1Una dina ai ranu baine hahelohilohi dae David iduhuna bona Ierusalem inoholaina taudia edia, kara dikadia bona mirodia amo bae haheḡoeva totona.
2Iehova Sabaota na e tomu, Una dina ai danu kaivakuku ladadia na tano amo baina negedia daure; bena tau ta ese basine lalodia tao lou; bona peroveta taudia bona lauma mai mirona danu na tano amo baina abidia oho.
3Bema ta ma baine hedinarai, baineto ia na peroveta tauna, bena ia e havaraia tauna bona hahinena ese bae hamaoroa, baeto “Emu mauri na basine mia badina be hereva koikoidia na Iehova ladana ai o gwauraimu”; bena baine peroveta negana ai, e havaraia tauna bona hahinena ese bae gwadaia uru.
4Una dina ai peroveta taudia iboudiai na edia mata-hanai daidiai bae hemarai, bae peroveta negadia ai; idia na hahedoki huika-huikadia basie hahedokilai, taunimanima ikoidia totona.
5A idia baeto, Ai na dia peroveta taudia, ai na biru taudia; badina be ina tano na emai tano korikori, tauhaumai negana amo.
6Bena ta ese bema nanadaidia, bema toma “Ene dorumui berodia be dahaka?”, idia baeto “Ini bero na turamai edia ruma ai a davari”.
7Iehova Sabaota na e tomu: Dare e, a noga! Egu mamoe ireḡudia tauna ihadikana totona, badibadigu ai e ginimu tauna ihadikana totona. Mamoe ireḡudia tauna ba rahua mase, bena mamoe na bae karoho rohoroho, lau imagu baina toia roro, maraḡidia ihadikadia totona.
8Iehova na e tomu: Tano idoinai lalonai tatoi lalodia amo rarua bae negedia daure bena bae mase, bona tamona mo baine mauri.
9Bena unu ihatatoidia na lahi ai baina atodia, baina haḡoevadia, silver e hagoevaiamu na heto, baina tohodia, gold e tohoamu na heto. Idia ese lau ladagu bae hahanea, bena lau ese baina haere henidia. Bainato “Idia na lauegu bese”, bona idia baeto “Iehova na egu Dirava”.
