1Zegar haw Tawi hemiapo kwer Azegar Tupàn puruwi ipuir 'ymaw rehe. Azegar ikatu haw rehe no. Amuzàg zegar haw newe, o Tupàn Tuweharupi Wiko Ma'e.
2Hepureruze'eg mehe naheremu'em kwaw ihe nehe, nahemunar kwaw ma'e rehe nehe. Màràn mehe erezur putar heàwàxi pà nehe. Aiko putar ikatu ma'e romo heràpuz me nehe.
3Namuixe kar pixik kwaw ikatu 'ymaw nehe. Naheakatuwawahy kwaw teko Tupàn wi utyryk ma'e kwer wanemiapo kwer rehe ihe. Nazapo kwaw ikatu 'ym ma'e wainuromo nehe.
4Amunyryk kar putar ma'e rehe imunar haw rehe hema'enukwaw paw hezewi nehe, heremu'emaw rehe hema'enukwaw paw hezewi nehe. Napokok pixik kwaw ikatu 'ymaw rehe nehe.
5Amumaw putar amogwer wanehe wakupe kutyr uze'eg zemueteahy ma'e ihe wà nehe. Namuigo kar kwaw amo wanuwi wiko wera'u ma'e herenataromo ihe wà nehe. Ikàg ma'e ikatu 'ym ma'e nuhem kwaw heruwake wà nehe.
6Aputar Tupàn rehe uzeruzar tuwe ma'e ihe wà. Amuigo kar putar heràpuzuhu pe wà nehe. Ikatu ma'e romo wiko ma'e upuner putar ihewe uma'ereko haw rehe wà nehe.
7Ni amo hemu'em ma'e nuiko kwaw heràpuzuhu pupe wà nehe. Ni amo ikatu ma'e romo wiko mua'u ma'e nuiko kwaw herenataromo wà nehe.
8'Ar nànàn amumaw putar zaneywy rehe har ikatu 'ym ma'e ihe wà nehe. Amuhem kar putar ikatu 'ym ma'e iapo har paw tawhu Tupàn Tuweharupi Wiko Ma'e henaw wi ihe wà nehe.
