawec â mumutara dâŋ muwec,
6kiŋaŋŋic‐ticne Abraham ɋâricfâcne ŋoŋe hâcne, Jakobore ŋokâfâc, bâwosâecfâc‐ticne ŋoŋe!
7Wofuŋ e hâcne Anutu‐nâŋec, bâbâtiŋ gie‐ticne mâreŋ sâc fua raekac.
8Ʒâʒâfic‐ticnere manasu rahuc juzokac, dâŋ mupaŋkewec i raŋɋa raŋɋa maŋke juzokac, ɋâric biri gaŋne 1000 irec sâc.
9Ʒâʒâfic i Abraham ehec epic, erâ mujomirehuc Isaka mupaŋkecnewec.
10Izi Jakobo sâcmutâc râcnehuc basanaŋkewec, Israehec ʒâʒâfic fofo sanaŋ ewec.
11Ʒiŋuc muhuc: “Go Kanaaŋ mâreŋ garepemu, merâfâcge rauckecmurâ biŋe qagarepo i hâcne.”
12Dameŋ ira afecne mac jumbiŋ, jahec maczi mâreŋ ira jaba jumbiŋ.
13Ŋicguru mockonec mocko ŋe qatara rambiŋ, ŋicwofuŋ mocte uucmaŋkonec ra guru mocko ʒuhuckembiŋ.
14Moczi ro waha âte ejarezacte aka hewec, â jaŋere erâ ŋicwofuŋ bâtiŋ‐jopawec.
15Ehuc muwec, “Rowosâec‐jopakicnefâc‐nane mi bâuac‐jopazo, porofetefâc‐nane mi bâʒâic‐jopazo.”
16Eme mâreŋ ira roroc fuaocte, â hobure dope qatara‐fâreocte muhuc
17ine qanaŋ ŋic moc soreme bânie‐jarewec: Josefe hâcne doc bapie kiŋaŋ qaqa ewec.
18Kike‐ticne jâc fifitacko râembiŋ, aeŋko basanaŋkepie fowec.
19Ekume findaŋdâŋ‐ticne fârio qawec, â Wofuŋte dâŋzi fuŋne‐ticne rituwec.
20Eme ŋicwofuŋzi kiŋaŋ soreme firuembiŋ, ŋicne ŋicne jaŋere guriŋ bapazi rambaŋko râewec;
21erâ ficticnere micne sâko âkendâŋnewec, â wiac‐ticne hone soŋaŋ efâreocte mucnewec.
22Eme ŋicbomboŋfâcne giedâŋ jazawec, â kiafâcne maŋɋârâŋ dâŋ qazu‐jarewec.
23Ekume Israezi Aigita mâreŋko rawec, Jakobozi Hamte mâreŋko jaba juwec.
24Â Wofuŋzi ine ŋicfâcne jambuŋ‐jopame, jaŋe saweku râsifâc‐jeŋic siric‐jopambiŋ.
25Erâ ejareme maŋjeŋic risieme ŋicfâcne qaisoc‐jopambiŋ, â kiŋaŋ qaqafâcne wiac gâgâpâcne ejarembiŋ.
26Eme kiŋaŋŋic‐ticne Mose sorewec, erâ wâc bâwosâec‐ticne Aroŋ.
27Jahe ŋondeŋ‐jeŋicko fuŋne qaqa mâsi‐ticne bapic, Hamte mâreŋko wiac bipinehec bâfuapic.
28Eki mume mâreŋ dapâc efârewec; jaŋe ine dâŋticne mana suambiŋ.
29E opâ‐jeŋic hetikieme soc efârewec, ehuc opâ qowi‐jeŋic qâhâmoc‐jopawec.
30Qaqec fisi mâreŋ sâc gerec gerec bambiŋ, ehuc ŋicwofuŋfâc‐jeŋic jaŋere ficmaŋko wâc fembiŋ.
31Eki mume neŋgec qâŋhec qâŋhec fisimbiŋ, â nusuczi mâreŋ sâckerâ fombiŋ.
32Hoere okacne aisi hândâŋ jarewec, â bâbâriczi hae mâreŋ imackewec.
33Waiŋ‐jeŋic â jâmbo‐jeŋic qanʒaŋnewec, â mâreŋ‐jeŋicte jâcwiac qazuwec.
34Ere micte ɋirikiŋ fisimbiŋ, â ɋirikiŋ motecne ʒare tâmiric.
35I jaŋe mâreŋ irec jâcrehac nâfârembiŋ, â gieo nânâ monʒaŋ omaembiŋ.
36Erâ mârâc fufuafâc‐jeŋic qâhâmoc‐jopa‐fârewec, ŋic tâpiri‐jeŋicte fârinere hata qaqasune hâcne.
37Erâ mana‐jareme siliwa â gol ameckerâ rambiŋ, â gurufâc‐jeŋic jaŋeraonec ŋic moczi moc kikene mi fâfâckewec.
38Rapie Aigita ŋic jaŋe aŋac‐jopawec. Wemocte? Hâhâwic bajarembiŋte.
39Eki ine karoraczi mumuc ejareocte qaratie‐jarewec, â ŋafeo ʒoc râeme tamae‐jarewec.
40Jaŋe âzâcnepie sirikic bâfua‐jarewec, â sambâŋkonec poroŋ mâririhec tahac‐jopawec.
41E qânâ bâmârâŋkeme opâ sâronehec wahawec, erâ mâreŋ sawao fusinehec rahuc fowec.
42E tiri mumupaŋ‐ticne manasuwecte iŋuc ewec, erâ kiŋaŋŋic‐ticne Abraham ere manasuwecte.
43Iŋuc ehuc ŋicfâc‐ticne ʒerimaŋko jowac‐jopawec; bâwosâecfâc‐ticne jaŋe gae hehuc bâjâpembiŋ.
44Eme qâpuc jaŋere mâreŋ tahac‐jopawec; ŋicne ŋicne jaŋe wiac hure hemârec embiŋ, i hâcne tahac‐jopame rauckembiŋ.
45Irec fârine ʒiŋuc fuaocte: Jaŋe mumupaŋ‐ticne basanaŋkerâ bajunʒepieŋ, â sâcmutâc dâŋticne reŋkenʒepieŋ. Wofuŋ mumbiaŋkeniŋ!
