Annabi Sakari 13

1

2

3

4

5

6

7

8

9

10

11

12

13

14

¹Na lɔxɔɛ, dulonyi minima nɛ naxan nɔma Dawuda xabilɛ nun Darisalamukae yunubi bade.

²Mangɛ Alatala xa masenyi nan ya: «Na lɔxɔɛ, n kuyee xili bama nɛ wo dɛ kui, wo nɛɛmu e ma. N e xa namiɲɔnmɛe nun e xa sɛniyɛntareɲa kerima nɛ.

³Xa mixi nde suusama namiɲɔnmɛ masenyi tide, a nga nun a baba naxan a barixi e a falama a bɛ, ‹I xa faxa, barima i bara wule fala Alatala xili ra.› A nga nun a baba naxan a barixi, e a sɔxɔma nɛ na masenyi xa fe ra.

⁴Na lɔxɔɛ, namiɲɔnmɛe birin yaagima nɛ e xa masenyie xa fe ra. E mu namiɲɔnmɛ dugi ragoroma e ma sɔnɔn alako e xa mixi madaxu.

⁵E birin a falama nɛ, ‹Namiɲɔnmɛ mu n na. Kabi n dimɛdi tɛmui n xɛ nan tun safe.›

⁶Kɔnɔ e a maxɔrinma nɛ, ‹Munse na yi nari ra i bɛlɛxɛe ma?› A e yaabima nɛ: ‹N xanuntenyi nan n maxɔnɔxi.›»

⁷«Santidɛgɛma, keli n ma xuruse dɛmadonyi xili ma, keli mixi xili ma naxan na n sɛɛti ma.» Mangɛ Alatala xa masenyi nan ya: «Santidɛgɛma, xuruse dɛmadonyi faxa, yɛxɛɛe rayensen yɛ. N fama nɛ yɛxɛɛyɔrɛe ɲaxankatade.»

⁸Alatala xa masenyi nan ya: «Ɲama dɔxɔ firin faxama nɛ, kɔnɔ a dɔxɔ saxan nde baloma nɛ.

⁹N na dɔxɔ saxan nde sama nɛ tɛ i, n e raxunu alɔ gbeti. N xa e mato alɔ xɛɛma. A na n maxandi, n a xa duba suxuma nɛ. N fama nɛ a masende, ‹N ma ɲama nan ya,› a fan a masen, ‹Alatala nan muxu Marigi Ala ra.›»