Ʒekaria 13

1

2

3

4

5

6

7

8

9

10

11

12

13

14

¹“Dameŋ ira Dawidire kikefuŋ â Jerusalem rune jaŋere erâ opâ ʒâŋe moc wefurâ sâqocne â wâwânâŋ‐jeŋic ʒure‐fâreocmu.

²“Anutu Tâpiri Ɋuŋɋasaŋ Wofuŋzi ʒiŋuc mukac: No dameŋ ira nemu jaŋere ʒâŋe biŋe bârâriepe moczi mocwâc mi manasuc‐jopazejec, erâ mâreŋ irec porofete â mâro wâwânâŋne jaŋe wâc bâsirowec‐jopapemu.

³Eme moc e porofete gie mocwâc bame neŋgoc mamac jahec‐ticne jahe ʒiŋuc âzâcnenicmu: ‘Go Wofuŋte ʒâŋeo âke hotahuc burecdâŋ mukomecte mi juzemec.’ Ehame e porofete maracko dâŋ mume neŋgoc mamac jahec‐ticne jahe âke‐hâmonicmu.

⁴Dameŋ ira porofete sasawa jaŋe wiac hone manac ehuc findaŋdâŋ mueŋgopieŋ irec mimieniŋmu, ehuc ŋaqi ʒâwânehec hepie hume eatuc gie baeŋgopieŋ i mocwâc mi baniŋmu.

⁵Aricne, jaŋe ʒiŋuc muniŋmu: ‘Nâŋe porofete aricne, nâŋe hesarac ŋic, nâŋe ɋieonecteaŋ mâreŋ rauckeeŋgopeneŋ.’

⁶‘Hâc, eme amecgao wemo wicrâfâ fokac?’ Ŋic moczi porofete moc iŋuc wiocneme dâŋ ʒiŋuc bâtikiecneocmu: ‘Âgofâc‐nane jaŋere ficko qaqac epene fua‐narewec.’”

⁷Anutu Tâpiri Ɋuŋɋasaŋ Wofuŋzi ʒiŋuc mukac: “O ʒika, go faharerâ lama soŋaŋ nore maŋfuŋko domakac e râsi ecnezemec. Go soŋaŋ qatec lama jaŋe siŋsaŋ qanʒepieŋ, ehame lama soŋaŋ wahakicne jaŋe wâc râsi ejarepemu.”

⁸Wofuŋzi ʒuhuckerâ ʒiŋuc mukac: “Mâreŋ ʒirecnec ŋic tucne sâko bâsirowec‐jopahape afecne sawazi juniŋmu.

⁹Afecne sawa juniŋmu jaŋe ʒocko behec‐jopapemu, ehuc siliwa rikepie wosâeekac irec sâc ejarepemu, â gol esâickeeŋgopieŋ irec sâc jaha ba esâic ejarepemu. Eme jaŋe ʒâŋe‐nane muhuc riwasecnupie micjeŋicko ropemu. Ehuc mupemu: ‘Jaŋe ŋicfâc‐nane,’ iŋuc mupe muniŋmu: ‘Wofuŋ e Anutu‐nâŋec.’”